ଝଡିଥିବା କେଶରୁ ଉର୍ବରକ ସୃଷ୍ଟି କଲେ ଦୁଇ ଛାତ୍ରୀ, ସାର ଅପେକ୍ଷା ଦେଲା ଅଧିକ ଫଳ
ବେଲଗାଭି: ଆପଣ କେବେ ଭାବିଛନ୍ତି କି ଆପଣଙ୍କ ମୁଣ୍ଡରୁ ଝଡ଼ୁଥିବା କେଶରୁ ବି ଉର୍ବରକ ଉତ୍ପାଦନ ହୋଇପାରିବ | ଆପଣଙ୍କ କେଶ ବି ଆପଣଙ୍କ ବଗିଚାରେ ଥିବା ଗଛକୁ ହୃଷ୍ଟପୃଷ୍ଟ କରିପାରିବ | ଯଦି ନୁହେଁ ତେବେ ଆପଣଙ୍କୁ ଏବେ ଭୁଲ ପ୍ରମାଣିତ କରିଦେବେ ଦୁଇ ଜଣ ଛାତ୍ରୀ | କର୍ଣ୍ଣାଟକ ବେଲଗାଭିର ଦୁଇ ଜଣ ଛାତ୍ରୀ ଏବେ କେଶରୁ ଉର୍ବରକ ଉତ୍ପାଦନ କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି | ବେଲଗାଭିର କେନ୍ଦ୍ରୀୟ ବିଦ୍ୟାଳୟରେ ପଢ଼ୁଥିବା ଦୁଇ ଜଣ ଛାତ୍ରୀ ଖୁସି ୱାଙ୍ଗଲକର ଓ ରେମିନିକା ଯାଦବ ମଣିଷ କେଶରୁ ବିକଶିତ ଉର୍ବରକ ବାହାର କରି ଏଥିରୁ ଫସଲ ଉତ୍ପାଦନ କରିଛନ୍ତି | ଆଇସିଏଆରର ବୈଜ୍ଞାନିକଙ୍କ ପ୍ରେରଣା ପାଇ ଏହି ଦୁଇ ଜଣ ଛାତ୍ରୀ ଗଛ ବୃଦ୍ଧି ପାଇଁ ଆବଶ୍ୟକୀୟ ଉର୍ବରକ ଆବିଷ୍କାର କରିଛନ୍ତି |
Sambad is now on WhatsApp
Join and get latest news updates delivered to you via WhatsApp
ଦୁଇ ଜଣ ଛାତ୍ରୀ ପ୍ରମାଣିତ କରିଛନ୍ତି ଯେ କେଶରେ ପୋଷକ ତତ୍ତ୍ୱ ରହିଥିବାବେଳେ ଏଥିରୁ ତରଳ କାର୍ବୋନିକ ଉର୍ବରକ ଆବିଷ୍କାର କରିଛନ୍ତି | ଏହି ଉର୍ବରକକୁ ସେମାନେ କ୍ଷେତରେ ଟମାଟୋ, ଫୁଲକୋବି ଓ ଲଙ୍କା ମଞ୍ଜି ସହ ବ୍ୟବହାର କରିଥିଲେ | ଯେଉଁଥିରୁ ସେମାନଙ୍କୁ ସଫଳତା ମିଳିଥିଲା |
ଦୁଇ ଛାତ୍ରୀଙ୍କ ଉର୍ବରକକୁ ଯେତେବେଳେ ପାଳଙ୍ଗ ଚାଷ ପାଇଁ ପରୀକ୍ଷା କରାଯାଇଥିଲା, ସାଧାରଣ ଉର୍ବରକରେ ପାଳଙ୍ଗ ଶାଗ ୧.୭ କିଲୋଗ୍ରାମ ହେଉଥିବାବେଳେ କେଶ ଉର୍ବରକରେ ଏହି ଶାଗ ୨.୩ କିଲୋଗ୍ରାମ ହୋଇଥିଲା | ଯାହାକି ଏବେ ବିଜ୍ଞାନର ନୂଆ ଦିଶାକୁ ଲୋକଲୋଚନକୁ ଆଣିଛି | ଦୁଇ ଜଣ ଛାତ୍ରୀ ଏବେ ନଭେମ୍ବର ୨୫ରେ ମଧ୍ୟପ୍ରଦେଶରେ ଆୟୋଜିତ ହେବାକୁ ଥିବା ରାଷ୍ଟ୍ରୀୟ ବାଳ ବିଜ୍ଞାନ ପ୍ରତିଯୋଗିତା ପାଇଁ ପ୍ରସ୍ତୁତି କରୁଛନ୍ତି |