ସିବିଆଇର ସଂଦେହ, କେବଳ ତଳିଆ କର୍ମଚାରୀଙ୍କୁ ନେଇ ଏଡେ ବଡ଼ ଠକେଇ ସମ୍ଭବ ନୁହେଁ
ମୁମ୍ବାଇ: ମୁମ୍ବାଇର ହୀରା ବ୍ୟବସାୟୀ ନିରବ ମୋଦିଙ୍କ ଦ୍ୱାରା କରାଯାଇଥିବା ୧୧,୪୦୦ କୋଟିର ପିଏନବି ଠକେଇ ମାମଲାର ରହସ୍ୟ ଧୀରେ ଧୀରେ ଭେଦ କରୁଛି ସିବିଆଇ । ଦିନକୁ ଦିନ ଅନେକ ନୂଆ ନୂଆ ତଥ୍ୟ ସିବିଆଇ ହାତରେ ଲାଗୁଛି । ଏହି ଠକେଇ କାରବାରର ଚେର କେତେ ଯେ ଗଭୀରକୁ ଯାଇଛି ତାହା ଖୋଦ ସିବିଆଇ ମଧ୍ୟ ଆଶ୍ଚର୍ଯ୍ୟ ହୋଇଯାଇଛି । ତେବେ ସିବିଆଇ ଏହା ମଧ୍ୟ ନିଶ୍ଚିତ ହୋଇଯାଇଛି ଯେ କେବଳ ବ୍ୟାଙ୍କର ତଳିଆ କର୍ମଚାରୀ ଓ କିରାଣୀଙ୍କୁ ନେଇ ଏତେ ବଡ଼ କାଣ୍ଡ ହେବା ସମ୍ଭବ ନୁହେଁ ।
Sambad is now on WhatsApp
Join and get latest news updates delivered to you via WhatsApp
ଘଟଣାର ଆହୁରି ଖୋଳତାଡ଼ କରିବାକୁ ସିବିଆଇ ପକ୍ଷରୁ ଏହି ସ୍କାମ ହୋଇଥିବା ପିଏନବିର ଦକ୍ଷିଣ ମୁମ୍ବାଇ ଶାଖାକୁ ସିଲ୍ କରିଦିଆଯାଇଛି । ଏପର୍ଯ୍ୟନ୍ତ ହୋଇଥିବା ତଦନ୍ତରୁ ଜଣାପଡ଼ିଛି ଯେ ପଂଜାବ ନ୍ୟାସନାଲ ବ୍ୟାଙ୍କ କିଛି ଅଧିକାରୀ ନିରବ ମୋଦିଙ୍କ ଲୋକଙ୍କୁ ବ୍ୟାଙ୍କର ଗୋପନୀୟ ପାସଓ୍ଵାର୍ଡ ମଧ୍ୟ ପ୍ରଦାନ କରିଥିଲେ । ଗିରଫ ହୋଇଥିବା ପୂର୍ବତନ ଡେପୁଟୀ ମ୍ୟାନେଜର ଗୋକୁଳନାଥ ସେଟ୍ଟୀ ନିରବ ମୋଦି କମ୍ପାନିକୁ କେତେକ ଜାଲ ଲେଟର ଅଫ ଅଣ୍ଡରଟେକିଂ ପ୍ରଦାନ କରିଥିଲା । ଏଗୁଡ଼ିକୁ ଗ୍ୟାରେଣ୍ଟି ଭାବେ ବ୍ୟବହାର କରି ନିରବ ମୋଦି କେତେକ ବ୍ୟାଙ୍କର ବିଦେଶୀ ଶାଖାରୁ ଋଣ ଉଠାଇଥିଲା । ସେଟ୍ଟୀ ବ୍ୟାଙ୍କର ନିରାପଦ ଯୋଗାଯୋଗ ବ୍ୟବସ୍ଥା ସ୍ୱିଫ୍ଟ ବ୍ୟବହାର କରି ସଂପୃକ୍ତ ବିଦେଶୀ ଶାଖାକୁ କନଫରମେସନ ଲେଟର ପଠାଏ । ଏପରିକି ଏହି ସିଷ୍ଟମର ପାସଓ୍ଵାର୍ଡ ମଧ୍ୟ ନିରବ ମୋଦି ଲୋକଙ୍କୁ ପ୍ରଦାନ କରାଯାଇଥିଲା , ଯେପରିକି ସେମାନେ ଏହି ଯୋଗାଯୋଗକୁ ଟ୍ରାକ୍ କରିପାରିବେ । ଅନ୍ୟପକ୍ଷରେ ସ୍ୱିଫ୍ଟ ( ଏକ ପ୍ରକାରର ନିରାପଦ ଅନ୍ତର୍ଜାତୀୟ ବ୍ୟାଙ୍କିଙ୍ଗ ଯୋଗାଯୋଗ ବ୍ୟବସ୍ଥା) ବ୍ୟବହାର କରି ଏସବୁ କାରବାର କରାଯାଉଥିଲେ ମଧ୍ୟ ସେଟ୍ଟୀ ବ୍ୟାଙ୍କର ନିଜସ୍ୱ ଆଭ୍ୟନ୍ତରୀଣ ସଫ୍ଟଓ୍ଵାର ସିଷ୍ଟମରେ ଏଗୁଡ଼ିକୁ ଏଣ୍ଟର କରୁନଥିଲେ । ଏପରି କାରବାର ବିଗତ କିଛି ବର୍ଷ ଧରି ଚାଲିଥିଲା ।