ଆରୋପର ଜବାବ ରଖିଲେ ମୁଖ୍ୟ ନିର୍ବାଚନ କମିଶନର: କମିଶନରମାନେ ପରସ୍ପରର ‘କ୍ଲୋନ୍’ ନୁହନ୍ତି, ବିଭିନ୍ନ ପ୍ରସଙ୍ଗରେ ମତ ଅଲଗା ହେବା ସ୍ୱାଭାବିକ
ନୂଆଦିଲ୍ଲୀ: ନିର୍ବାଚନ ଆଚରଣ ବିଧି ଉଲ୍ଲଂଘନ ମାମଲା ନେଇ ନିର୍ବାଚନ କମିସନଙ୍କ ପକ୍ଷରୁ ଜାରି ଚୂଡ଼ାନ୍ତ ରାୟରେ ତାଙ୍କର ମତ ଉଲ୍ଲେଖ ହେଉ ନଥିବା ଦର୍ଶାଇ ବୈଠକ ବର୍ଜନ କରିଛନ୍ତି କମିସନର ଅଶୋକ ଲଭାସା। ଏ ନେଇ ସେ ମୁଖ୍ୟ ନିର୍ବାଚନ କମିଶନରଙ୍କୁ ୩ଟି ପତ୍ର ଲେଖିବା ପରେ ଉପରୋକ୍ତ ପଦକ୍ଷେପ ନେଇଥିବା କଥା ଜଣାଇଛନ୍ତ ଲାଭାସା। ଏହି ଆରୋପ ପରେ ମୁହଁ ଖୋଲିଛନ୍ତି ମୁଖ୍ୟ ନିର୍ବାଚନ କମିସନର ସୁନୀଲ୍ ଆରୋରା। ସେ ଏହାକୁ ଏକ ସାଧାରଣ ଓ ସ୍ୱାଭାବିକ କଥା ବୋଲି ଅଭିହିତ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଶନିବାର ମୁଖ୍ୟ ନିର୍ବାଚନ କମିସନର ଆରୋରା କହିଛନ୍ତି, ନିର୍ବାଚନ କମିସନରମାନେ ପରସ୍ପରର ‘କ୍ଲୋନ୍’ ନୁହନ୍ତି। ତେଣୁ ବିଭିନ୍ନ ପ୍ରସଙ୍ଗରେ ସେମାନଙ୍କର ମତ ଅଲଗା ହେବା ସ୍ୱାଭାବିକ। ଏ କ୍ଷେତ୍ରରେ ତାହା ହିଁ ଘଟିଛି। ଏଥିସହ ମୁଖ୍ୟ ନିର୍ବାଚନ କମିସନର ଏକଥା ମଧ୍ୟ କହିଛନ୍ତି ଯେ ଅତୀତରେ କମିସନରମାନଙ୍କ ଭିତରେ ଭିନ୍ନମତତା ଥିବାର ବହୁ ଉଦାହରଣ ରହିଛି। ଏହା ସ୍ୱାଭାବିକ ଏବଂ ଏପରି ହେବା ମଧ୍ୟ ଉଚିତ। ତେଣୁ ଏ କ୍ଷେତ୍ରରେ ତାହା ହିଁ ଘଟିଛି।
ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ, ତିନି ଜଣିଆ ନିର୍ବାଚନ କମିଶନ ବୈଠକରେ ତାଙ୍କ ମତ ଶୁଣାଯାଉନଥିବାରୁ ଏଭଳି ନିଷ୍ପତ୍ତି ନେଇଛନ୍ତି ଅଶୋକ ଲଭାସା । ନିର୍ବାଚନ ଆଚରଣବିଧି ଉଲ୍ଲଂଘନ ସଂପର୍କିତ ନିର୍ଣ୍ଣୟ ସମୟରେ ତାଙ୍କର ମତ ‘ଅଳ୍ପମତ’ ହୋଇଥିଲେ ହେଁ ତାହା ରେକର୍ଡ କରାଯାଉନଥିବାରୁ ସେ ବୈଠକରୁ ଦୂରେଇ ରହିବାକୁ ନିଷ୍ପତ୍ତି ନେଇଛନ୍ତି। ସେ ମେ’ ୪ ତାରିଖରେ ଏ ନେଇ ମୁଖ୍ୟ ନିର୍ବାଚନ କମିଶନର ସୁନୀଲ ଆରୋରାଙ୍କୁ ପତ୍ର ଲେଖି ଜଣାଇଥିଲେ। ଏହାପରେ ମେ’ ୧୦ ଓ ୧୪ରେ ପୁନଶ୍ଚ ପତ୍ର ଲେଖି ନିଜର ମତ ରଖିଥିଲେ। ମାତ୍ର ନିର୍ବାଚନ ଆଚରଣବିଧି ଉଲ୍ଲଂଘନ ସଂପର୍କିତ ଚୂଡ଼ାନ୍ତ ନିଷ୍ପତ୍ତି ନଥିରେ ତାଙ୍କର ମତ ଉଲ୍ଲେଖ କରା ନ ଯିବାରୁ ସେ ବୈଠକରୁ ନିଜକୁ ଦୂରେଇ ରଖିବାକୁ ସ୍ଥିର କରିଛନ୍ତି।