ଡ୍ରାଗନର ସାମ୍ରାଜ୍ୟ ବିସ୍ତାର ଯୋଜନା : ୨୦୨୫ ସୁଦ୍ଧା ତାଇଓ୍ଵାନକୁ ନିଜ ସହିତ ମିଶାଇଦେବ ଚୀନ !
ଟୋକିଓ : ଚୀନର ଭବିଷ୍ୟତ ରଣନୀତି ସମ୍ପର୍କରେ ଏକ ଚିନ୍ତା କଲାଭଳି ବୟାନ ଦେଇଛନ୍ତି ଜାପାନର ପୂର୍ବତନ ବାୟୁସେନା ମୁଖ୍ୟ ଓରିଟା କୁନିଓ । ସେ କହିଛନ୍ତି ଯେ ଚୀନର ମୁଖ୍ୟ ଉଦ୍ଦେଶ୍ୟ ହେଉଛି ଏସିଆରେ ନିଜର ବିସ୍ତାରବାଦୀ ନୀତିକୁ ଜାରି ରଖିବା ଓ ଏହା ମାଧ୍ୟମରେ ସମଗ୍ର ଏସିଆରେ ନିଜର ଆଧିପତ୍ୟ ବିସ୍ତାର କରିବା । ଏପରକି ଆସନ୍ତା ୨୦୨୫ ସୁଦ୍ଧା ଚୀନ ତାଇଓ୍ଵାନକୁ ନିଜ ସହିତ ମିଶାଇଦେବାକୁ ଯୋଜନା ପ୍ରସ୍ତୁତ କରିସାରିଛି । ଏହା ପରେ ଚୀନ ଜାପାନ ଅଧିନରେ ଥିବା ଦ୍ୱୀପପୁଞ୍ଜ ଓକିନାଓ୍ଵାକୁ ମଧ୍ୟ ନିଜ ସହ ମିଶାଇବାକୁ ଲକ୍ଷ୍ୟ ରଖିଛି ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କିନ୍ତୁ ଚୀନ ଏତିକିରେ ସନ୍ତୁଷ୍ଟ ହୋଇରହିବ ନାହିଁ, ୨୦୪୦ ସୁଦ୍ଧା ସମଗ୍ର ଦକ୍ଷିଣ ଚୀନ ସାଗରକୁ ନିଜର ଅଞ୍ଚଳ ବୋଲି ଘୋଷଣା କରିଦେବ । ଏହା ପରେ ଚୀନ ଭାରତର କିଛି ଅଞ୍ଚଳକୁ ନିଜ ସହ ମିଶାଇଦେବ ବୋଲି ମଧ୍ୟ ଆଉ କିଛି ଭବିଷ୍ୟବାଣୀ କରିଛନ୍ତି । ଚୀନ ରାଷ୍ଟ୍ରପତି ସି ଜିନିପିଂ ନିଜର ନୂଆବର୍ଷ ଅଭିଭାଷଣରେ ତାଇଓ୍ଵାନକୁ ଅଧିକାର କରିବା ବିଷୟରେ ପରୋକ୍ଷରେ ଉଲ୍ଲେଖ କରିଥିଲେ । ନିଜର ଅଭିଭାଷଣରେ ଚୀନ ରାଷ୍ଟ୍ରପତି କହିଥିଲେ ଯେ ଏହି ‘ସମସ୍ୟା’କୁ ପରବର୍ତ୍ତି ପିଢିକୁ ଲମ୍ବାଇବାର ସମ୍ଭାବନା ନାହିଁ । ସେ ଶାନ୍ତିପୂର୍ଣ୍ଣ ଉପାୟ କଥା କହୁଥିଲେ ମଧ୍ୟ ଆବଶ୍ୟକ ପଡ଼ିଲେ ବଳପ୍ରୟୋଗ ମଧ୍ୟ କରିବାକୁ ଚୀନ ପଛେଇବ ନାହିଁ ।
ଚୀନ ନିଜର ଏହି ୨୦୨୫ ଲକ୍ଷ୍ୟ ଉପରେ କାମ ଆରମ୍ଭ କରିସାରିଲାଣି । ତେବେ ଆଉ କିଛି ବିଶେଷଜ୍ଞଙ୍କ ମତରେ ଚୀନର ଏହି ଯୋଜନା ସେତେଟା ସହଜ ହେବ ନାହିଁ । କାରଣ ତାଇଓ୍ଵାନକୁ ନିଜ ସହ ମିଶାଇବା ପାଇଁ ଚୀନ ଏହି କ୍ଷୁଦ୍ର ଦେଶ ଉପରେ ଆକ୍ରମଣ କଲେ ଆମେରିକା ଚୀନ ଉପରେ ଆକ୍ରମଣ କରିବ । ଏହା ଫଳରେ ଚୀନ ଆମେରିକା ଉପରେ ପ୍ରତି ଆକ୍ରମଣ କରିବ । ଅନ୍ୟପକ୍ଷରେ ଜାପାନ, ଇଣ୍ଡୋନେସିଆ ମଧ୍ୟ ଚୁପ ହୋଇ ବସିବେ ନାହିଁ । ସେମାନେ ମଧ୍ୟ ଚୀନ ଉପରେ ମୌକା ଦେଖି ଆକ୍ରମଣ କରିବେ ।