‘ପିଏମ କେଆରସ ଫଣ୍ଡ’କୁ ଏତିକି ସହାୟତା ରାଶି ଦାନ କଲେ ପ୍ରଧାନମନ୍ତ୍ରୀଙ୍କ ମା’ ହୀରାବେନ

ନୂଆଦିଲ୍ଲୀ: ବର୍ତ୍ତମାନ ସାରା ଦେଶ କରୋନା ଭଳି ମହାମାରୀ ସହ ଲଢେଇ କରୁଛି | କରୋନା ଆକ୍ରାନ୍ତଙ୍କୁ ଠିକ ସମୟରେ ଚିକିତ୍ସା ଓ ସାହାଯ୍ୟ ଯୋଗାଇଦେବା ପାଇଁ କେନ୍ଦ୍ର ସରକାର ‘ପିଏମ କେଆରସ ଫଣ୍ଡ’ ନାମକ ଏକ ଟ୍ରଷ୍ଟ ସ୍ଥାପନ କରିଥିବା ବେଳେ ଅନେକ ଧନୀ ବ୍ୟକ୍ତିଙ୍କ ଠାରୁ ଆରମ୍ଭ କରି ଅନେକ ସାଧାରଣ ଲୋକ ଏହି ରିଲିଫ ଫଣ୍ଡକୁ ଦାନ କରୁଥିବା ଦେଖାଯାଉଛି | ତେବେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମା’ ହୀରାବେନ ମଧ୍ୟ କରୋନାଭାଇରସ ମୁକାବିଲା ପାଇଁ ‘ପିଏମ କେଆରସ ଫଣ୍ଡ’କୁ ସହାୟତା ରାଶି ଦେଇଥିବା ଜଣା ପଡିଛି | ସେ ନିଜ ବ୍ୟକ୍ତିଗତ ସଞ୍ଚୟରୁ ୨୫,୦୦୦ ଟଙ୍କା ‘ପିଏମ କେଆରସ ଫଣ୍ଡ’କୁ ଦେଇଛନ୍ତି, ଯାହା ଭାରତରେ କୋଭିଡ -୧୯ ଦ୍ୱାରା ପ୍ରଭାବିତ ଲକ୍ଷ ଲକ୍ଷ ଲୋକଙ୍କୁ ରିଲିଫ ଯୋଗାଇବା କାମରେ ଲଗାଯିବ |

ସୂଚନା ମୁତାବକ, ଗତ ଶନିବାର ଦେଶକୁ ଏବଂ ଦେଶବାସୀଙ୍କୁ ସାହାଯ୍ୟ କରିବା ଏବଂ କରୋନା ଦ୍ୱାରା ପ୍ରଭାବିତ ଲୋକଙ୍କୁ ସହାୟତା ଯୋଗାଇଦେବା ପାଇଁ କେନ୍ଦ୍ର ସରକାର ‘ପିଏମ୍ କେଆର୍ସ ଫଣ୍ଡ’ ନାମରେ ଏକ ସାର୍ବଜନୀନ ଦାନଗ୍ରହଣକାରୀ ଟ୍ରଷ୍ଟ ସ୍ଥାପନ କରିଥିଲେ | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଟ୍ରଷ୍ଟର ଅଧକ୍ଷ ହେବା ସହ ଏହାର ସଦସ୍ୟମାନଙ୍କ ମଧ୍ୟରେ ପ୍ରତିରକ୍ଷା ମନ୍ତ୍ରୀ, ଗୃହମନ୍ତ୍ରୀ ଏବଂ ଅର୍ଥମନ୍ତ୍ରୀ ରହିବେ ବୋଲି ଜଣା ପଡିଥିଲା। ମୋଦିଜୀଙ୍କ ଏଭଳି ଘୋଷଣା ପରେ ଅନେକ ନେତା-ଅଭିନେତା କୋଟି କୋଟି ଟଙ୍କା ସହାୟତା ରାଶି ଦେଇଥିବାର ଖବର ସାମ୍ନାକୁ ଆସିଥିଲା |