ଯକୃତ ଦାନ କରି ଝିଅ ବଞ୍ଚାଇଦେଲା ବାପାର ଜୀବନ
ଚେନ୍ନାଇ: ବାପା ପାଇଁ ଝିଅର ମହାଦାନ | ବାପା କିଭଳି ବଞ୍ଚିବେ, ମୁଣ୍ଡ ଉପରୁ କିଭଳି ଦୁରେଇ ଯିବନି ବାପାର ହାତ, ୧୯ ବର୍ଷ ଧରି ବାପାଙ୍କର ଅବଦାନକୁ ନ ଭୁଲି ନିଜ ଯକୃତର କିଛି ଅଂଶ ବାପାଙ୍କୁ ଦାନ କରିଛନ୍ତି ପଣ୍ଡିଚେରୀର ଜଣେ ଝିଅ | ଏବେ ଏହି ଝିଅର ଯକୃତରେ ହିଁ ଜଣେ ଅସୁସ୍ଥ ବାପା ନୂଆ ଜୀବନ ପାଇପାରିଛନ୍ତି | ଚେନ୍ନାଇର ଜୀଇଏମ ହସ୍ପିଟାଲରେ ଯକୃତ ଜନିତ ସମସ୍ୟାକୁ ନେଇ ଭର୍ତ୍ତି ହୋଇଥିଲେ ୪୮ ବର୍ଷର ଜଣେ ବ୍ୟକ୍ତି | ଜୀବନ-ମରଣ ସହ ସଂଘର୍ଷ କରୁଥିବା ଏହି ବ୍ୟକ୍ତିଙ୍କ ପାଇଁ ଯକୃତ ଅପରେସନ ହିଁ ଏକ ମାତ୍ର ବାଟ ଥିଲା | ଏହି ସମୟରେ ନିଜ ବାପାଙ୍କ ପାଇଁ ଆଗେଇ ଆସିଥିଲେ ୧୯ ବର୍ଷର ଝିଅ |
Sambad is now on WhatsApp
Join and get latest news updates delivered to you via WhatsApp
ଇଂଜିନିୟରିଂ ପାଠ ପଢ଼ୁଥିବା ଏହି ଝିଅ ନିଜେ ଡାକ୍ତରଖାନାକୁ ଆସି ଡାକ୍ତରଙ୍କୁ ନିଜର ଯକୃତରୁ କିଛି ଅଂଶ ବାପାଙ୍କ ଶରୀରରେ ପ୍ରତିରୋପଣ କରିବାକୁ କହିଥିଲେ | ଝିଅର ନିଜ ବାପାଙ୍କ ପ୍ରତି ଥିବା ଅକୁଣ୍ଠ ଭଲ ପାଇବା ଦେଖି ଡାକ୍ତର ବି ରାଜି ହୋଇଯାଇଥିଲେ | ସାଢେ ତିନି ଘଣ୍ଟାର ଜଟିଳ ଅପରେସନ ପରେ ଝିଅର ଯକୃତରୁ କିଛି ଅଂଶ ଏହି ବ୍ୟକ୍ତିଙ୍କ ଶରୀରରେ ପ୍ରତିରୋପଣ କରାଯାଇଥିଲା |
ବର୍ତ୍ତମାନ ଉଭୟ ବାପା ଓ ଝିଅ ସୁସ୍ଥ ଅଛନ୍ତି | ଜୀଇଏମ ହସ୍ପିଟାଲର ଡାକ୍ତର ସି ପଲନିବେଲୁ ଓ ତାଙ୍କ ଟିମ ମଙ୍ଗଳବାର ତାମିଲନାଡୁ ମୁଖ୍ୟମନ୍ତ୍ରୀ ଇ ପଲାନିସ୍ୱାମୀଙ୍କୁ ଭେଟି ଏହି ଅପରେସନ ବାବଦରେ କହିଥିଲେ | ଏହାପରେ ମୁଖ୍ୟମନ୍ତ୍ରୀ ସୁନା ଝିଅକୁ ସମ୍ବର୍ଦ୍ଧିତ କରିଥିଲେ | ଏହି ଘଟଣାଟି ହିଁ କନ୍ୟା ରତନ କର ଯତନ ଉକ୍ତିଟିକୁ ସମସ୍ତଙ୍କୁ ମନେପକାଇଦେବ ଏବଂ ଝିଅ-ବାପାଙ୍କ ଅକୁହା ସମ୍ପର୍କକୁ ନିଆରା ଢଙ୍ଗରେ ବଖାଣିବ |