ପୁରୁଷଙ୍କ ଠାରୁ ଭିନ୍ନ ଦିଶିବାକୁ ଦିଲ୍ଲୀ ମହିଳା ପୁଲିସ ପାଟ୍ରୋଲ୍‌ ୟୁନିଟ୍‌କୁ ମିଳିଲା ଗୋଲାପି ସ୍କୁଟର୍‌

ନୂଆଦିଲ୍ଲୀ: ପୁରୁଷ ସହକର୍ମୀଙ୍କ ଠାରୁ ଭିନ୍ନ ଦିଶିବା ଲାଗି ଦିଲ୍ଲୀ ପୁଲିସର ସ୍ୱତନ୍ତ୍ର ମହିଳା ପାଟ୍ରୋଲ୍‌ ୟୁନିଟ୍‌କୁ ମିଳିଛି ଗୋଲାପି ରଙ୍ଗର ସ୍କୁଟର୍‌।
ଡିସେମ୍ବର ମାସ ଠାରୁ ଉତ୍ତର-ପୂର୍ବ ଦିଲ୍ଲୀର ରାସ୍ତାମାନଙ୍କରେ ପାଟ୍ରୋଲିଙ୍ଗ୍‌ କରୁଥିବା ଏହି ୧୬ଜଣିଆ ସଦସ୍ୟବିଶିଷ୍ଟ ଟିମ୍‌ ସହରର ସମ୍ପୃକ୍ତ ଅଞ୍ଚଳରେ ମହିଳାମାନଙ୍କ ପ୍ରତି ହେଉଥିବା ଅପରାଧ ରୋକିବାକୁ ମୁତୟନ କରାଯାଇଛି।

ଏବେ ସେମାନେ ଗୋଲାପି ହେଲ୍‌ମେଟ୍‌ ପିନ୍ଧି ଗୋଲାପି-ଓ-ଧଳା ସ୍କୁଟର୍‌ ଚଢ଼ିବେ।

ଉତ୍ତର-ପୂର୍ବ ଦିଲ୍ଲୀର ଡେପୁଟି ପୁଲିସ କମିସନର୍‌ ବେଦ ପ୍ରକାଶ ସୂର୍ଯ୍ୟ କହିଛନ୍ତି: ଉଭୟ ଲିଙ୍ଗର ୟୁନିଫର୍ମର ରଙ୍ଗ ଏକା ହୋଇଥିବାରୁ ଦୂରରୁ ମହିଳା ଟିମ୍‌ ଭିନ୍ନ ଦେଖାଯାଆନ୍ତି ନାହିଁ। ସେଥିପାଇଁ ଏ ଭଳି ବ୍ୟବସ୍ଥା କରାଯାଇଛି।

ପରୀକ୍ଷାମୂଳକ ଭାବେ ପ୍ରଥମେ ଏହା ୨୦୧୪ରେ ବାଇକ୍‌ ଆରୋହୀ ୟୁନିଟ୍‌ ଭାବେ ଆରମ୍ଭ ହୋଇ କେତେଗୁଡ଼ିଏ ପରିବର୍ତ୍ତନ ଦେଇ ଗତି କଲାଣି। ବାଇକ୍‌ ପରିବର୍ତ୍ତେ ଧଳା ସ୍କୁଟର୍‌ ଦିଆଗଲା। ଏବଂ ଏଇ ସେପ୍ଟେମ୍ବର ଠାରୁ ସେମାନଙ୍କୁ ଗୋଲାପି-ଓ-ଧଳା ଚେକ୍‌ ରଙ୍ଗର ସ୍କୁଟର୍‌ ଦିଆଗଲା। ଏଇ ୧୬ ଜଣିଆ ଟିମ୍‌ ଏବେ ମହିଳାଙ୍କ ପ୍ରତି ବିପଦ୍‌ ଥିବା ସ୍ଥାନଗୁଡ଼ିକରେ ପୂର୍ବହ୍ନ ୧୧ ଟାରୁ ଅପରାହ୍ଣ ୧ଟା ଏବଂ ସନ୍ଧ୍ୟା ୫ଟାରୁ ସନ୍ଧ୍ୟା ୭ଟା- ଦୁଇ ସିଫ୍ଟ୍‌ରେ ପାଟ୍ରୋଲିଙ୍ଗ୍‌ କରୁଛନ୍ତି।

ପ୍ରତି ସ୍କୁଟର୍‌ରେ ଦୁଇଜଣ ମହିଳା ପୁଲିସ ରହୁଛନ୍ତି। ପଛରେ ବସୁଥିବା ପୁଲିସଙ୍କ ପାଖରେ ରହିଛି ପିସ୍ତଲ୍‌। ଏହାଛଡ଼ା ସ୍କୁଟର୍‌ରେ ଅଛି ବେଟନ୍‌, ପେପର୍‌ ସ୍ପ୍ରେ ଓ ହୁଟର୍‌।