ରାଜନୈତିକ ଦଳଙ୍କୁ ୨ ହଜାର ଟଙ୍କାରୁ ଅଧିକ ନଗଦ ଚାନ୍ଦା ଦିଅନ୍ତୁ ନାହିଁ : ଆୟକର ବିଭାଗ
ନୂଆଦିଲ୍ଲୀ: କୌଣସି ରାଜନୈତିକ ଦଳଙ୍କୁ ନଗଦ ୨ ହଜାର ଟଙ୍କାରୁ ଅଧିକ ଚାନ୍ଦା ଦିଅନ୍ତୁ ନାହିଁ । ଏ ନେଇ ଜନସାଧାରଣଙ୍କୁ ସତର୍କ କରାଇଦେଇଛି ଆୟକର ବିଭାଗ । ରାଜନୈତିକ ପାଣ୍ଠି ସଂଗ୍ରହକୁ ଅଧିକ ସ୍ୱଚ୍ଛ କରିବାକୁ ବିଭାଗ ଏହି ପଦକ୍ଷେପ ନେଇଛି ।
ଆୟକର ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ଜଣେ ବ୍ୟକ୍ତି ଏକ ପଂଜୀକୃତ ରାଜନୈତିକ ଦଳ ବା ଟ୍ରଷ୍ଟକୁ ନଗଦ ୨ ହଜାର ଟଙ୍କାରୁ ଅଧିକ ମୂଲ୍ୟର ଚାନ୍ଦା ଦେବା ଉଚିତ ନୁହେଁ । ସରକାରଙ୍କ ପକ୍ଷରୁ ଗତ ୨ ତାରିଖରେ ଘୋଷିତ ଇଲେକ୍ଟରାଲ ବଣ୍ଡ୍ ସ୍କିମ ପରିପ୍ରେକ୍ଷୀରେ ବିଭାଗ ଏହି ପଦକ୍ଷେପ ନେଇଛି ।
Sambad is now on WhatsApp
Join and get latest news updates delivered to you via WhatsApp
ଦେଶରେ ରାଜନୈତିକ ପାଣ୍ଠି ସଂଗ୍ରହକୁ ଅଧିକ ସ୍ୱଚ୍ଛ କରିବାକୁ ଅର୍ଥମନ୍ତ୍ରୀ ଚଳିତ ମାସ ପ୍ରଥମ ସପ୍ତାହରେ ଇଲେକ୍ଟରାଲ ବଣ୍ଡ ପ୍ରଚଳନ ବିଷୟରେ ଘୋଷଣା କରିଥିଲେ । ଏହି ସ୍କିମ ଅନୁସାରେ ଷ୍ଟେଟ୍ ବ୍ୟାଙ୍କର କେତେକ ନିର୍ଦ୍ଦିଷ୍ଟ ଶାଖାରେ ଏହି ବଣ୍ଡ ବିକ୍ରି କରାଯିବ । ଏହି ବଣ୍ଡ୍ ଜାନୁୟାରୀ, ଏପ୍ରିଲ, ଜୁଲାଇ ଓ ଅକ୍ଟୋବର ମାସରେ ୧୦ ଦିନ ପାଇଁ ବିକ୍ରି କରାଯିବ । ଏହି ବଣ୍ଡ୍ଗୁଡିକର ବୈଧତା ୧୫ ଦିନ ପାଇଁ ରହିବ । ଯଦିଓ ବଣ୍ଡରେ ଦାତାଙ୍କ ନାମ ଉଲ୍ଲେଖ ରହିବ ନାହିଁ, ତେବେ ବ୍ୟାଙ୍କରେ ତାଙ୍କୁ କେଓ୍ଵାଇସି ନିୟମକୁ ପାଳନ କରିବାକୁ ପଡିବ । ଅର୍ଥାତ୍ ଆଧାର କାର୍ଡ, ପ୍ୟାନକାର୍ଡ ଆଦି ବିବରଣୀ ଦେବାକୁ ପଡିପାରେ । ଅନ୍ୟପକ୍ଷରେ ରାଜନୈତିକ ଦଳମାନେ ନିଜର ବ୍ୟାଙ୍କ ଖାତା ମାଧ୍ୟମରେ ଏହି ବଣ୍ଡକୁ ଭଙ୍ଗେଇ ପାରିବେ ।
କେବଳ ଏତିକି ନୁହେଁ ଆୟକର ବିଭାଗ ଆହୁରି ମଧ୍ୟ କହିଛି ଯେ ଜଣେ ବ୍ୟକ୍ତି ଅନ୍ୟ ଜଣେ ବ୍ୟକ୍ତିଙ୍କଠାରୁ ଗୋଟିଏ ଦିନରେ ୨ ଲକ୍ଷ ବା ଅଧିକ ଟଙ୍କାର ନଗଦ ଅର୍ଥ ଗ୍ରହଣ କରିବା ଉଚିତ ନୁହେଁ । ସେହିପରି ବ୍ୟବସାୟିକ ବା ପେଷାଗତ ଆନୁଷଙ୍ଗିକ ଖର୍ଚ୍ଚ ବାବଦରେ ଥରକେ ୧୦ ହଜାରରୁ ଅଧିକ ପରିମାଣରେ ନଗଦ ପେମେଣ୍ଟ କରାଯିବା ଉଚିତ ନୁହେଁ । ପୁଣିକୌଣସି ସ୍ଥାନରେ ଏପରି ବେଆଇନ କାରବାର ହେଉଥିଲେ ଆୟକର ବିଭାଗକୁ ସୂଚୀତ କରିବାକୁ ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି ।