କାଏରୋ : ଇଜିପ୍ଟର ଉତ୍ତର ସିନାଇରେ ଆଜି ଆତଙ୍କବାଦୀମାନେ ଏକ ମସ୍ଜିଦ୍ରେ ପ୍ରଚଣ୍ଡ ଆକ୍ରମଣ କରିଛନ୍ତି। ଭୟଙ୍କର ବିସ୍ଫୋରଣ ଏବଂ ଗୁଳିମାଡ଼ରେ ୨୩୫ ଜଣ ପ୍ରାଣ ହରାଇଛନ୍ତି ଏବଂ ଶତାଧିକ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ୪୦ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ମୃତ୍ୟୁସଂଖ୍ୟା ଆହୁରି ବଢ଼ିବାର ଆଶଙ୍କା ରହିଛି। ଆତଙ୍କବାଦୀମାନେ ଆତ୍ମଘାତୀ ବୋମା ଏବଂ ସ୍ୱୟଂଚାଳିତ ବନ୍ଧୁକ ବ୍ୟବହାର କରି ଆକ୍ରମଣ କରିଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଅଲ୍ ରାଓ୍ଵଧ ମସ୍ଜିଦ୍ରେ ଶୁକ୍ରବାର ପ୍ରାର୍ଥନା ଚାଲିଥିବା ବେଳେ ଏହି ବର୍ବର ଆକ୍ରମଣ ଇଜିପ୍ଟକୁ ଥରାଇ ଦେଇଛି। ଅଧିକ ଆକ୍ରମଣ ଆଶଙ୍କାରେ ବ୍ୟାପକ ସତର୍କତା ପଦକ୍ଷେପ ଗ୍ରହଣ କରାଯାଇଛି । ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଆତଙ୍କବାଦୀମାନେ ମସ୍ଜିଦ୍ ପରିସରରେ ଗୋଟିଏ ଶକ୍ତିଶାଳୀ ବୋମା ଖଞ୍ଜିଥିଲେ ଏବଂ ତାହା ପ୍ରାର୍ଥନା ଚାଲିଥିବା ବେଳେ ବିସ୍ଫୋରଣ ଘଟିଥିଲା। ଆଉ ଜଣେ ମାନବ ବୋମା ନିଜକୁ ବିସ୍ଫୋରଣରେ ଉଡ଼ାଇ ଦେଇଥିଲା। ଏହାପରେ ଦଳାଚକଟା ଭିତରେ ଶ୍ରଦ୍ଧାଳୁମାନେ ବାହାରକୁ ଦୌଡ଼ି ଆସୁଥିବା ବେଳେ ମୁଖ୍ୟ ଫାଟକରେ ରହି ଆତଙ୍କବାଦୀମାନେ ଗୁଳିବର୍ଷା କରିଥିଲେ। ନିରୀହ ଲୋକଙ୍କ ଉପରେ ଏଭଳି ଯୋଜନାବଦ୍ଧ ଆକ୍ରମଣ କାପୁରୁଷୋଚିତ କାର୍ଯ୍ୟ ବୋଲି ଇଜିପ୍ଟ ରାଷ୍ଟ୍ରପତି କହିଛନ୍ତି। ଇଜିପଟ୍ ସୀମାରେ ସୁରକ୍ଷା କଡ଼ାକଡ଼ି କରାଯାଇଥିବା ବେଳେ ରାଜଧାନୀ କାଏରୋରେ ମଧ୍ୟ ବ୍ୟାପକ ସତର୍କତା ପଦକ୍ଷେପ ନିଆଯାଇଛି ।
ଇଜିପ୍ଟ ରାଷ୍ଟ୍ରପତି ଆବଦେଲ ଫତହ ଅଲ୍ ସିସି ଏକ ଜରୁରୀ ବୈଠକ ଡକାଇ ନିରାପତ୍ତା ସ୍ଥିତି ସମୀକ୍ଷା କରିଛନ୍ତି। ଉତ୍ତର ସିନାଇ ପ୍ରଦେଶରେ ଇସ୍ଲାମିକ୍ ଷ୍ଟେଟ୍ ଆତଙ୍କବାଦୀମାନେ ସକ୍ରିୟ ରହିଥିବାରୁ ବିଭିନ୍ନ ସମୟରେ ସୁରକ୍ଷା ବାହିନୀ ସହ ସେମାନଙ୍କ ସଂଘର୍ଷ ହୋଇଛି। ଏହି ଅଂଚଳରେ ଆତଙ୍କବାଦୀମାନେ ସର୍ବଦା ସୁରକ୍ଷାବାହିନୀକୁ ହିଁ ଟାର୍ଗେଟ୍ କରି ଆସୁଥିବା ବେଳେ ପ୍ରଥମ ଥର ପାଇଁ ଏକ ମସ୍ଜିଦ୍ରେ ରକ୍ତ ନଦୀ ବୁହାଇଛନ୍ତି। ଉତ୍ତର ସିନାଇ ଅଂଚଳରେ ଆତଙ୍କବାଦୀଙ୍କୁ ମୂଳପୋଛ ପାଇଁ ଇଜିପ୍ଟ ସେନା କାର୍ଯ୍ୟାନୁଷ୍ଠାନ ଆରମ୍ଭ କରିଛି। ୪୦ରୁ ଅଧିକ ସ୍ଥାନରେ ସେନାର ଚଢ଼ଉ ଜାରି ରହିଛି। ଆଜିର ଆକ୍ରମଣରେ ୫ରୁ ଅଧିକ ଆଇଏସ୍ ଆତଙ୍କବାଦୀ ସାମିଲ ଥିବା ଜଣାପଡ଼ିଛି। ସିନାଇରେ ଏକ କମାଣ୍ଡ ସେଣ୍ଟର ସ୍ଥାପନ ପାଇଁ ଆଇଏସ୍ର ଉଦ୍ୟମକୁ କିଛିଦିନ ତଳେ ସେନା ପଣ୍ଡ କରିଦେଇଥିଲା।
୨୦୧୧ରେ ରାଷ୍ଟ୍ରପତି ପଦରୁ ହୁସନେ ମୁବାରକ ଗାଦିଚ୍ୟୁତ ହେବା ପରେ ଏହି ଅଞ୍ଚଳ ଅଶାନ୍ତ ହୋଇପଡ଼ିଛି। ବିଶେଷ କରି ୨୦୧୩ରେ ତତ୍କଳୀନ ରାଷ୍ଟ୍ରପତି ମହମ୍ମଦ ମୋର୍ସିଙ୍କୁ ସେନା ଗାଦିଚ୍ୟୁତ କରିବା ପରେ ପରିସ୍ଥିତି ଆହୁରି ଭୟଙ୍କର ହୋଇପଡ଼ିଛି। ଆତଙ୍କବାଦୀମାନେ ସେନାକୁ ଟାର୍ଗେଟ କରି ହିଂସା ଚଳାଇଛନ୍ତି। ଗତ ୪ ବର୍ଷ ମଧ୍ୟରେ ଆତଙ୍କବାଦୀ ଆକ୍ରମଣରେ ସେନାର ୭୦୦ ଯବାନ ନିହତ ହେଲେଣି।