ମାଲେ : ଗତ ବର୍ଷ ଦ୍ୱୀପଦେଶ ମାଳଦ୍ୱୀପକୁ ନିଜ ଇଚ୍ଛା ଅନୁସାରେ ନଚାଉଥିବା ଅବଦୁଲ୍ଲା ୟମିନଙ୍କ ପାଇଁ ଏବେ ଶନିଦଶା ଚାଲିଛି । କିଛି ମାସତଳେ ନିର୍ବାଚନ ହାରି ଗାଦି ହରାଇଥିବା ଅବଦୁଲ୍ଲାଙ୍କ ପାଇଁ ଏବେ ଆଉ ଏକ ସମସ୍ୟା ଦେଖାଦେଇଛି । ତାଙ୍କ ବିରୋଧରେ ବେଆଇନ ଅର୍ଥ କାରବାର ମାମଲାରେ ତାଙ୍କୁ ଗିରଫ କରାଯାଇଛି । ଏହି ମାମଲାର ବିଚାର କରି ମାଳଦ୍ୱୀପର ଏକ କୋର୍ଟ ତାଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଥିଲେ । ସେ ବେଆଇନ ଭାବେ ପ୍ରାୟ ୧.୫ ନିୟୁତ ସରକାରୀ ଅର୍ଥ ନିଜର ବ୍ୟକ୍ତିଗତ ବ୍ୟାଙ୍କ ଖାତାକୁ ଟ୍ରାନ୍ସଫର କରିଥିବା ଅଭିଯୋଗ ହୋଇଛି । ତାଙ୍କ ବିରୋଧରେ ଅପରାଧିକ ମାମଲା ଚାଲିବ ବୋଲି ପ୍ରସିକ୍ୟୁଟର ଜେନେରାଲଙ୍କ ମୁଖପାତ୍ର ଅହମ୍ମଦ ତୋଫିକ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ବର୍ଷ ସେପ୍ଟେମ୍ବରରେ ଅନୁଷ୍ଠିତ ମାଳଦ୍ୱୀପ ରାଷ୍ଟ୍ରପତି ନିର୍ବାଚନରେ ବିରୋଧୀ ଦଳ ପ୍ରାର୍ଥୀ ଇବ୍ରାହିମ୍ ମହମ୍ମଦ ସୋଲିହ ବିଜୟୀ ହୋଇଥିଲେ । ନିର୍ବାଚନ ଫଳାଫଳ ଅନୁସାରେ ୟାମିନଙ୍କୁ ୪୧.୭ ପ୍ରତିଶତ ଭୋଟ୍ ମିଳିଥିବା ବେଳେ ଇବ୍ରାହିମଙ୍କୁ ୫୮.୩ ପ୍ରତିଶତ ମିଳିଥିଲା । ଏହି ନିର୍ବାଚନରେ ପରାଜୟ ସହ ମାଳଦ୍ବୀପରେ ୟମିନଙ୍କ ଏକଛତ୍ରବାଦୀ ଶାସନର ଅନ୍ତ ଘଟିଥିଲା ।