ମୁକେଶ ଅମ୍ବାନୀଙ୍କ କମ୍ପାନି ନାମରେ ମୋଦି ସରକାର ଆଣିଲେ ୯୩୦୦ କୋଟିର ଗ୍ୟାସ ଚୋରି ଅଭିଯୋଗ, ମାମଲା ଦିଲ୍ଲୀ ହାଇକୋର୍ଟରେ

ନୂଆଦିଲ୍ଲୀ: ଗୋଟିଏ ପଟେ କଂଗ୍ରେସ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ରିଲାଏନ୍ସ ଇଣ୍ଡଷ୍ଟ୍ରିଜ୍‌ର ଅଧ୍ୟକ୍ଷ ମୁକେଶ ଅମ୍ବାନିଙ୍କ ସୁଂସପର୍କ ରହିଥିବା କଥା ଚର୍ଚ୍ଚା ହେଉଥିବା ବେଳେ ଅନ୍ୟ ପଟେ ମୋଦିଙ୍କ ନେତୃତ୍ୱାଧୀନ କେନ୍ଦ୍ର ସରକାର ରିଲାଏନ୍ସ ଇଣ୍ଡଷ୍ଟ୍ରିଜ ନାମରେ ଗ୍ୟାସ୍‌ ଚୋରି ଅଭିଯୋଗ ଆଣିଛନ୍ତି।

ରିଲାଏନ୍ସ ଉପରେ ବେଆଇନ ଭାବେ ୧, ୭୨୯ ବିଲିୟନ୍‌ ଡଲାର୍‌ ମୂଲ୍ୟର ଗ୍ୟାସ ଉତ୍ତୋଳନ କରିବା ଅଭିଯୋଗ ପ୍ରାକୃତିକ ଗ୍ୟାସ ଓ ତୈଳ ମନ୍ତ୍ରାଳୟ ଆଣିଛି। ଦିଲ୍ଲୀ ହାଇକୋର୍ଟ ଶୁକ୍ରବାର ଏ ନେଇ ରିଲାଏନ୍ସ, ଇଂଲଣ୍ଡର ବିପି ପିଏଲ୍‌ସି ଏବଂ କାନାଡାର ନିକୋ ରିସୋର୍ସେସ୍‌କୁ ଜବାବ ତଲବ କରିଛନ୍ତି।

କେନ୍ଦ୍ର ସରକାରଙ୍କ ପକ୍ଷରୁ ଆଟର୍ଣ୍ଣ ଜେନେରାଲ୍‌ କେ. ଭେନୁଗୋପାଲ୍‌ କହିଛନ୍ତି କି ରିଲାଏନ୍ସ ଅସତ୍‌ ଉପାୟର ଅର୍ଥ ଉପାର୍ଜନ କରିଛି। ଅଣଆଧିକାରିକ ଭାବେ ସରକାରୀ ଉଦ୍ୟୋଗର ତୈଳକୂପରୁ ଗ୍ୟାସ ଉତ୍ତୋଳନ କରିଛି। ଏହା ଏକ ଜାଲିଆତି ଓ ଅପରାଧିକ ମାମଲା।

ତୈଳ ମନ୍ତ୍ରାଳୟ ୨୦୧୬ ନଭେମ୍ବରରେ ରିଲାଏନ୍ସ ଓ ଏହାର ଅନ୍ୟ ଦୁଇ ସହଯୋଗୀ କମ୍ପାନି ଉପରେ ୯୩୦୦ କୋଟି ଟଙ୍କାର କ୍ଷତିପୂରଣ ଦାବି କରି ମାମଲା ଦାୟର କରିଥିଲା। ସରକାରୀ ଉଦ୍ୟୋଗ ଓଏନ୍‌ଜିସି ତୈଳକୂପରୁ ରିଲାଏନ୍ସ ଦୀର୍ଘ ୭ ବର୍ଷ ଧରି ବିନାନୁମତିରେ ଗ୍ୟାସ୍‌ ଉତ୍ତୋଳନ କରିଛି। ଏହି ତୈଳକୂପଟି ରିଲାଏନ୍ସର ତୈଳକୂପ ନିକଟରେ ରହିଥିବାରୁ ଏପରି କାର୍ଯ୍ୟ କରିଚାଲିଛି ରିଲାଏନ୍ସ।

ସମ୍ବନ୍ଧିତ ଖବର