ବୀର ସାବରକରଙ୍କୁ ଭାରତ ରତ୍ନ ପ୍ରତିଶ୍ରୁତି ନେଇ ବିବାଦ : କଂଗ୍ରେସର ଜୋର୍‌ଦାର ବିରୋଧ

ନୂଆଦିଲ୍ଲୀ: ବିଜେପି ଆଜି ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ଏହାର ଇସ୍ତାହାର ପ୍ରକାଶ କରିଥିବା ବେଳେ ଏଥିରେ ବୀର ସାବରକରଙ୍କୁ ଭାରତରତ୍ନ ଦିଆଯିବ ବୋଲି ପ୍ରତିଶ୍ରୁତି ଦେଇଛି। ବିଜେପିର ଏହି ପ୍ରତିଶ୍ରୁତିକୁ ନେଇ ଆଜି ବଡ଼ ଧରଣର ବିବାଦ ସୃଷ୍ଟି ହୋଇଛି। ବିରୋଧୀ ଦଳ କଂଗ୍ରେସ ଆଜି ବିଜେପିର ନିଷ୍ପତ୍ତିକୁ ଜୋର୍‌ଦାର ବିରୋଧ କରିଛି। ଜାତିର ଜନକ ମହାତ୍ମା ଗାନ୍ଧୀଙ୍କ ୧୫୦ତମ ଜୟନ୍ତୀ ଉତ୍ସବରେ ସରକାର ଯଦି ଏଭଳି ବିଚାର କରିଥିବେ ତେବେ ଭଗବାନ ହିଁ ଏହି ଦେଶକୁ ରକ୍ଷା କରିବେ ବୋଲି କଂଗ୍ରେସ ମୁଖପାତ୍ର ମନୀଶ ତିୱାରୀ ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି। ଯେଉଁଠି ପରୀକ୍ଷାରେ ମହାତ୍ମା ଗାନ୍ଧୀଙ୍କ ଆତ୍ମହତ୍ୟା ନେଇ ପ୍ରଶ୍ନ କରାଯାଉଛି ‌ସେଠି ସବୁକିଛି ସମ୍ଭବ ବୋଲି ତିୱାରୀ କହିଛନ୍ତି। ସାବରକର ମହାତ୍ମା ଗାନ୍ଧୀଙ୍କ ହତ୍ୟା ମାମଲାରେ ଅପରାଧିକ ବିଚାର ସାମ୍ନା କରିଥିଲେ ଏବଂ ପରେ ତାଙ୍କୁ ଦୋଷମୁକ୍ତ କରାଯାଇଥିଲା। କଂଗ୍ରେସ ମୁଖପାତ୍ର କହିଛନ୍ତି ଯେ ସାବରକର ଏବଂ ତାଙ୍କ ଗୋଷ୍ଠୀ ମହାତ୍ମା ଗାନ୍ଧୀଙ୍କୁ ହତ୍ୟା ମାମଲାରେ ଷଡ଼ଯନ୍ତ୍ର କରିଥିଲେ । ଏକଥା କପୁର କମିସନ୍‌ ତଥ୍ୟା ଆଧାରରେ ଜଣାପଡ଼ିଥିଲା ବୋଲି ଏକ ରିପୋର୍ଟରେ କୁହାଯାଇଥିଲା। ଯଦି ଏହି କଥା ସତ ହୋଇଥାଏ, ତେବେ ସରକାର ଏ ଦିଗରେ ଗମ୍ଭୀର ଭାବେ ଚିନ୍ତା କରିବା ଉଚିତ୍‌। ମହାତ୍ମାଗାନ୍ଧୀଙ୍କ ଜୟନ୍ତୀ ଉତ୍ସବରେ ଯଦି ଏସଂକ୍ରାନ୍ତରେ କିଛି ନିଷ୍ପତ୍ତି ନିଆଯାଇଥାଏ ତେବେ ସରକାର ଏହାକୁ ବଦଳାଇବା ଉଚିତ ବୋଲି ସେ କହିଛନ୍ତି।