କାବୁଲରେ ଶିଖ୍ ଧାର୍ମିକ ସମାରୋହରେ ବନ୍ଧୁକଧାରୀଙ୍କ ଗୁଳିଚାଳନା, ୪ ମୃତ
କାବୁଲ (ଆଫଗାନିସ୍ତାନ): ବୁଧବାର ସକାଳେ କାବୁଲର ପୁରାତନ ସହରର କେନ୍ଦ୍ରସ୍ଥଳରେ ଥିବା ଆଫଗାନିସ୍ତାନ ଶିଖ୍ ସଂଖ୍ୟାଲଘୁ ସମ୍ପ୍ରଦାୟ ଉପାସନାସ୍ଥଳରେ ଚାଲିଥିବା ଏକ ଧାର୍ମିକ ସମାରୋହରେ ବନ୍ଧୁକଧାରୀମାନେ ଗୁଳି ଚଳାଇଛନ୍ତି । ଏଥିରେ ଅନ୍ୟୁନ ଚାରିଜଣ ବ୍ୟକ୍ତି ନିହତ ହୋଇଥିବା କଥା ଜଣେ ଶିଖ୍ ସାଂସଦ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଉକ୍ତ ଗୁରୁଦ୍ୱାର ମଧ୍ୟରେ ଥାଇ ଜଣେ ଉପାସକ ସହାୟତା ନିମନ୍ତେ ତାଙ୍କ ନିକଟକୁ ଫୋନ୍ କରିଥିବା କଥା ସାଂସଦ ନରିନ୍ଦ୍ର ସିଂହ ଖାଲସା କହିଛନ୍ତି । ଆକ୍ରମଣ ସମୟରେ ସେଠାରେ ପ୍ରାୟ ୧୫୦ଜଣ ଉପାସକ ଥିବା କଥା ସେ ସୂଚନା ଦେଇଛନ୍ତି ।
ଆଫଗାନିସ୍ତାନର ଗୃହ ମନ୍ତ୍ରାଳୟ କହିଛି ଯେ ବୁଧବାର ଆକ୍ରମଣ ସମୟରେ ପୁଲିସ ଘଟଣାସ୍ଥଳରେ ଥିବାରୁ ତୁରନ୍ତ ମୁକାବିଲା କରିଥିଲା । ଏବେ ମଧ୍ୟ ସେଠାରେ ଗୁଳି ବିନିମୟ ଚାଲିଛି ।
ଆଜି ସକାଳ ୭ : ୪୫ରେ (କାବୁଲ ସମୟ) ଆକ୍ରମଣକାରୀମାନେ ଶୋର୍ ବାଜାରରେ ଥିବା “ଧରମଶାଳା’ରେ ଆକ୍ରମଣ କରିଥିଲେ । ଗୃହ ମନ୍ତ୍ରାଳୟର ମୁଖପାତ୍ର ତାରିକ ଅରିଆନ୍ କହିଛନ୍ତି ଯେ ଧରମଶାଳା ମଧ୍ୟରେ ଆତ୍ମଘାତୀ ବୋମା ବିସ୍ଫୋରଣକାରୀମାନେ ପ୍ରବେଶ କରି ନିରାପତ୍ତା ବଳଙ୍କ ସହ ଲଢ଼େଇ କରିଥିଲେ । ଘଟଣାସ୍ଥଳକୁ ଅଧିକ ନିରାପତ୍ତା ବଳଙ୍କୁ ପଠାଯାଇଛି । ଉପାସନା ସ୍ଥଳର ପ୍ରଥମ ମହଲାକୁ ଖାଲି କରାଯାଇ ଗୁଡ଼ାଏ ଲୋକଙ୍କୁ ଉଦ୍ଧାର କରାଯାଇଛି । ସେମାନେ ଉକ୍ତ ଗୃହରେ ଅଟକି ରହିଯାଇଥିଲେ । ଅନ୍ୟମାନଙ୍କୁ ଉଦ୍ଧାର କରିବାକୁ ଉଦ୍ୟମ ଚାଲିଛି ।
ଏକଦା କାବୁଲର ଶୋର ବାଜାରରେ କେତେଗୁଡ଼ାଏ ଗୁରୁଦ୍ୱାର ଥିଲା କିନ୍ତୁ, ୧୯୮୦ ଦଶକରେ ହୋଇଥିବା ଲଢ଼େଇ ସମୟରେ ସେସବୁକୁ ଧ୍ୱଂସ କରାଯାଇଥିଲା ।