ସେନା ପାଇଁ ସରକାରଙ୍କ ପାଖରେ ପାଣ୍ଠି ନାହିଁ ! ପରିସ୍ଥିତି ଏମିତି ଯେ ସେନା କର୍ମଚାରୀଙ୍କୁ କିଣିବାକୁ ପଡ଼ିପାରେ ନିଜ ୟୁନିଫର୍ମ
ନୂଆଦିଲ୍ଲୀ : ଆମ ଦେଶରେ ନେତା ଓ ଅଫିସରମାନେ ନିଜ ନିଜର ଦରମା ବଢାଇବାକୁ ସବୁ ମତଭେଦ ଭୁଲି ଏକାଠି ହୋଇଯାଉଛନ୍ତି । ସେହିପରି ବର୍ଷକୁ ଲକ୍ଷ ଲକ୍ଷ ଟଙ୍କା ରୋଜଗାର କରୁଥିବା ଅନେକ ଲୋକ ସରକାରଙ୍କୁ ଟିକସ କିପରି ଫାଙ୍କିହେବ ସେହି ମୌକାରେ ରହୁଛନ୍ତି । କିନ୍ତୁ ଦେଶର ସୁରକ୍ଷା କରୁଥିବା ଆମ ସେନା ପାଇଁ ପାଣ୍ଠି ଅଭାବ ପଡୁଛି । ଦିନକୁ ଦିନ ସେନାର ଏହି ଆର୍ଥିକ ସମସ୍ୟା ଉତ୍କଟ ହେଲାଣି । ପାଣ୍ଠି ଅଭାବରୁ ସେନା କର୍ମଚାରୀଙ୍କୁ ନିଜ ପୋଷାକ ବଜାରରୁ କିଣିବା ଭଳି ସ୍ଥିତି ଆସିଛି ବୋଲି ରିପୋର୍ଟ ପ୍ରକାଶ ପାଇଛି। ଏହା ନିଶ୍ଚିତ ଭାବେ ଉଦବେଗଜନକ।
Sambad is now on WhatsApp
Join and get latest news updates delivered to you via WhatsApp
ଚୀନ ଓ ପାକିସ୍ତାନ ପଟୁ ଭାରତକୁ ବିପଦର ଆଶଙ୍କା ବଢିଚାଲିଥିବାବେଳେ ଭାରତୀୟ ସେନା ପାଇଁ ପାଣ୍ଠି ନିଅଣ୍ଟ ହେବା ବିଶେଷଜ୍ଞ ମହଲରେ ଚିନ୍ତା ସୃଷ୍ଟି ହୋଇଛି । ପରିସ୍ଥିତି ଏପରି ହୋଇଛି ଯେ ଯୁଦ୍ଧ ଲାଗିଲେ ଭାରତୀୟ ସେନା ପାଖରେ ଯେତିକି ଗୋଳାବାରୁଦ ରହିଛି ତାହା ମାତ୍ର ୧୦ ଦିନ ମଧ୍ୟ ଯିବ ନାହିଁ । ଏହାକୁ ଦୃଷ୍ଟିରେ ରଖି ସରକାର କେତେକ କଠୋର ପଦକ୍ଷେପ ଉଠାଇବାକୁ ବିଚାର କରୁଛନ୍ତି । ଏହି ଯୋଜନା ଅନୁଯାୟୀ ଯୁଦ୍ଧ ପରିସ୍ଥିତିରେ ଭାରତୀୟ ସେନା ପାଖରେ ଅସ୍ତ୍ରଶସ୍ତ୍ର, ଗୋଳାବାରୁଦ ଓ ଅନ୍ୟାନ୍ୟ ସାଜସରଞ୍ଜାମ ଯେପକି ଅଭାବ ନ ପଡେ ସେଥିପାଇଁ ସେଗୁଡିକୁ ଗଚ୍ଛିତ କରି ରଖାଯିବ । ଏଥିପାଇଁ ପାଣ୍ଠି ସଂଗ୍ରହ କରିବାକୁ ସେନାକୁ ଅର୍ଡିନାନ୍ସ ଫାକ୍ଟ୍ରି ( ସରକାରୀ ଗୋଳାବାରୁଦ, ସାଜସରଞ୍ଜାମ ଓ ପୋଷାକ କାରଖାନାରୁ) ଯୋଗାଣ କମ କରାଯିବ । ପୂର୍ବରୁ ସେନାର ଆବଶ୍ୟକତାର ୯୪ ପ୍ରତିଶତ ଏସବୁ କାରଖାନାରୁ ଆସୁଥିବାବେଳେ ସରକାର ଏହାକୁ ୫୦ ପ୍ରତିଶତକୁ କମାଇବାକୁ ଯୋଜନା କରୁଛନ୍ତି ।
ଏହା ଫଳରେ ସେନା କର୍ମଚାରୀଙ୍କ ନିତିଦିନିଆ ସାମଗ୍ରୀ ଏପରିକି ପୋଷକ ଆଦି କିଣିବାକୁ ମଧ୍ୟ ଖୋଲା ବଜାର ଉପରେ ନିର୍ଭର କରିବାକୁ ପଡିବ । ଜରୁରୀକାଳୀନ ପରିସ୍ଥିତିରେ ସେନା ପାଇଁ ଗୋଳାବାରୁଦ ମହଜୁଦ ରଖିବାକୁ ସେନା ପ୍ରାୟ ୨୧,୭୩୯ କୋଟିର ପାଣ୍ଠି ଆବଶ୍ୟକ କରୁଛି । ଇତି ମଧ୍ୟରେ ଗୋଳାବାରୁଦ କିଣିବା ପାଇଁ ସେନା ୫ ହଜାର କୋଟି ବ୍ୟୟ କରିସାରିଲାଣି ଓ ଆଉ ୬୭୩୯ କୋଟିର ସାମଗ୍ରୀ ଆସିଥିବାବେଳେ ସେଥିପାଇଁ ଅର୍ଥ ପୈଠ କରାଯିବ ।