ରୋଗମୁକ୍ତ ହେଲେ ଏଚ୍ଆଇଭି ପୀଡ଼ିତ, ଏହି ପ୍ରକ୍ରିୟା ଦ୍ୱାରା ହୋଇ ପାରିଲା ସମ୍ଭବ
ନୂଆଦିଲ୍ଲୀ : ଏଡ୍ସ ରୋଗକୁ ଦୂରାରୋଗ୍ୟ ବୋଲି ଲୋକେ ଭାବିବା ସହ ଏହି ରୋଗ ହେଲେ ମୃତ୍ୟୁ ସୁନିଶ୍ଚିତ ବୋଲି ଲୋକେ ଭାବିଥାନ୍ତି । କିନ୍ତୁ ଏବେ ଏହି ରୋଗର ଚିକିତ୍ସା ଖୋଜୁଥିବା ଅନୁସନ୍ଧାନକାରୀଙ୍କ ପାଇଁ ଏକ ଖୁସି ଖବର ଆସିଛି । ଲଣ୍ଡନରେ ଜଣେ ଏଡ୍ସ ରୋଗୀଙ୍କ ଶରୀରରେ ଷ୍ଟେମ୍ ସେଲ୍ ପ୍ରତିରୋପଣ କରାଯାଇ ପୀଡ଼ିତଙ୍କୁ ଏଚ୍ଆଇଭି ସଂକ୍ରମଣରୁ ମୁକ୍ତ କରାଯାଇ ପାରିଥିବା ଜଣା ପଡ଼ିଛି । ଏ ଘଟଣା ଦ୍ୱିତୀୟ ଥର ପାଇଁ ଘଟିଥିବା ବେଳେ ଏହା ପୂର୍ବରୁ ବର୍ଲିନ୍ରେ ଷ୍ଟେମ୍ ସେଲ୍ ପ୍ରତିରୋପଣ କରାଯାଇ ଏଚ୍ଆଇଭି ପୀଡ଼ିତଙ୍କ ଜୀବନ ବଞ୍ଚା ଯାଇ ପାରିଥିଲା ।
Sambad is now on WhatsApp
Join and get latest news updates delivered to you via WhatsApp
୧୦ବର୍ଷ ତଳେ ବର୍ଲିନ୍ରେ ଏଚ୍ଆଇଭି ପୀଡ଼ିତଙ୍କ ଶରୀରରେ ସଫଳ ଷ୍ଟେମ୍ ସେଲ୍ ପ୍ରତିରୋପଣ କରାଯାଇଥିବା ବେଳେ ଏବେ ଲଣ୍ଡନରେ ଏହି ପ୍ରତିରୋପଣ ସଫଳ ହେବା ଅନୁସନ୍ଧାନକାରୀଙ୍କ ପାଇଁ ଖୁସି ଖବର । ଲଣ୍ଡନରେ ପ୍ରତିରୋପଣର ୧୯ମାସ ପରେ ମଧ୍ୟ ପୀଡ଼ିତଙ୍କ ଶରୀରରେ ଏଚ୍ଆଇଭିର କୌଣସି ସଙ୍କେତ ଦେଖା ଯାଇ ନ ଥିବା ଜଣା ପଡ଼ିଛି । ଷ୍ଟେମ୍ ସେଲ୍ ପ୍ରତିରୋପଣ କରାଯାଇଥିବା ଦୁଇ ଏଚ୍ଆଇଭି ପୀଡ଼ିତ ରକ୍ତ କର୍କଟରେ ପୀଡ଼ିତ ଥିଲେ । ଦୁହିଁଙ୍କର ଅସ୍ତି ମଜ୍ଜା ପ୍ରତିରୋପଣ କରାଯିବା ପରେ ଷ୍ଟେମ୍ ସେଲ୍ ପ୍ରତିରୋପଣ କରାଯାଇଥିଲା । ଯାହା ଏଚ୍ଆଇଭି ଭାଇରାସକୁ ବଢ଼ିବାକୁ ପ୍ରତିରୋଧ କରିଥିଲା । ଏହି ପ୍ରତିରୋପଣ ପରେ ଦୁଇ ଜଣ ଯୁବକ ସମ୍ପୁର୍ଣ୍ଣ ସୁସ୍ଥ ଥିବା ଜଣା ପଡ଼ିଛି ।