ତିନି ଦିନିଆ ଭାରତ ଭ୍ରମଣରେ ଜାମ୍ବିଆ ରାଷ୍ଟ୍ରପତି, ବେଦାନ୍ତକୁ ନେଇ ହୋଇନପାରେ ଆଲୋଚନା
ନୂଆଦିଲ୍ଲୀ: ଜାମ୍ବିଆ ରାଷ୍ଟ୍ରପତି ଏଡ଼ଗର ଲୁଙ୍ଗୁ ତିନିଦିନିଆ ଭାରତ ଗସ୍ତରେ ଆସିଛନ୍ତି | ଆଜି ତାଙ୍କୁ ରାଷ୍ଟ୍ରପତି ଭବନରେ ସ୍ୱାଗତ କରାଯାଇଥିବାବେଳେ ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଉପସ୍ଥିତ ଥିଲେ | ଏହାପରେ ଲୁଙ୍ଗୁ ରାଜଘାଟ ଯାଇ ଜାତିର ପିତା ମହାତ୍ମା ଗାନ୍ଧୀଙ୍କ ସମାଧି ଉପରେ ଶ୍ରଦ୍ଧାଞ୍ଜଳି ଦେଇଥିଲେ | ରାଷ୍ଟ୍ରପତି ରାମନାଥ କୋବିନ୍ଦଙ୍କ ନିମନ୍ତ୍ରଣକୁ ରକ୍ଷା କରି ସେ ଭାରତ ଭ୍ରମଣରେ ଆସିଛନ୍ତି | ଏଠାରେ ସୂଚନା ଥାଉ କି କୋବିନ୍ଦ ଏପ୍ରିଲ ମାସରେ ଜାମ୍ବିଆ ଗସ୍ତରେ ଯାଇଥିଲେ ଓ ଲୁଙ୍ଗୁଙ୍କୁ ଭାରତ ଆସିବାକୁ ନିମନ୍ତ୍ରଣ କରିଥିଲେ | ତେବେ ଲୁଙ୍ଗୁଙ୍କ ଗସ୍ତକୁ ନେଇ ବେଦାନ୍ତ କମ୍ପାନୀ ବିବାଦୀୟ ପ୍ରସଙ୍ଗ ସୃଷ୍ଟି କରିଛି |
Sambad is now on WhatsApp
Join and get latest news updates delivered to you via WhatsApp
ବେଦାନ୍ତ ପକ୍ଷରୁ କୁହାଯାଇଥିଲା ଯେ ଜାମ୍ବିଆରେ ଥିବା ବିବାଦୀୟ କଂକୋଲା ତମ୍ବା ଖଣିକୁ ନେଇ ରାଷ୍ଟ୍ରପତିଙ୍କ ସହ ଆଲୋଚନା କରାଯିବ | କିନ୍ତୁ ଜାମ୍ବିଆ ଦୂତାବାସ ପକ୍ଷରୁ କୁହାଯାଇଛି ଯେ ରାଷ୍ଟ୍ରପତି ଏହି ବିବାଦୀୟ ଖଣି ପ୍ରସଙ୍ଗରେ କୌଣସି ଆଲୋଚନା କରିବେ ନାହିଁ | ରାଷ୍ଟ୍ରପତି ଓ ତାଙ୍କ ପ୍ରତିନିଧି ମଣ୍ଡଳ ବେଦାନ୍ତ ଅଧ୍ୟକ୍ଷ ଅନିଲ ଅଗ୍ରୱାଲଙ୍କ ସହ କୌଣସି ବୈଠକ କରିବେ ନାହିଁ ବୋଲି ଜାମ୍ବିଆ ପକ୍ଷରୁ ରୋକଠୋକ କୁହାଯାଇଛି |
ଏଠାରେ ସୂଚନା ଥାଉ କି କଂକୋଲା ତମ୍ବା ଖଣି ପାଇଁ ଅଧିକାରୀ ନିଯୁକ୍ତିକୁ ନେଇ ବେଦାନ୍ତ ଓ ଜାମ୍ବିଆ ସରକାରଙ୍କ ମଧ୍ୟରେ ବିବାଦ ସୃଷ୍ଟି ହୋଇଛି | ଜାମ୍ବିଆ ପକ୍ଷରୁ ଅଭିଯୋଗ କରାଯାଇଛି ଯେ ଏହି ନିଯୁକ୍ତିକୁ ନେଇ ବେଦାନ୍ତ ନିଜର ସର୍ତ୍ତକୁ ଉଲ୍ଲଙ୍ଘନ କରିଛି | କିନ୍ତୁ ବେଦାନ୍ତ ପକ୍ଷରୁ ଏହାକୁ ଖଣ୍ଡନ କରାଯାଇଛି |