ଜାତିସଂଘ ରିପୋର୍ଟକୁ ବିରୋଧ
କଶ୍ମୀରରେ ମାନବାଧିକାର ଉଲ୍ଲଂଘନ ଅଭିଯୋଗ
ଶ୍ରୀନଗର: କଶ୍ମୀରରେ ମାନବାଧିକାର ଉଲ୍ଲଂଘନ ନେଇ ପ୍ରଥମ ଥର ପାଇଁ ଜାତିସଂଘ ଆଜି ରିପୋର୍ଟ ଜାରି କରିଛି। ଏଥିରେ କୁହାଯାଇଛି ଯେ ଉଭୟ ରାଷ୍ଟ୍ରର ନିୟନ୍ତ୍ରଣରେ ଥିବା କଶ୍ମୀରରେ ବ୍ୟାପକ ମାନବାଧିକାର ଉଲ୍ଲଂଘନ ହୋଇଛି ଏବଂ ଏଥିପାଇଁ ସରକାର ଏବଂ ସେନା ଦାୟୀ। କଶ୍ମୀରରେ ଭାରତ ମଧ୍ୟ ଲଗାତାର ମାନବାଧିକାର ଉଲ୍ଲଂଘନ କରିଚାଲିଛି ବୋଲି ଜାତିସଂଘ ରିପୋର୍ଟରେ କୁହାଯିବା ପରେ ଭାରତ ଏନେଇ କଡ଼ା ପ୍ରତିକ୍ରିୟା ପ୍ରକାଶ କରିଛି। ଜାତିସଂଘ ରିପୋର୍ଟକୁ ପ୍ରତ୍ୟାଖ୍ୟାନ କରି ବିଦେଶ ମନ୍ତ୍ରାଳୟ କହିଛି ଯେ କଶ୍ମୀର ମାମଲାରେ ଜାତିସଂଘ ଏକ ଭିତ୍ତିହୀନ, ଅତିରଂଜିତ ଏବଂ ମିଥ୍ୟା ଆଧାରିତ ରିପୋର୍ଟ ପ୍ରସ୍ତୁତ କରିଛି ଯାହାକି ଏହି ଅନୁଷ୍ଠାନର ଗରିମାକୁ ନଷ୍ଟ କରୁଛି । ସମଗ୍ର କଶ୍ମୀର ଭାରତର ଅବିଚ୍ଛେଦ୍ୟ ଅଙ୍ଗ ବୋଲି ଭାରତ ସର୍ବଦା ସ୍ପଷ୍ଟ କରି ଆସିଛି । ଏହା ସତ୍ତ୍ୱେ ବିଶ୍ୱ ସମୁଦାୟରେ ବିଭ୍ରାନ୍ତି ସୃଷ୍ଟି କରିବା ପାଇଁ ଅପଚେଷ୍ଟା ଚାଲିଛି । ଭାରତର ଏକ ଅଂଚଳକୁ ପାକିସ୍ତାନ ନିଜ କବ୍୍ଜାରେ ରଖି ନିଜର ବୋଲି ଦାବି କରୁଥିବା ବେଳେ ଏହି ମାମଲାରେ ନିରବ ରହିଥିବା ଜାତିସଂଘ ମାନାବାଧିକାର ପ୍ରସଙ୍ଗରେ ବିଭ୍ରାନ୍ତି ସୃଷ୍ଟି କରିବା ପଛରେ କି ଉଦ୍ଦେଶ୍ୟ ରହିଛି, ତାହା ସ୍ପଷ୍ଟ ହେବା ଆବଶ୍ୟକ ବୋଲି ଭାରତ କହିଛି।
Sambad is now on WhatsApp
Join and get latest news updates delivered to you via WhatsApp
ଜାତିସଂଘ ରିପୋର୍ଟ ଭାରତର ସାର୍ବଭୌମତ୍ୱ ଏବଂ ଭୌଗଳିକ ଅଖଣ୍ଡତାର ଉଲ୍ଲଂଘନ କରୁଥିବାରୁ ଜାତିସଂଘ ଏ ବାବଦରେ ଗୁରୁତ୍ୱର ଚିନ୍ତା କରି ପଦକ୍ଷେପ ନେବା ଆବଶ୍ୟକ ବୋଲି ଭାରତ ଜଣାଇ ଦେଇଛି। ଗୁରୁବାର ଜାତିସଂଘ ପକ୍ଷରୁ କଶ୍ମୀରରେ ମାନାବାଧିକାର ସ୍ଥିତି ନେଇ ଜାରି ଏକ ରିପୋର୍ଟରେ କୁହାଯାଇଥିଲା ଯେ ଜମ୍ମୁ କଶ୍ମୀର ଏବଂ ପାକିସ୍ତାନ ଅଧିକୃତ କଶ୍ମୀରରେ ବ୍ୟାପକ ମାନବାଧିକାର ଉଲ୍ଲଂଘନ ହୋଇଛି । ସେନା ଓ ସରକାର ଲୋକଙ୍କ ଉପରେ ଜୁଲମ କରୁଥିବା ଏଥିରେ ଦର୍ଶାଯାଇଛି। ଜାତିସଂଘ ଏହି ମାନବାଧିକାର ଉଲ୍ଲଂଘନ ମାମଲାରେ ଅନ୍ତର୍ଜାତୀୟ ତଦନ୍ତ ପାଇଁ ମଧ୍ୟ ଗୁରୁତ୍ୱାରୋପ କରିଛି। ତେବେ ଏଭଳି ରିପୋର୍ଟ ଜାରି କରାଯିବା ପଛରେ ଜାତିସଂଘର କୌଣସି ମନ୍ଦ ଉଦ୍ଦେଶ୍ୟ ରହିଥିବା ସ୍ପଷ୍ଟ ଜଣାପଡ଼ିଯାଉଛି ବୋଲି ଭାରତ କହିଛି। ଭାରତ ବିରୋଧରେ ଏଭଳି ବିଭ୍ରାନ୍ତିକର ତଥ୍ୟ ପରିବେଷଣକୁ କଦାପି ଗ୍ରହଣ କରାଯିବ ନାହିଁ ବୋଲି ସରକାର ଜାତିସଂଘକୁ ସତର୍କ କରିଛନ୍ତି ।