ରାଜସ୍ଥାନ ସରକାରଙ୍କ ଅଭିନବ ପ୍ରୟାସ: ଅଭାବକୁ ଦୂର କରିବ ପାଇଁ ମଦ କାରଖାନାରେ ତିଆରି ହେବ ସାନିଟାଇଜର

ଜୟପୁର: ରାଜ୍ୟ ଏବେ ମାରାତ୍ମକ ରୋଗ କରୋନା ଭାଇରସ ସହ ଲଢେଇ କରୁଥିବାରୁ ରାଜସ୍ଥାନରେ ଥିବା ସାତଟି ଜିଲ୍ଲାର ନଅଟି ମଦ କାରଖାନାକୁ ସାନିଟାଇଜର ଉତ୍ପାଦନ ପାଇଁ ବ୍ୟବହୃତ କରାଯିବ ବୋଲି ଜଣା ପଡିଛି | ପରିସ୍ଥିତିର ମୁକାବିଲା ପାଇଁ ରାଜସ୍ଥାନ ସରକାର ଏଭଳି ନିଆରା ପଦକ୍ଷେପ ନେଇଛନ୍ତି, ଯାହାକୁ ନେଇ ଚାରିଆଡେ ଚର୍ଚ୍ଚା ଆରମ୍ଭ ହୋଇଛି | କରୋନା ପଜିଟିଭ ରୋଗୀଙ୍କ ସଂଖ୍ୟା ବୃଦ୍ଧି ଏବଂ ରାଜ୍ୟରେ ସାନିଟାଇଜରର ଅଭାବକୁ ଦୃଷ୍ଟିରେ ରଖି ଗେହଲୋଟ୍ ସରକାର ନିଜେ ସାନିଟାଇଜର୍ ତିଆରି କରିବା ପାଇଁ ଆଗେଇ ଆସିଛନ୍ତି।

ଏହାକୁ ସଫଳ କରିବା ପାଇଁ ସରକାର ରାଷ୍ଟ୍ରାୟତ୍ତ ଗଙ୍ଗାନଗର ସୁଗାର ମିଲ୍ସର ସମସ୍ତ ୫ଟି ଉତ୍ପାଦନ ୟୁନିଟ୍ ସହିତ ୪ଟି ବେସରକାରୀ କମ୍ପାନିକୁ ନିର୍ଦ୍ଦେଶ ଦେଇଛନ୍ତି। ଏହି ଉଦ୍ଦେଶ୍ୟରେ ସମସ୍ତଙ୍କୁ ଲାଇସେନ୍ସ ପ୍ରଦାନ କରାଯାଇଛି। ଅର୍ଥ ବିଭାଗ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶ ଅନୁଯାୟୀ, ରାଜସ୍ଥାନ ରାଜ୍ୟ ଗଙ୍ଗାନଗର ଚିନି ମିଲର ପାଞ୍ଚଟି ମଦ ଉତ୍ପାଦନ ୟୁନିଟ୍ ଝୋଟୱାରା (ଜୟପୁର), ମାଣ୍ଡୋର (ଯୋଧପୁର), କୋଟା, ଉଦୟପୁର ଏବଂ ହନୁମାନଗଡରେ ହ୍ୟାଣ୍ଡ ସାନିଟାଇଜର ଉତ୍ପାଦନ ଆରମ୍ଭ କରିବାକୁ ନିର୍ଦ୍ଦେଶ ଦିଆଯାଇଛି। ଏହା ବ୍ୟତୀତ ଅଲୱାର ଏବଂ ଜୟପୁର ଜିଲ୍ଲାର ଚାରିଟି ଘରୋଇ କମ୍ପାନି ସାନିଟାଇଜର ଉତ୍ପାଦନ ପାଇଁ ଲାଇସେନ୍ସ ମଧ୍ୟ ଦିଆଯାଇଛି।

ସୂଚନା ଅନୁଯାୟୀ, ଏହି ୟୁନିଟ୍ ଗୁଡିକରେ ନିର୍ମିତ ସାନିଟାଇଜରଗୁଡିକ ସରକାରୀ କାର୍ଯ୍ୟାଳୟ, ପୁଲିସ ଏବଂ ଅନ୍ୟାନ୍ୟ ସେବାରେ ନିୟୋଜିତ ସରକାରୀ କର୍ମଚାରୀଙ୍କୁ ମାଗଣାରେ ଉପଲବ୍ଧ କରାଯିବ। ଏଥିସହ ଜନସାଧାରଣଙ୍କୁ ସ୍ବଳ୍ପ ମୂଲ୍ୟରେ କିମ୍ବା ରିହାତି ଦରରେ ସାନିଟାଇଜର ଯୋଗାଇ ଦିଆଯିବ | ବଜାରରେ ସାନିଟାଇଜରର ଅଭାବକୁ ଦୂର କରି କଳାବଜାରିକୁ ରୋକିବା ପାଇଁ ଏହି ପଦକ୍ଷେପ ନିଆଯାଇଛି। ଲକ ଡାଉନ ସମୟରେ ସମଗ୍ର ରାଜ୍ୟରେ ସାନିଟାଇଜର, ମାସ୍କ ଏବଂ ଅନ୍ୟାନ୍ୟ ଜରୁରୀ ଜିନିଷର ବହୁତ ଆବଶ୍ୟକତା ରହିଛି | ଜୟପୁର, ଗୁଜୁରାଟ, ଦିଲ୍ଲୀ ଏବଂ ଅନ୍ୟାନ୍ୟ ସ୍ଥାନରୁ ସାନିଟାଇଜର ଅର୍ଡ଼ର କରାଯାଉଛି | କିନ୍ତୁ ଅଭାବ ହେତୁ ଠିକ ସମୟରେ ଏସବୁକୁ ଯୋଗାଇ ଦିଆଯାଇପାରୁନାହିଁ। ଏଭଳି ପରିସ୍ଥିତିକୁ ଦେଖି ସୋମବାର ନିଜେ ଯାଞ୍ଚ ପରେ ମେଡିକାଲ୍ ବିଭାଗର ଡ୍ରଗ୍ କଣ୍ଟ୍ରୋଲର୍ ଏବଂ ତାଙ୍କ ଟିମ୍ ଲାଇସେନ୍ସ ପ୍ରକ୍ରିୟା ଆରମ୍ଭ କରିଥିଲେ।