ଉତ୍ତରାଖଣ୍ଡ ରେସିଡେନ୍ସିଆଲ ୟୁନିଭର୍ସିଟିର ଗବେଷଣା :ଏବେ ମଦ ପିଇ ଡ୍ରାଇଭିଂ ସିଟରେ ବସିଲେ ଗାଡ଼ିର ଷ୍ଟାର୍ଟ ବନ୍ଦ ହୋଇଯିବ
ଉତ୍ତରାଖଣ୍ଡ : ମଦ ପିଇ ଗାଡ଼ି ଚଳାଇବା ହେଉଛି ଏକ ବଡ଼ ସମସ୍ୟା । ଦେଶରେ ଅଧାରୁ ଅଧିକ ଦୁର୍ଘଟଣା ଏହି କାରଣରୁ ହୋଇଥାଏ । ଏ ନେଇ ଅନେକ ଆଇନ ପ୍ରଣୟନ କରାଯାଇ ସାରିଥିଲେ ମଧ୍ୟ ଏହି ସମସ୍ୟା ଏବେ ମଧ୍ୟ ଦେଖା ଦେଉଛି । ଗାଡ଼ି ଚଲାଇବା ସମୟରେ ନିଶା ସେବନ ବା ଫୋନରେ କଥା ହେବା ଦ୍ୱାରା ଅନ୍ୟମନସ୍କ ହୋଇ ଲୋକେ ଦୁର୍ଘଟଣାର ଶିକାର ହେଉଛନ୍ତି । ଏହି ସବୁ ସମସ୍ୟାକୁ ଆଖି ଆଗରେ ରଖି ଅଲ୍ମୋରାରେ ଥିବା ଉତ୍ତରାଖଣ୍ଡ ରେସିଡ଼େନ୍ସିଆଲ ୟୁନିଭର୍ସିଟି ଏହାର ସମାଧାନର ବାଟ ବାହାର କରିଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଏହି ବିଶ୍ୱବିଦ୍ୟାଳୟ ଆର୍ଆଇ ଇନ୍ଷ୍ଟମେଣ୍ଟ ଏବଂ ଇନୋଭେସନ ଇଣ୍ଡିଆ ସହ ମିଶି ଏକ ଯନ୍ତ୍ର ପ୍ରସ୍ତୁତ କରିଛି ଯାହା ଏହି ଭଳି ଦୁର୍ଘଟଣାରୁ ଳୋକମାନଙ୍କୁ ରକ୍ଷା କରିବ । ଯଦି ଚାଳକ ନିଶାରେ ଅଛି,ନିଦରେ ଅଛି ବା ଫୋନରେ କଥା ହେଉଛି ତେବେ କାର୍ଟି ଷ୍ଟାର୍ଟ ହେବ ନାହିଁ । ଗବେଷକମାନେ ଗ୍ରାଫିନ୍ ଲେପିତ ଇଲେକ୍ଟ୍ରୋଡ଼୍ର ପ୍ରୋଟୋଟାଇପ୍ ତିଆରି କରିଛନ୍ତି ଯାହା ଇଥାଇଲ ଆଲ୍କହଲକୁ ଏସିଟିକ୍ ଏସିଡ଼୍ରେ ପରିଣତ କରୁଛି । ଏହାକୁ କାର୍ଯ୍ୟକାରୀ କରିବା ପାଇଁ କାର୍ରେ ଏକ ଗ୍ରାଫିନ୍ ସେନ୍ସର୍ ରଖାଯିବ । ଚାଳକ ଗାଡ଼ି ଚଲାଇବା ପୂର୍ବରୁ ଏହି ସେନ୍ସର୍ରେ ଫୁଙ୍କିବା ପରେ ଚାଳକଟି କେତେ ନିଶାଗ୍ରସ୍ତ ତାହା ଜଣା ପଡ଼ିଯିବ । ଯଦି ଚାଳକଟି ମୋଟର ଯାନ ଅଧିନିୟମ ଅନୁଯାୟୀ ଧାର୍ଯ୍ୟ କରାଯାଇଥିବା ସୀମାଠାରୁ ଅଧିକ ନିଶାଗ୍ରସ୍ତ ବୋଲି ଜଣାପଡ଼େ ତେବେ ଗାଡ଼ି କେବେ ହେଲେ ଷ୍ଟାର୍ଟ ହେବ ନାହିଁ ।
ଏହା ସହ ଯଦି ଜଣେ ଚାଳକକୁ ନିଦ ଆସୁଛି ତେବେ ସେ ଗାଡ଼ିରେ ଯାତ୍ରା କରୁଥିବା ଯାତ୍ରୀମାନେ ମଧ୍ୟ ଏହା ଜାଣି ପାରିବେ । ଚାଳକଙ୍କ ଆଖିର ଗତିକୁ ଦେଖି ଚାଳକ ଜଣଙ୍କ ନିଦରେ ଗାଡ଼ି ଚଳାଉଛି ବୋଲି ସେନ୍ସର୍ ଜାଣି ପାରିବା ସହ ଗାଡ଼ିଟି ବନ୍ଦ ହୋଇଯିବ । ଏଥିରେ ଜିପିଆର୍ଏସ୍-ଜିପିଏସ୍ର ସୁବିଧା ଉପଲବ୍ଧ ରହିଛି । ଯଦି କେବେ ଗାଡ଼ିଟି ଦୁର୍ଘଟଣାଗ୍ରସ୍ତ ହେଉଛି ତେବେ ୧୦ମିନିଟ୍ ମଧ୍ୟରେ ଆପେ ଆପେ ୧୦୦ନମ୍ବର ଡ଼ାଏଲ ହେବା ସହ ପୁଲିସ ଷ୍ଟେସନକୁ ଏସ୍ଓଏସ୍ ମଧ୍ୟ ଚାଲିଯିବ ।