କମୁଛି ମାଓବାଦୀ ହିଂସା, ପ୍ରଭାବିତ ଜିଲ୍ଲା ତାଲିକାରୁ ହଟିଲା ୪୪ ଟି ଜିଲ୍ଲା
ନୂଆଦିଲ୍ଲୀ : ବିଗତ ଚାରି ବର୍ଷ ମଧ୍ୟରେ ବାମପନ୍ଥୀ ଉଗ୍ରବାଦ ହ୍ରାସ ପାଇଛି । ହିଂସାକାଣ୍ଡ ୨୦% ହ୍ରାସ ପାଇଛି । ସେହିପରି ୨୦୧୩ ମସିହା ତୁଳନାରେ ୨୦୧୭ରେ ହିଂସାଜନିତ ମୃତ୍ୟୁ ସଂଖ୍ୟା ୩୪% ହ୍ରାସ ପାଇଛି । ବାମପନ୍ଥୀ ହିଂସା ପ୍ରଭାବିତ ଜିଲ୍ଲାର ସଂଖ୍ୟା ୨୦୧୩ରେ ୭୬ ଥିବା ବେଳେ ୨୦୧୭ରେ ହ୍ରାସ ପାଇ ୫୮ ହୋଇଛି । ଏଥିରୁ କେବଳ ୩୦ ଜିଲ୍ଲାରେ ହେଉଥିବା ହିଂସା ହିଁ ଦେଶର ମୋଟ ବାମପନ୍ଥୀ ହିଂସାର ୯୦% । ଏଥିସହ କେତେକ ନୂତନ ଜିଲ୍ଲାରେ ମଧ୍ୟ ବାମପନ୍ଥୀ ଉଗ୍ରବାଦ ମୁଣ୍ଡ ଟେକି ଥିବାର ଲକ୍ଷ୍ୟ କରାଯାଇଛି ବୋଲି ସ୍ୱରାଷ୍ଟ୍ର ମନ୍ତ୍ରାଳୟ ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ନିକଟରେ ସ୍ୱରାଷ୍ଟ୍ର ମନ୍ତ୍ରାଳୟ ଦ୍ୱାରା ଏସଆରଇ ଜିଲ୍ଲା ଗୁଡ଼ିକରେ ବାମପନ୍ଥୀ ଉଗ୍ରବାଦ ସ୍ଥିତିର ରାଜ୍ୟ ସରକାରମାନଙ୍କ ସହ ଆଲୋଚନା କରି ତର୍ଜମା କରାଯାଇଥିଲା । ଯଦ୍ୱାରାକି ପରିବର୍ତ୍ତିତ ଚିତ୍ରରେ ସୁରକ୍ଷା ବାହିନୀଙ୍କୁ ସମତୁଲ ଭାବେ ମୁତୟନ କରାଯାଇପାରିବ । ତର୍ଜମା ପରେ ୪୪ଟି ଜିଲ୍ଲାକୁ ଏସଆରଇ ତାଲିକାରୁ ବାଦ୍ ଦିଆଯାଇଥିବା ବେଳେ ଅଧିକ ୮ଟି ଜିଲ୍ଲାକୁ ଏହି ତାଲିକାରେ ସାମିଲ କରାଯାଇଛି ।
କେରଳ, କର୍ଣ୍ଣାଟକ ଏବଂ ତାମିଲନାଡ଼ୁ ତିନିଟି ରାଜ୍ୟର ସଙ୍ଗମ ସ୍ଥଳରେ ମାଓବାଦୀଙ୍କ ପ୍ରଭାବ ବୃଦ୍ଧିକୁ ରୋକିବାକୁ କେରଳର ତିନିଟି ଜିଲ୍ଲାକୁ ନୂତନ ଭାବେ ଏସଆରଇ ତାଲିକାରେ ଅନ୍ତର୍ଭୁକ୍ତ କରାଯାଇଛି । ଏହି ତିନିଟି ଜିଲ୍ଲାରେ ଏ ପର୍ଯ୍ୟନ୍ତ କୌଣସି ହିଂସା ହୋଇ ନଥିଲେ ମଧ୍ୟ ଆଗୁଆ ପ୍ରତିଷେଧକ ବ୍ୟବସ୍ଥା ସ୍ୱରୂପ ଏଭଳି ପଦକ୍ଷେପ ନିଆଯାଇଛି । ତର୍ଜମା ସ୍ୱରୂପ ୧୨୬ଟି ଜିଲ୍ଲା ପରିବର୍ତ୍ତେ ୧୧ଟି ରାଜ୍ୟର ୯୦ଟି ଜିଲ୍ଲା ଏବେ ଏସଆରଇ ଜିଲ୍ଲା ଭାବେ ଉପକୃତ ହେବେ । ସେହିପରି ସର୍ବାଧିକ ମାଓବାଦୀ ପ୍ରଭାବିତ ଜିଲ୍ଲାର ସଂଖ୍ୟା ୩୬ରୁ ହ୍ରାସ ପାଇ ୩୦ ରହିବ । ବର୍ତ୍ତମାନ ମାଓବାଦୀ ହିଂସାର ବାସ୍ତବ ଚିତ୍ରକୁ ନେଇ ଏପରି ନିଷ୍ପତ୍ତି ହୋଇଛି ।