ଆତଙ୍କବାଦୀ ସଂଗଠନ ଲସ୍କର-ଇ-ତଏବାର ଅର୍ଥରେ ହରିୟାଣାରେ ନିର୍ମିତ ହୋଇଛି ମସ୍ଜିଦ୍; ୩ ଗିରଫ
ଗୁରୁଗ୍ରାମ: କୁଖ୍ୟାତ ଆତଙ୍କବାଦୀ ସଂଗଠନ ଲସ୍କର- ଇ- ତଏବାର ଅର୍ଥରେ ହରିୟାଣାର ପଲଓ୍ଵାଲ ଜିଲ୍ଲାରେ ଏକ ମସଜିଦ୍ ନିର୍ମାଣ ହୋଇଥିବା ନେଇ ଜଣା ପଡ଼ିବା ପରେ ଏହାକୁ କେନ୍ଦ୍ର କରି ଏବେ ଦେଶବ୍ୟାପି ଚର୍ଚ୍ଚା ଓ ଚାଞ୍ଚଲ୍ୟ ସୃଷ୍ଟି ହୋଇଛି। ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଏହି ଘଟଣାର ତଦନ୍ତ ଆରମ୍ଭ କରିବା ସହ ସଂପୃକ୍ତ ମସଜିଦ୍ର ଇମାମ୍ ମହମ୍ମଦ ସଲମାନ୍, ଅହମ୍ମଦ ସଲିମ୍ ଓ ସାଜାଦ୍ ଅବ୍ଦୁଲ୍ ଓ୍ଵାନି ନାମକ ତିନି ଜଣ ବ୍ୟକ୍ତିଙ୍କୁ ରାଜଧାନୀ ଦିଲ୍ଲୀରୁ ଗିରଫ କରିବା ସହ ଏସଂପର୍କରେ ଅଧିକ ତଦନ୍ତ ଆରମ୍ଭ କରିଛି।
Sambad is now on WhatsApp
Join and get latest news updates delivered to you via WhatsApp
ଏଥିସହ ଆତଙ୍କବାଦୀ ସଂଗଠନ ଲସ୍କର- ଇ- ତଏବାର ଅର୍ଥରେ ହରିୟାଣାର ପଲଓ୍ଵାଲ ଜିଲ୍ଲାର ଉତ୍ତାଓ୍ଵାର ଗ୍ରାମରେ ନିର୍ମିତ ଖୁଲାଫା-ଇ- ରସିଦ୍ଦିନ୍ ନାମକ ମସଜିଦ୍ରେ ବ୍ୟାପକ ତଲାସୀ ଚଳାଇ ଏଠାରୁ ବହୁ ଆପତ୍ତିଜନକ କାଗଜପତ୍ର ଜବତ କରିବା ସହ ଏହାକୁ ସିଲ୍ କରି ଦେଇଛି। ଏହି ମସ୍ଜିଦ୍ ନିର୍ମାଣ ପାଇଁ ଅନ୍ୟତମ କୁଖ୍ୟାତ ଆତଙ୍କବାଦୀ ହାଫିଜ୍ ସୟିଦ୍ର ସଂଗଠନ ଜମାତ୍- ଉଦ୍- ଦାଓ୍ଵା ଜରିଆରେ ଲସ୍କର- ଇ- ତଏବା ୭୦ ଲକ୍ଷରୁ ଅଧିକ ପରିମାଣର ଅର୍ଥ ବ୍ୟୟ କରିଥିବା ଏନ୍ଆଇଏ ପ୍ରଥମିକ ତଦନ୍ତରୁ ଜାଣିବାକୁ ପାଇଛି।