୨୦୨୦ ମାର୍ଚ୍ଚ ସୁଦ୍ଧା ଜଗୁଆଳି ବିହୀନ ଲେବଲ କ୍ରସିଂଗୁଡ଼ିକୁ ସଂପୂର୍ଣ୍ଣ ଉଠାଇଦିଆଯିବ
ନୂଆଦିଲ୍ଲୀ : ଉତ୍ତରପ୍ରଦେଶର କୁଶୀନଗରଠାରେ ଗତକାଲି ହୋଇଥିବା ରେଳଗାଡି ଧକ୍କାରେ ସ୍କୁଲପିଲା ନିହତ ହେବା ଘଟଣା ପରେ ରେଳବାଇ ପକ୍ଷରୁ ଏକ ଜରୁରୀ ବୈଠକ କରି ସ୍ଥିତିର ସମୀକ୍ଷା କରାଯାଇଛି । ଆସନ୍ତା ୨୦୨୦ ମାର୍ଚ୍ଚ ୩୧ ସୁଦ୍ଧା ଦେଶରେ ଜଗୁଆଳୀ ବିହୀନ ଲେବଲ କ୍ରସିଂ ଗୁଡ଼ିକୁ ସଂପୂର୍ଣ୍ଣ ଉଠାଇଦେବାକୁ ରେଳବାଇ ଯୋଜନା କରିଛି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ରେଳ ଓ କୋଇଲା ମନ୍ତ୍ରୀ ପିୟୁଷ ଗୋୟଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ରେଲୱେ ବୋର୍ଡ ଚେୟାରମ୍ୟାନ୍, ରେଲୱେର ମୁଖ୍ୟ ନିରାପତ୍ତା କମିଶନର, ୫ଟି ରେଲୱେ ଜୋନର ଜିଏମ୍ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଶ୍ରୀ ଗୋଏଲ ଯଥାଶୀଘ୍ର ଦେଶରେ ସମସ୍ତ ମାନବ ବିହୀନ ଲେଭଲ କ୍ରସିଂଗୁଡ଼ିକର ଉଚ୍ଛେଦ ପାଇଁ ନିର୍ଦ୍ଦେଶ ଦେଇଛନ୍ତି । ଏବେ ୮୦% ଟ୍ରାଫିକ୍ ଥିବା କ, ଖ, ଗ ରୁଟରେ ଆଉ ମାତ୍ର ୫୮ଟି ମାନବ ବିହୀନ ଲେଭଲ କ୍ରସିଂ ରହିଛି ।
ମାନବ ବିହୀନ ଲେଭଲ କ୍ରସିଂ ଗୁଡ଼ିକରେ ଦୁର୍ଘଟଣା ରୋକିବାକୁ ରେଳବାଇ ଅନେକ ଗୁଡ଼ିଏ ପଦକ୍ଷେପ ନେଇପାରିଛି । ଗତ ଚାରି ବର୍ଷ ମଧ୍ୟରେ ଦୁର୍ଘଟଣା ୭୯% ହ୍ରାସ ପାଇଛି । ୨୦୧୩-୧୪ ରେ ୪୭ଟି ଦୁର୍ଘଟଣା ହୋଇଥିବା ବେଳେ ୨୦୧୭-୧୮ ରେ ୧୦ଟି ଦୁର୍ଘଟଣା ହୋଇଛି । ବିଗତ ଚାରି ବର୍ଷ ମଧ୍ୟରେ ମାନବ ବିହୀନ ଲେଭଲ କ୍ରସିଂ ଉଚ୍ଛେଦର ହାର ହାରାହାରି ଦୁଇ ତୃତୀୟାଂଶ ବୃଦ୍ଧି ପାଇଛି । ବ୍ରଡ ଗେଜ୍ ନେଟୱର୍କରେ ଏବେ ମାତ୍ର ୩୪୭୯ ଟି ମାନବ ବିହୀନ ଲେଭଲ କ୍ରସିଂ ରହିଛି ।