ପ୍ରତି ୮ ଘଣ୍ଟାରେ ଜଣେ ପ୍ରବାସୀ ଭାରତୀୟ ମହିଳା ସ୍ୱାମୀ ନିର୍ଯାତନାର ଶିକାର ହୋଇ ସାହାଯ୍ୟ ଲାଗି ଫୋନ୍ କରନ୍ତି
ବାଙ୍ଗାଲୁରୁ: ଅନେକ ପିତା-ମାତା ନିଜ ଝିଅ ଲାଗି ବିଦେଶରେ ରହୁଥିବା ବରପାତ୍ର ପ୍ରତି ଅଧିକ ଆଗ୍ରହ ପ୍ରକାଶ କରନ୍ତି । ବିଦେଶରେ ରହିଲେ ଝିଅ ଆରାମରେ ରହିବା ସହ ବିତ୍ତଶାଳୀ ହେବ ବୋଲି ସେମାନଙ୍କର ଧାରଣା ରହିଥିଲା । କିନ୍ତୁ ବାସ୍ତବତା ଭିନ୍ନ ବୋଲି ଏକ ଅନୁଧ୍ୟାନରୁ ଜଣାପଡ଼ିଛି । ପ୍ରବାସୀ ଭାରତୀୟ ପୁରୁଷଙ୍କୁ ବିବାହ କରିଥିବା ମହିଳାଙ୍କ ମଧ୍ୟରୁ ପ୍ରତି ୮ ଘଣ୍ଟାରେ ଜଣେ ସ୍ୱଦେଶକୁ ଫେରିବା ଲାଗି ସାହାଯ୍ୟ ମାଗିଥାଆନ୍ତି । ସେମାନେ ସ୍ୱାମୀଙ୍କ ଦ୍ୱାରା ଶାରୀରିକ ନିର୍ଯାତନା କିମ୍ବା ଦୁର୍ବ୍ୟବହାରରର ଶିକାର ହୋଇ ଏପରି ନିଷ୍ପତ୍ତି ନେବାକୁ ବାଧ୍ୟ ହୋଇଥାଆନ୍ତି ।
Sambad is now on WhatsApp
Join and get latest news updates delivered to you via WhatsApp
ବିଦେଶ ମନ୍ତ୍ରାଳୟ ପକ୍ଷରୁ ମିଳିଥିବା ସୂଚନା ଅନୁସାରେ ୨୦୧୫ ମସିହା ଜାନୁଆରି ପହିଲାରୁ ୨୦୧୭ ମସିହା ନଭେମ୍ବର ୩୦ ତାରିଖ ମଧ୍ୟରେ ନିର୍ଯ୍ୟାତିତ ମହିଳାଙ୍କଠାରୁ ମନ୍ତ୍ରାଳୟ ଏଭଳି ୩,୩୨୮ ଟି ଅଭିଯୋଗ ପାଇଛନ୍ତି । ହାରାହାରି ମନ୍ତ୍ରାଳୟ ପାଖକୁ ଦୈନିକ ଏଭଳି ୩ ଟି ଫୋନ୍ କଲ୍ ଆସୁଥିବା ଜଣାପଡ଼ିଛି । ଯାହା ସ୍ପଷ୍ଟ କରୁଛି କି ପ୍ରତି ୮ ଘଣ୍ଟାରେ ଜଣେ ପ୍ରବାସୀ ମହିଳା ନିର୍ଯାତନାର ଶିକାର ହୋଇ ସାହାଯ୍ୟ ପ୍ରାର୍ଥୀ ହୁଅନ୍ତି।
ଅନ୍ୟପକ୍ଷରେ ଏଭଳି ଅଭିଯୋଗ ଆଣିଥିବା ମହିଳା ମାନଙ୍କ ମଧ୍ୟରୁ ସଂଖ୍ୟାଧିକ ପଞ୍ଜାବ, ତେଲେଙ୍ଗାନା ଓ ଆନ୍ଧ୍ରପ୍ରଦେଶର ଅଧିବାସୀ ବୋଲି ଜଣାପଡ଼ିଛି। ଏହା ପଛକୁ ରହିଛି ଗୁଜୁରାଟି ମହିଳାଙ୍କ ସଂଖ୍ୟା । ଓ୍ଵାସିଂଟନ୍ ଡିସିରେ ଥିବା ଭାରତୀୟ ଦୂତାବାସରେ ଦୀର୍ଘ ୧୬ ବର୍ଷ ଧରି କମ୍ୟୁନିଟି ଡେଭେଲପମେଣ୍ଟ ଅଫିସର ଭାବେ କାର୍ଯ୍ୟରତ ଆରତୀ ରାଓ କହନ୍ତି, ଯେହେତୁ ଆନ୍ଧ୍ର ଓ ତେଲେଙ୍ଗନାରେ ଏବେ ବି ଯୌତୁକ ପ୍ରଥାର ପ୍ରଭାବ ଜୋରଦାର୍ ତେଣୁ ଯୌତୁକ ଆଶାରେ ପ୍ରବାସରେ ରହୁଥିବା ଯୁବକ ବାପା-ମାଆଙ୍କ କଥାରେ ବିବାହ କରନ୍ତି । ତା’ପରେ ସେମାନେ ବିଦେଶ ଯିବା ପରେ ବିଭିନ୍ନ ଆଳ ଦେଖାଇ ପତ୍ନୀକୁ ନିର୍ଯାତନା ଦେବା ଆରମ୍ଭ କରନ୍ତି । କେତେକ ସ୍ଥଳରେ ସେମାନେ ପତ୍ନୀଙ୍କୁ ବିଦା ମଧ୍ୟ କରିଦିଅନ୍ତି।
ଏଭଳି ବିଭିନ୍ନ କାରଣ ହେତୁ ପ୍ରବାସୀ ଭାରତୀୟଙ୍କ ଭିତରେ ପତ୍ନୀ ନିର୍ଯାତନା ସଂଖ୍ୟା ବଢ଼ିବାରେ ଲାଗିଛି ।