ନୂଆଦିଲ୍ଲୀ : କର୍ଣ୍ଣାଟକରେ ଏକକ ସଂଖ୍ୟା ଗରିଷ୍ଠତା ହାସଲ କରିଥିବା ଦଳକୁ ସରକାର ଗଠନ ପାଇଁ ରାଜ୍ୟପାଳ ଡାକିବା ପରେ ଏକ ନୂଆ ସମସ୍ୟାର ସମ୍ମୁଖୀନ ହୋଇଛି ବିଜେପି । ସମାନ ନିୟମ ଗୋଆ, ମଣିପୁର, ବିହାର ଓ ମେଘାଳୟରେ ପ୍ରୟୋଗ କରିବାକୁ କଂଗ୍ରେସ ଦାବି କରିଛି । ଏହା ଫଳରେ ବିଜେପି ନିଜର ପୂର୍ବ ଫର୍ମୁଲାରେ ନିଜେ ଫଶିଯାଇଛି । ବିହାରରେ ଆରଜେଡି ଏକକ ସଂଖ୍ୟାଗରିଷ୍ଠତା ହାସଲ କରିଥିବା ଦଳ ହୋଇଥିବାରୁ ରାଜ୍ୟପାଳ ସରକାର ଗଠନ ପାଇଁ ଡାକିବା କଥା ବୋଲି ଆରଜେଡି ନେତା ତେଜସ୍ୱୀ ଯାଦବ କହିଛନ୍ତି । ଏଥିପାଇଁ ସେ ଆସନ୍ତା କାଲି ବିହାର ରାଜ୍ୟପାଳ ସତ୍ୟାପାଲ ମଲିକଙ୍କୁ ଭେଟିବେ । ସେହିପରି ଗୋଆରେ କଂଗ୍ରେସ ପକ୍ଷରୁ କୁହାଯାଇଛି ଯେ ଦଳ ଏହି ରାଜ୍ୟର ବିଧାନସଭାରେ ଏକକ ସଂଖ୍ୟା ଗରିଷ୍ଠତା ପାଇଥିବାରୁ ଆସନ୍ତା କାଲି ରାଜ୍ୟପାଳ ମୃଦୁଳା ସିହ୍ନାଙ୍କୁ ଭେଟି ସରକାର ଗଠନ ପାଇଁ ଦାବି କରିବ । ଅନ୍ୟପକ୍ଷରେ ପୂର୍ବତନ ମଣିପୁର ମୁଖ୍ୟମନ୍ତ୍ରୀ ଓକ୍ରାମ ଇବୋବି ସିଂ ଓ ପୂର୍ବତନ ମେଘାଳୟ ମୁଖ୍ୟମନ୍ତ୍ରୀ ମୁକୁଲ ସାଙ୍ଗମା ମଧ୍ୟ ଆସନ୍ତା କାଲି ନିଜ ନିଜ ରାଜ୍ୟର ରାଜ୍ୟପାଳଙ୍କୁ ଭେଟି ସରକାର ଗଠନ ପାଇଁ ଦାବି କରିବେ ।
Sambad is now on WhatsApp
Join and get latest news updates delivered to you via WhatsApp
ରାହୁଲଙ୍କ ବିବାଦୀୟ ମନ୍ତବ୍ୟ
ଅନ୍ୟପକ୍ଷରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଆଜି ଦେଇଥିବା ଏକ ମନ୍ତବ୍ୟ ବିବାଦ ସୃଷ୍ଟି କରିଛି । ସେ କହିଛନ୍ତି ଏକ ଗଣତାନ୍ତ୍ରିକ ଦେଶରେ ଏପରି ଘଟଣା ପ୍ରଥମ ଥର ପାଇଁ ହେଉଛି । ଏପରି ଘଟଣା କେବଳ ପାକିସ୍ତାନ ଓ କେତେକ ଆଫ୍ରିକୀୟ ଏକଛତ୍ରବାଦୀ ଶାସନରେ ଦେଖିବାକୁ ମିଳିଥାଏ । କିନ୍ତୁ ସ୍ୱାଧୀନତାର ୭୦ ବର୍ଷ ପରେ ପ୍ରଥମ ଥର ପାଇଁ ଭାରତରେ ଏପରି ହୋଇଛି । ତେବେ ଏହି ବକ୍ତବ୍ୟ ପାଇଁ ତାଙ୍କୁ ବିଭିନ୍ନ ମହଲରୁ ସମାଲୋଚନା କରାଯାଇଛି ।