୨୦୦କୋଟି ଟଙ୍କାର ବିବାହରୁ ବାହାରିଥିବା ଅଳିଆକୁ ସଫା କରିବା ପାଇଁ ଖର୍ଚ୍ଚ ହେଲାଣି ୮ଲକ୍ଷ ଟଙ୍କା, ବାହାରିଲାଣି ୩୨୧କ୍ୱିଣ୍ଟାଲ ଅଳିଆ..
ଚମୋଲି : କିଛି ଦିନ ତଳେ ଉତ୍ତରାଖଣ୍ଡର ଚମୋଲି ଜିଲ୍ଲାରେ ଥିବା ଓଲିରେ ଏକ ୨୦୦କୋଟିର ବିବାହ ଅନୁଷ୍ଠିତ ହୋଇଥିଲା । ସାଉଥ ଆଫ୍ରିକାରେ ରହୁଥିବା ଗୁପ୍ତା ପରିବାର ଏଠାକୁ ଆସି ବିବାହର କାର୍ଯ୍ୟକ୍ରମ ଆୟୋଜନ କରିଥିବା ବେଳେ ଏହା ସମସ୍ତଙ୍କର ଦୃଷ୍ଟି ଆକର୍ଷଣ କରିଥିଲା । ତେବେ ୨୦୦କୋଟିର ବିବାହ ପୂର୍ବରୁ ଯେତିକି ଚର୍ଚ୍ଚାରେ ରହିଥିଲା, ପରେ ମଧ୍ୟ ସେତିକି ଚର୍ଚ୍ଚାରେ ରହିଛି । କିନ୍ତୁ କୌଣସି ଭଲ କାରଣ ପାଇଁ ନୁହେଁ । ବିବାହ ପରେ ସେଠାରୁ ୩୨୧କ୍ୱିଣ୍ଟାଲ ବର୍ଜ୍ୟବସ୍ତୁ (ଅଳିଆ) ବାହାରିବାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଜୋଶିମଠ ନଗରପାଳିକା ଦ୍ୱାରା ଏହି ସ୍ଥାନଟିକୁ ସଫା କରାଯାଉଥିବା ବେଳେ ଏ ପର୍ଯ୍ୟନ୍ତ ଏହି କାମରେ ୮ଲକ୍ଷ ଟଙ୍କା ଖର୍ଚ୍ଚ ହୋଇ ସାରିଲାଣି ।
Sambad is now on WhatsApp
Join and get latest news updates delivered to you via WhatsApp
ଜୋଶିମଠ ନଗରପାଳିକାର କାର୍ଯ୍ୟକାରୀ ଅଧିକାରୀ ଏସ୍ପି ନୌତିଆଲଙ୍କ କହିବା ଅନୁଯାୟୀ, ପାଖା ପାଖି .ସବୁ ବର୍ଜ୍ୟବସ୍ତୁ ସେଠାରୁ ଉଠା ଯାଇ ସାରିଥିବା ବେଳେ ସେ କାମ ପାଇଁ ୮ଲକ୍ଷ ଟଙ୍କା ଖର୍ଚ୍ଚ ହୋଇଛି । ବିବାହ ପରେ ସେଠାରୁ ୩୨୧କ୍ୱିଣ୍ଟାଲର ବର୍ଜ୍ୟବସ୍ତୁ ଉଠା ଯାଇଛି । ବିବାହ ପରେ ଗୁପ୍ତା ପରିବାର ବର୍ଜ୍ୟବସ୍ତୁକୁ ସେଭଳି ଫିଙ୍ଗି ଚାଲି ଯାଇଥିବାରୁ ତାଙ୍କ ଉପରେ ୨.୫ଲକ୍ଷ ଟଙ୍କାର ଜରିମାନା ଲଗା ଯାଇଛି । ଏହା ସହ ବର୍ଜ୍ୟବସ୍ତୁ ଉଠାଇଥିବାରୁ ନଗରପାଳିକାକୁ ଗୁପ୍ତା ପରିବାର ୫.୫୪ଲକ୍ଷ ଟଙ୍କା ଦେଇଥିବା କହିଛନ୍ତି ଏସ୍ପି ନୌତିଆଲ ।