ପୁଲୱାମା ହମଲା ପରେ ସପ୍ତାହେ ହେଲା ସୀମାରେ ଅଟକି ରହିଛି ଶହ ଶହ ଟ୍ରକ୍ : ଚିନ୍ତାରେ ପାକ୍ ବ୍ୟବସାୟୀ, କୋଟି କୋଟି ଟଙ୍କାର କ୍ଷତି ସହୁଛନ୍ତି
ପାକିସ୍ତାନରେ ଟମାଟୋ ଦର କିଲୋ ପିଛା ୧୮୦ ଟଙ୍କା ଛୁଇଁଲା
ନୂଆଦିଲ୍ଲୀ : ପୁଲୱାମା ହମଲା ପରେ ବଡ଼ ପରିଣାମ ଭୋଗୁଛି ପାକିସ୍ତାନ। ଭାରତର କଡ଼ା ଆଭିମୁଖ୍ୟ ଦେଖି ଛାନିଆ ହୋଇପଡ଼ିଲାଣି ପାକିସ୍ଥାନ। ଭାରତ ଏପର୍ଯ୍ୟନ୍ତ ପାକିସ୍ଥାନ ଉପରେ କୌଣସି ସାମରିକ କାର୍ଯ୍ୟାନୁଷ୍ଠାନ କରିନଥିଲେ ମଧ୍ୟ ଆକ୍ରମଣ ଆଶଙ୍କାରେ ହଜିଯାଇଛି ପାକିସ୍ଥାନର ନିଦ। ଜାମ୍ମୁ-କାଶ୍ମୀର ପୁଲୱାମା ଆତଙ୍କୀ ହମଲା ପରେ ପାକିସ୍ତାନକୁ ଅର୍ଥନୈତିକ ସ୍ତରରେ ଦୁର୍ବଳ କରିଦେବାକୁ ଏକ ବଡ ପଦକ୍ଷେପ ନେଇଛି ଭାରତ। ଫଳରେ ଭାରତ-ପାକିସ୍ତାନ ୱାଘା-ଅଟାରୀ ସୀମାରେ ଅଟକି ରହିଛି ଶହ ଶହ ପାକିସ୍ତାନୀ ଟ୍ରକ। ଭାରତକୁ ଆସିବାକୁ ଥିବା ସାମଗ୍ରୀମାନ ଗତ ସପ୍ତାହରୁ ଅପେକ୍ଷାରେ ଅଛି ।
Sambad is now on WhatsApp
Join and get latest news updates delivered to you via WhatsApp
ପାକିସ୍ତାନରୁ ଭାରତକୁ ଆମଦାନୀ ହେଉଥିବା ସବୁ ସାମଗ୍ରୀ ଉପରେ ଆମଦାନୀ ଶୁଳ୍କ ୨୦୦ ପ୍ରତିଶତ ବୃଦ୍ଧି କରିଦେବା ଫଳରେ ଏତେ ଟିକସ ଦେଇ ଭାରତ ମାଟିରେ ପାକିସ୍ତାନ ସାମଗ୍ରୀ ପହଂଚାଇବା ସେଠାକାର ବ୍ୟବସାୟୀଙ୍କ ପାଇଁ ଆଉ ସମ୍ଭବ ହେଉନାହିଁ । କରାଚି ବନ୍ଦରରେ ବି ଛିଡା ହୋଇ ରହିଛି ଟ୍ରକ ଭର୍ତି ସିମେଂଟ୍ । କୋଟି କୋଟି ଟଙ୍କାର କ୍ଷତି ସହୁଛନ୍ତି ସିମେଂଟ ବ୍ୟବସାୟୀ । ଭାରତ ସରକାରଙ୍କ ଏହି ନିଷ୍ପତି ଫଳରେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛନ୍ତି ତାଜା ଫଳ, ସିମେଂଟ ଓ ତୁଳା ବ୍ୟବସାୟୀ । ବର୍ଷ ବର୍ଷ ଧରି ଭାରତକୁ ଏସବୁ ସାମଗ୍ରୀ ପଠାଇ ମୁନାଫା କମାଉଥିବା ପାକିସ୍ତାନୀ ବ୍ୟବସାୟୀ ଏବେ ମୁଣ୍ଡରେ ହାତଦେଇ ବସିରହିଛନ୍ତି ।
ପାକିସ୍ତାନରୁ ପ୍ରକାଶ ପାଉଥିବା ଦୈନିକ ଖବରକାଗଜ ଡନ ନ୍ୟୁଜର ରିପୋର୍ଟ ଅନୁସାରେ, ଭାରତ ସରକାର ଆମଦାନୀ ଶୁଳ୍କ ୨୦୦ ପ୍ରତିଶତକୁ ବୃଦ୍ଧି କରିବାରେ ଭାରତୀୟ ବ୍ୟବସାୟୀ ପାକିସ୍ତାନୀ ପ୍ରତିପକ୍ଷଙ୍କୁ ସେମାନଙ୍କ ସିମେଂଟ କଂଟେନର ଫେରାଇ ନେବାକୁ କହିଥିଲେ । କରାଚି ବନ୍ଦରରେ ଛିଡା ହୋଇ ରହିଛି ପ୍ରାୟ ୬ଶହରୁ ୮ଶହ କଂଟେନର । କୁହାଯାଉଛି ମୋଦି ସରକାରଙ୍କ ପ୍ରଧାନମନ୍ତ୍ରୀ ଆବାସ ଯୋଜନା ଏବଂ କେରଳରେ ପୁନରୁଦ୍ଧାର କାମ ପାଇଁ ୫ହଜାର କୋଟିର ରିହାବିଲିଟେସନ୍ କାର୍ଯ୍ୟକ୍ରମ ପାଇଁ ପାକିସ୍ତାନରୁ ବହୁ ପରିମାଣରେ ସିମେଂଟ ଆସିବାର ଥିଲା । ହେଲେ ଆମଦାନୀ ଶୁଳ୍କ ବୃଦ୍ଧି ଫଳରେ ନିରାଶ ହୋଇଛନ୍ତି ପାକିସ୍ତାନୀ ସିମେଂଟ ବ୍ୟବସାୟୀ ।
ଅନ୍ତର୍ଜାତୀୟ ସ୍ତରରେ ପାକିସ୍ତାନକୁ ଏକ ଘରିକିିଆ କରିବାକୁ ପ୍ରଥମେ ମୋଷ୍ଟ ଫେବର୍ଡ ନେସନ୍ ବା ଅତି ବିଶ୍ୱସ୍ତ ରାଷ୍ଟ୍ରର ମାନ୍ୟତା ପ୍ରତ୍ୟାହାର କରିଥିଲା ଭାରତ । ଏହାପରେ ଆମଦାନୀ ଶୁଳ୍କ ବଢାଇ ଆର୍ଥିକ ସ୍ତରରେ ଦୁର୍ବଳ କରିଦେବାକୁ ନେଇଥିଲା ବଡ ପଦକ୍ଷେପ । ଯାହାର ପ୍ରଭାବ ପାକିସ୍ତାନରେ ଅନୁଭୂତ ହୋଇଛି ।
ଭାରତର ଏହି ନିଷ୍ପତି ପରେ ହଡବଡେଇ ଯାଇଛି ପାକିସ୍ତାନ । ସୀମାରେ ଭାରତକୁ ପ୍ରବେଶ ପାଇଁ ଅଟକି ରହିଛି ଟ୍ରକ ଟ୍ରକ ଛୁଆଁରା ବା ଏକପ୍ରକାର ଖାଦ୍ୟ ସାମଗ୍ରୀ । ହେଲେ ଆମଦାନୀ ଶୁଳ୍କରେ ଅହେତୁକ ବୃଦ୍ଧି ଯୋଗୁଁ ଏଗୁଡିକ ଭାରତ ମାଟିରେ ପ୍ରବେଶ କରିବା ସମ୍ଭବ ହେଉନାହିଁ । ସେପଟେ ପାକିସ୍ତାନରେ ଭୟାବହ ହେଉଛି ଦରଦାମ ବୃଦ୍ଧି । ଟମାଟୋ ପରି ଏକ ଅତ୍ୟାବଶ୍ୟକ ଖାଦ୍ୟ ସାମଗ୍ରୀର ଦର କିଲୋ ପିଛା ଛୁଇଁଛି ୧୮୦ ଟଙ୍କା । କାରଣ ପାକିସ୍ତାନକୁ ଟମାଟୋ ପଠାଇବାକୁ ରାଜି ହେଉନାହାନ୍ତି ଭାରତୀୟ ଚାଷୀ। ଯାହାଫଳରେ ଲାହୋରରେ ଟମାଟୋ ଛୁଇଁଛି ୧୮୦ ଟଙ୍କା ।