ନରେନ୍ଦ୍ର ମୋଦୀଙ୍କ ଉପରେ ଅସନ୍ତୁଷ୍ଟ ଅଛନ୍ତି ପିଏମ୍‌ଓ କର୍ମଚାରୀ, ସମୟ ପୂର୍ବରୁ ଅବସର ଏବଂ ବଦଳି ପାଇଁ କଲେ ଆବେଦନ

0

ନୂଆଦିଲ୍ଲୀ : ଦେଶରେ ନିର୍ବାଚନ ଆରମ୍ଭ ହୋଇ ସାରିଥିବା ବେଳେ ଦେଶର ପ୍ରଧାନମନ୍ତ୍ରୀ କିଏ ହେବ  ସେ ନେଇ ଜୋର ସୋରରେ ଚର୍ଚ୍ଚା ଆରମ୍ଭ ହୋଇଯାଇଛି । ମୋଦୀ ସରକାରଙ୍କୁ ଦେଶର ଜନତା ପସନ୍ଦ କରୁଥିବା ବେଳେ ଅନେକ ସର୍ଭେ ରିପୋର୍ଟରୁ ମୋଦୀ ଦ୍ୱିତୀୟ ଥର ପାଇଁ ପ୍ରଧାନମନ୍ତ୍ରୀ ହୋଇପାରନ୍ତି ବୋଲି ଜାଣିବାକୁ ମିଳିଛି । ତେବେ ଦେଶର ଜନତା ମୋଦୀଙ୍କ କାମକୁ ନେଇ ଖୁସି ଥିବା ବେଳେ ତାଙ୍କ ଅଫିସରେ କାମ କରୁଥିବା କର୍ମଚାରୀମାନେ ନରେନ୍ଦ୍ର ମୋଦୀଙ୍କ ଉପରେ ଖୁସି ନଥିବା ଜଣାପଡ଼ିଛି । ୫ବର୍ଷ ହେଲାଣି ମୋଦୀଙ୍କ ସହ କାମ କରି ଆସୁଥିବା କିଛି କର୍ମଚାରୀ ଅନ୍ୟ ବିଭାଗକୁ ବଦଳି ପାଇଁ ଆବେଦନ କରିଥିବା ବେଳେ କିଛି ସମୟ ପୂର୍ବରୁ ଅବସର ନେବା ପାଇଁ ଅନୁମତି ମାଗୁଥିବା ଜଣାପଡ଼ିଛି । ଏ ନେଇ ୮ଜଣ ପ୍ରଶାସନିକ ଅଧିକାରୀ ଆବେଦନ କରିଥିବା କଥା ସାମ୍ନାକୁ ଆସିଛି । ମୋଦୀଙ୍କ ଅଫିସର ୩ଜଣ ଅଧିକାରୀ ପରିଚୟ ନଦେଇ ଏ ନେଇ ସୂଚନା ଦେଇଛନ୍ତି । ସୂଚନା ଦେଇଥିବା ୩ଜଣଙ୍କ ମଧ୍ୟରୁ ଦୁଇ ଜଣ ମଧ୍ୟ ନିଜର ବଦଳି କରିବାକୁ ଚାହୁଁଥିବା କହିଛନ୍ତି ।

Moneycontrol

ସୂଚନା ମୁତାବକ, ପ୍ରଧାନମନ୍ତ୍ରୀ ମୋଦୀଙ୍କ ଅଫିସରେ ପାଖାପାଖି ୨୫ଜଣ ବରିଷ୍ଠ ପ୍ରଶାସନିକ କର୍ମଚାରୀ କାମ କରୁଛନ୍ତି । କିନ୍ତୁ ୫ବର୍ଷ ମଧ୍ୟରେ ସେମାନେ ନିଜ ପଦର ସଠିକ୍‌ ଭାବରେ ବ୍ୟବହାର କରି ପାରିନାହାନ୍ତି । କୌଣସି ବିଷୟକୁ ନେଇ ପ୍ରଶାସନିକ ଅଧିକାରୀଙ୍କୁ ତାଙ୍କ ମତ ମଗା ଯାଉନଥିବା ବେଳେ ମୋଦୀ ସବୁ ନିଷ୍ପତ୍ତି ନେଉଥିବାରୁ ସେମାନେ ବଦଳି ପାଇଁ ଚାହୁଁଥିବା ଜଣାପଡ଼ିଛି । କୌଣସି ସରକାରୀ ଯୋଜନା ବା ନୀତି ବିଷୟରେ ଆଲୋଚନା ହେବା ସମୟରେ ପ୍ରଶାସନିକ ଅଧିକାରୀଙ୍କ ମତାମତ ନ ମଗାଯାଇ ମୋଦୀ ଏବଂ ତାଙ୍କର କିଛି ମନ୍ତ୍ରୀ ନିଜ ଇଚ୍ଛାରେ କାମ କରିଥାନ୍ତି । ମୋଦୀଙ୍କ ଅଫିସରେ କାମ କରୁଥିଲେ ମଧ୍ୟ ମୋଦୀ କୌଣସି ପ୍ରଶାସନିକ କର୍ମଚାରୀଙ୍କ ସହ ସାମାନ୍ୟ ସଂପର୍କ ମଧ୍ୟ ରଖି ନଥିବା ଜଣାପଡ଼ିଛି । ଏ ସବୁକୁ ଆଖି ଆଗରେ ରଖି ୮ଜଣ ପ୍ରଶାସନିକ ଅଧିକାରୀ ବଦଳି ପାଇଁ ଏବଂ କିଛି ସମୟ ପୂର୍ବରୁ ଅବସର ନେବା ପାଇଁ ଆବେଦନ କରିଛନ୍ତି ।

ସମ୍ବନ୍ଧିତ ଖବର

Leave A Reply

Your email address will not be published.