ନ୍ୟାୟ ଯୋଜନାର ପାଣ୍ଠି କେଉଁଠାରୁ ଆସିବ? ରାହୁଲ୍ କହିଲେ, ନିରବ ମୋଦି,ଅନିଲ ଅମ୍ବାନୀ,ମେହୁଲ୍ ଚୋକସି ଓ ବିଜୟ ମାଲ୍ୟାଙ୍କଠାରୁ ଟଙ୍କା ଆଣି ଗରିବଙ୍କୁ ଦେବୁ
ମୁମ୍ବାଇ: ଲୋକସଭା ନିର୍ବାଚନରେ ବିଜୟ ହାସଲ କରିବା ପାଇଁ ଯୁବା ଭୋଟରଙ୍କ ଉପରେ ସମସ୍ତଙ୍କ ନଜର ରହିଛି । କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଶୁକ୍ରବାର ମହାରାଷ୍ଟ୍ର ପୁନେରେ ଛାତ୍ରଙ୍କ ସହ ସିଧାସଳଖ କଥାବାର୍ତ୍ତା ହୋଇଥିଲେ । ଏହି ସମୟରେ ଅନେକ ଛାତ୍ର ରାହୁଲଙ୍କୁ ପ୍ରଶ୍ନ କରିଥିଲେ । ଜଣେ ଛାତ୍ର ରାହୁଲଙ୍କୁୁ ପ୍ରଶ୍ନ ପଚାରିଥିଲେ ଯେ ନ୍ୟାୟ ଯୋଜନାର ପାଣ୍ଠି କେଉଁଠାରୁ ଆସିବ?
Sambad is now on WhatsApp
Join and get latest news updates delivered to you via WhatsApp
ଏହାର ଉତ୍ତରରେ ସେ କହିଥିଲେ ଆମେ ନିରବ ମୋଦି,ଅନିଲ ଅମ୍ବାନୀ,ମେହୁଲ୍ ଚୋକସି ତଥା ବିଜୟ ମାଲ୍ୟାଙ୍କଠାରୁ ଟଙ୍କା ନେଇ ଗରିବଙ୍କୁ ଦେବୁ । ଜଣେ ଛାତ୍ର ରାହୁଲଙ୍କୁ ପ୍ରଶ୍ନ କରିଥିଲେ ଯେ ଆପଣ ୨୦ ପ୍ରତିଶତ ଗରିବଙ୍କୁ ୭୨ ହଜାର ଟଙ୍କା ବାର୍ଷିକ ଦେବାକୁ ପ୍ରତିଶ୍ରୁତି ଦେଇଥିଲେ। ରାହୁଲଙ୍କ କହିବାନୁସାର ସେ କୌଣସି ମଧ୍ୟବିତ୍ତ ପରିବାରର ଟ୍ୟାକ୍ସ ବଢାଇବେ ନାହିଁ । ରାହୁଲ କହୁଛନ୍ତି ଆମେ ସଂପୂର୍ଣ୍ଣ ହିସାବ ଲଗାଇ ସାରିଛୁୁ ଯେ ଟଙ୍କା କେଉଁଠାରୁ ଆସିବ ଏବଂ କିଭଳି ଭାବରେ ବଣ୍ଟାଯିବ । ପ୍ରଥମେ ପାଏଲଟ୍ ପ୍ରୋଜେକ୍ଟ ହେବ ଏବଂ ଏହା ପରେ ସମ୍ପୂର୍ଣ୍ଣ ଦେଶରେ ଲାଗୁ କରାଯିବ ।
ରୋଜଗାର ଉପରେ ସେ କହିଥିଲେ ଆଜି ଆମ ଦେଶରେ ୨୭ ହଜାର ଚାକିରି ପ୍ରତି ୨୪ ଘଣ୍ଟାରେ ଚାଲିଯାଉଛି । ଅନ୍ୟପକ୍ଷରେ ଚୀନ୍ ଲଗାତାର ନିଜ ଦେଶରେ ରୋଜଗାର ପ୍ରସ୍ତୁତ କରୁଛି । ଭାରତରେ ଦକ୍ଷତାକୁ ପ୍ରୋତ୍ସାହନ ଦିଆଯାଏ ନାହିଁ । ଛାତ୍ରଙ୍କ ସହ କଥାବାର୍ତ୍ତା କରି ରାହୁଲ କହିଥିଲେ, ବିମୁଦ୍ରୀକରଣ ଏବଂ ଜିଏସଟି ଭଳି ନିଷ୍ପତ୍ତିରେ ଦେଶର ଅର୍ଥବ୍ୟବସ୍ଥାକୁ ବହୁତ ବଡ ଝଟକା ଲାଗିଛି । ଆମେ ଅର୍ଥବ୍ୟବସ୍ଥାକୁ ଉନ୍ନତ କରିବାକୁ ଚେଷ୍ଟା କରିବୁ ।