ନୂଆଦିଲ୍ଲୀ : ଭାରତୀୟ ସେନା ଗତ ୨୦୧୬ରେ କରିଥିବା ସର୍ଜିକାଲ ଷ୍ଟ୍ରାଇକ କଥା ବିଶ୍ୱବ୍ୟାପୀ ସମସ୍ତେ ଜାଣିଛନ୍ତି । ଭାରତୀୟ ସେନାର ଏହି ବୀରତ୍ୱକୁ ଦେଶବାସୀ ସଲାମ କରିଥିଲେ । କିନ୍ତୁ ଏହା ମଧ୍ୟ ଆମକୁ ମାନିବାକୁ ହେବ ସବୁବେଳେ ପରଦାପଛରେ ରହି ଅନେକ ସଂସ୍ଥା ଭାରତର ସୁରକ୍ଷା ପାଇଁ ରାତିଦିନ ଉଦ୍ୟମ କରିଚାଲିଛନ୍ତି । ଆମର ଗୁଇନ୍ଦା ସଂସ୍ଥା ର ଏବଂ ଆଇବି ଏପରି ଅନେକ ଗୋପନୀୟ ଅଭିଯାନ କରୁଛନ୍ତି । ଗତ ବର୍ଷ ହୋଇଥିବା ଏପରି ଏକ ଅତି ଗୋପନ ଅଭିଯାନ ସଂପର୍କରେ ନିକଟରେ ଏକ ଇଂରାଜୀ ଖବରକାଗଜରେ ରିପୋର୍ଟ ପ୍ରକାଶ ପାଇଛି । ରିପୋର୍ଟରେ କୁହାଯାଇଛି ଯେ ଗତ ବର୍ଷ ସେପ୍ଟେମ୍ବରରେ ଭାରତର ମୁଖ୍ୟ ଗୁଇନ୍ଦା ସଂସ୍ଥା ର’ ଏକ ଦୁଃସାହସିକ ମାତ୍ର ଅତି ଗୋପନ ଅପରେସନ କରିଥିଲା । ଏହି ଅପରେସନରେ ର’ର ଜଣେ ଏଜେଣ୍ଟ ବିଶ୍ୱର କୁଖ୍ୟାତ ଆତଙ୍କବାଦୀ ସଂଗଠନ ଆଇଏସର ସଂଗଠନ ଭିତରେ ପଶି ସେମାନଙ୍କ ବିଶ୍ୱାସଭାଜନ ହେବା ସହ ସେମାନଙ୍କର ବିଭିନ୍ନ ଆକ୍ରମଣର ଯୋଜନା ଆଗୁଆ ସୂଚନା ଦେବାରେ ସଫଳ ହୋଇଥିଲେ ।
Sambad is now on WhatsApp
Join and get latest news updates delivered to you via WhatsApp
ଭାରତ, ଆଫଗାନିସ୍ଥାନ ସମେତ ବିଶ୍ୱର ବିଭିନ୍ନ ଦେଶରେ ଆତଙ୍କବାଦୀ ଆକ୍ରମଣ ପାଇଁ ଆଇଏସ୍ ଏକ ବଡ଼ ଯୋଜନା ପ୍ରସ୍ତୁତ କରିଥିଲା । ଏଥିପାଇଁ ୧୨ ଜଣ ଆଇଏସ ଆତଙ୍କବାଦୀଙ୍କୁ ପାକିସ୍ତାନରେ ଟ୍ରେନିଂ ଦିଆଯାଇଥିଲା । ଭାରତରେ ନୂଆଦିଲ୍ଲୀରେ ଏହି ଆକ୍ରମଣ ପାଇଁ ସ୍ଥିର କରାଯାଇଥିଲା ଓ ଏକ ଆଫଗାନ ଯୁବକକୁ ନୂଆଦିଲ୍ଲୀ ପଠାଯାଇଥିଲା । ଉକ୍ତ ଯୁବକ ନୂଆଦିଲ୍ଲୀ ନିକଟରେ ଥିବା ଏକ ଇଂଜିନିୟରିଂ କଲେଜରେ ନାଁ ଲେଖାଇବାକୁ ସକ୍ଷମ ହୋଇଥିଲା ଓ ଦିଲ୍ଲୀର ଲଜପତ ନଗରରେ ଏକ ଫ୍ଲାଟ ଭଡ଼ା ନେଇଥିଲା । ଉକ୍ତ ଯୁବକ ଆକାଉଣ୍ଟକୁ ଦୁବାଇରୁ ୫୦ ହଜାର ଡଲାର ଟ୍ରାନ୍ସଫର ହୋଇଥିବା ସୂଚନା ମିଳିବା ପରେ ର’ ସକ୍ରିୟ ହୋଇଉଠିଥିଲା । ତା ଉପରେ ନଜର ରଖିବାକୁ ସ୍ଥିର ହୋଇଥିଲା । ଏହି କାମରେ ପ୍ରାୟ ୮୦ ଜଣ ଏଜେଣ୍ଟକୁ ଲଗାଯାଇଥିଲା । ଜଣେ ର’ ଏଜେଣ୍ଟଙ୍କୁ ଠିକ ସେହି ଆପାର୍ଟମେଣ୍ଟରେ ଭଡ଼ା ଘର ନେଇ ରହିବାର ବ୍ୟବସ୍ଥା କରାଗଲା । ଉକ୍ତ ଏଜେଣ୍ଟ ଆଇଏସ ଆତଙ୍କବାଦୀଙ୍କ ସହ ବନ୍ଧୁତା କରିବାରେ ସକ୍ଷମ ହେଲେ । ଉକ୍ତ ଆତଙ୍କବାଦୀଙ୍କୁ ବିସ୍ଫୋରକ ଯୋଗାଇବାକୁ ଛଦ୍ମବେଶଧାରୀ ର’ ଏଜେଣ୍ଟ ପ୍ରତିଶ୍ରୁତି ଦେଇଥିଲେ ଓ ପ୍ରତିଶ୍ରୁତି ମୁତାବକ ବିସ୍ଫୋରକ ଯୋଗାଇ ମଧ୍ୟ ଦେଇଥିଲେ । କିନ୍ତୁ ସେଥିରେ ଜାଣିଶୁଣି ଟ୍ରିଗର ରଖାଯାଇନଥିଲା । ଏହା ପରେ ର ପକ୍ଷରୁ ଉକ୍ତ ଆତଙ୍କବାଦୀକୁ ଗିରଫ କରାଯାଇଥିଲା । ତା ସୂଚନା ଆଧାରରେ କେବଳ ଭାରତ ନୁହେଁ, ଆମେରିକା, ଆଫଗାନିସ୍ଥାନରେ ମଧ୍ୟ କେତେକ ସମ୍ଭାବ୍ୟ ଆକ୍ରମଣକୁ ପଣ୍ଡ କରାଯାଇଥିଲା । ଏବେ ଉକ୍ତ ଆତଙ୍କବାଦୀଙ୍କୁ ଆମେରିକାର ସିଆଇଏ ପଚରାଉଚୁରା ପାଇଁ ନିଜ ରିମାଣ୍ଡକୁ ନେଇଛି ।