ଚଳିତ ବର୍ଷ ହଜରେ ଯିବେ ରେକର୍ଡ ସଂଖ୍ୟକ ତୀର୍ଥଯାତ୍ରୀ
ନୂଆଦିଲ୍ଲୀ : ସରକାରଙ୍କ ପ୍ରଚେଷ୍ଟାରେ କ୍ରମାଗତ ଦ୍ୱିତୀୟ ବର୍ଷ ପାଇଁ ଭାରତର ହଜ୍ ଯାତ୍ରୀଙ୍କ କୋଟା ବୃଦ୍ଧି ଘଟିଛି । କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁକ୍ତାର ଅବାସ ନକଭୀ କହିଛନ୍ତି ଯେ, ସ୍ୱାଧୀନତା ପରେ ପ୍ରଥମ ଥର ପାଇଁ ଦେଶରୁ ରେକର୍ଡ ସଂଖ୍ୟକ ମୁସଲିମ୍ ତୀର୍ଥଯାତ୍ରୀ ହଜରେ ଯିବେ, ପୁଣି ବିନା ରିହାତିରେ । ପ୍ରଥମ ଥର ପାଇଁ ୧୩୦୮ ଜଣ ମହିଳା ମେହରମ୍ (ପୁରୁଷ ସାଥୀ)ଙ୍କ ବିନା ହଜରେ ଯିବାକୁ ଆବେଦନ କରିଛନ୍ତି । ମୁମ୍ବାଇର ହଜ୍ ହାଉସରେ ରବିବାର ଶ୍ରୀ ନକଭୀ ହଜ୍ ପାଇଁ ଆୟୋଜିତ ଏକ ପ୍ରଶିକ୍ଷଣ କର୍ମଶାଳା ‘ଖାଦିମ୍-ଉଲ୍-ହଜାଜ୍’ରେ ଉଦବୋଧନ ଅବସରରେ ଏହା କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସେ କହିଲେ ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର କ୍ରମାଗତ ଦ୍ୱିତୀୟ ବର୍ଷ ପାଇଁ ହଜ୍ କୋଟାରେ ବୃଦ୍ଧି କରିପାରିଛି । ସ୍ୱାଧୀନତା ପରେ ପ୍ରଥମ ଥର ପାଇଁ ଦେଶରୁ ରେକର୍ଡ ସଂଖ୍ୟକ ୧,୭୫,୦୨୫ ଜଣ ତୀର୍ଥଯାତ୍ରୀ ଚଳିତ ବର୍ଷ ହଜରେ ଯିବେ । ହଜ୍ ଯାତ୍ରା ପାଇଁ ମୋଟ ୩,୫୫,୬୦୪ ଟି ଆବେଦନପତ୍ର ମିଳିଥିଲା । ସେଥିରେ ୧,୮୯,୨୧୭ ଜଣ ପୁରୁଷ ଏବଂ ୧,୬୬,୩୮୭ ଜଣ ମହିଳା ଥିଲେ ।
ଏ ବର୍ଷ ହଜ୍ କମିଟି ଜରିଆରେ ମୋଟ ୧,୨୮,୦୦୨ ଜଣ ତୀର୍ଥଯାତ୍ରୀ ହଜ୍ ଯିବେ । ସେଥିରେ ଅଛନ୍ତି ୪୭% ମହିଳା । ପ୍ରାଇଭେଟ ଟୁର୍ ଅପରେଟରଙ୍କ ଜରିଆରେ ୪୭,୦୨୩ ଜଣ ତୀର୍ଥଯାତ୍ରୀ ହଜରେ ଯିବେ । ସେହିପରି ପ୍ରଥମ ଥର ପାଇଁ ମୁସଲିମ ମହିଳା ତୀର୍ଥଯାତ୍ରୀ ମେହରମଙ୍କ ବିନା ହଜରେ ଯିବେ । ମୋଟ ୧୩୦୮ ଜଣ ମହିଳା ମେହରମଙ୍କ ବିନା ହଜରେ ଯିବାକୁ ଆବେଦନ କରିଥିଲେ । ଲଟେରୀ ପ୍ରକ୍ରିୟାରୁ ବାଦ୍ ଦେଇ ସମସ୍ତଙ୍କୁ ହଜରେ ଯିବାକୁ ଅନୁମତି ଦିଆଯାଇଛି ।
ଗତ ବର୍ଷ ରେ ୧,୨୪,୮୫୨ ଜଣ ହଜ୍ ଯାତ୍ରୀଙ୍କ ପାଇଁ ବିମାନ ଭଡ଼ା ବାବଦକୁ ସରକାର ବିଭିନ୍ନ ଏୟାରଲାଇନ୍ସକୁ ଦେଇଥିଲେ ୧୦୩୦କୋଟି ଟଙ୍କା । ୨୦୧୮ ରେ ୧,୨୮,୦୦୨ ଜଣ ତୀର୍ଥଯାତ୍ରୀଙ୍କ ପାଇଁ ଏୟାରଲାଇନ୍ସକୁ ଦିଆଯିବ ୯୭୩ କୋଟି ଟଙ୍କା । ହଜ୍ ରିହାତି ବ୍ୟବସ୍ଥାର ଉଚ୍ଛେଦ ପରେ ମଧ୍ୟ ଏୟାରଲାଇନ୍ସକୁ ଗତ ବର୍ଷ ତୁଳନାରେ ୫୭ କୋଟି ଟଙ୍କା କମ୍ ଦିଆଯିବ ।