ଆମେରିକାରେ ଶରଣ ନେବାକୁ ଚାହୁଁଥିଲେ ସାଉଦି ଆରବରେ ରହୁଥିବା ଦୁଇ ଭଉଣୀ, ଅନୁମତି ନ ମିଳିବାରୁ ଆତ୍ମହତ୍ୟା କଲେ
ନ୍ୟୁୟର୍କ : ଅକ୍ଟୋବରରେ ନ୍ୟୁୟର୍କର ହଡ୍ସନ ନଦୀ ପାଖରୁ ସାଉଦି ଆରବର ନାଗରିକ ଦୁଇ ଭଉଣୀଙ୍କ ମୃତଦେହ ମିଳିଥିଲା । ଏବେ ଦୁହେଁ ଆତ୍ମହତ୍ୟା କରିଥିବା କହିଛନ୍ତି ଡ଼ାକ୍ତର । ଜଣଙ୍କ ନାଁ ରୋତାନା ଫାରିଆ (୨୨) ହୋଇଥିବା ବେଳେ ଆଉ ଜଣଙ୍କ ନାଁ ତାଲା ଫାରିଆ(୧୬) ବୋଲି ଜଣା ପଡ଼ିଛି । ମୃତ୍ୟୁ ସମୟରେ ଦୁହେଁ କଳା ରଙ୍ଗର ପୋଷାକ ପିନ୍ଧିଥିବା ବେଳେ ଦୁହିଁଙ୍କ ମୃତଦେହ ମିଳିବା ପରେ ଆମେରିକାରେ ଚାଞ୍ଚଲ୍ୟ ଖେଳି ଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଚିଫ୍ ମେଡ଼ିକାଲ ଅଫିସର ବାରବରା ସେମ୍ପସନ୍ଙ୍କ କହିବା ଅନୁଯାୟୀ, ଯାଞ୍ଚ ପରେ ଫାରିଆ ସିଷ୍ଟର୍ସଙ୍କ ମୃତ୍ୟୁ ଆତ୍ମହତ୍ୟା ଦ୍ୱାରା ହୋଇଛି। ଦୁଇ ଭଉଣୀ ପରସ୍ପରର ଗୋଡ଼ ଏବଂ ଅଣ୍ଟାରେ ରସି ବାନ୍ଧି ହଡ଼ସନ୍ ନଦୀକୁ ଡ଼େଇଁଥିଲେ । ଦୁହିଁଙ୍କ ମୃତ୍ୟୁ ପରେ ଜଣାପଡ଼ିଛି କି ଦୁହେଁ ଆମେରିକାରେ ‘ଶରଣ’ ନେବାକୁ ଚାହୁଁଥିଲେ । ଏହା ନ ମିଳିବାରୁ ସେମାନେ ଏପରି କରିଥିବା କହିଛି ପୁଲିସ । କିନ୍ତୁ ପୁଲିସର ଏଭଳି କଥାକୁ ଗ୍ରହଣ କରି ନାହାନ୍ତି ସାଉଦି ଆରବ ଦୂତାବାସର ପ୍ରବକ୍ତା ଫାତିମା ବାସିନ୍ । ତାଲା ଏବଂ ରୋତାନା ଦୁହେଁ ଭର୍ଜିନିଆରେ ନିଜ ପରିବାର ସହ ଖୁସିରେ ରହୁଥିବା ସହ ସେମାନେ ଆମେରିକାରେ ଶରଣ ନେବାକୁ ଚାହୁଁଥିବା କଥାକୁ ଅସ୍ୱୀକାର କରିଛନ୍ତି ଫାତିମା ।
ପୁଲିସ ଦେଇଥିବା ସୂଚନା ମୁତାବକ, ଦୁହିଁଙ୍କୁ ସାଉଦି ଆରବରେ ସେଲ୍ଟର ହୋମ୍ରେ ରଖା ଯାଇଥିଲା । କିନ୍ତୁ ଗତ ବର୍ଷ ଅଗଷ୍ଟ ମାସରେ ସେମାନେ ସେଠାରୁ ଖସି ଆସି ଆମେରିକାର ଦାମୀ ହୋଟେଲରେ ରହିବାକୁ ଲାଗିଥିଲେ । ଯାହାର ବିଲ୍ ସେମାନେ କ୍ରେଡିଟ୍ କାର୍ଡ ମାଧ୍ୟମରେ ଦେଇଥିଲେ । କିଛି ଦିନ ଆମେରିକାରେ ରହିବା ପରେ ସେମାନେ ଆମେରିକାରେ ଶରଣ ନେବାକୁ ଚାହୁଁଥିଲେ । କିନ୍ତୁ ତାଙ୍କୁ ନ ମିଳିବାରୁ ଶେଷରେ ସେମାନେ ଆତ୍ମହତ୍ୟା ଭଳି ପଦକ୍ଷେପ ନେଇଥିଲେ ।