ଭାରତୀୟ ଡାକ୍ତରଙ୍କ କମାଲ: କୌଣସି ଅଙ୍ଗକୁ ନ କାଟି ବେକ ଭିତରୁ ବାହାର କଲେ ୫୩ଟି ପଥର
ନୂଆଦିଲ୍ଲୀ : ରାଜଧାନୀ ଦିଲ୍ଲୀରେ ଥିବା ସର ଗଙ୍ଗାରାମ ଡାକ୍ତରଖାନାର ଡାକ୍ତରମାନେ ଅସମ୍ଭବକୁ ସମ୍ଭବ କରି ଦେଖାଇଛନ୍ତି । ଡାକ୍ତରୀ ଟିମ୍ କରିଥିବା କମାଲର ଚର୍ଚ୍ଚା ଏବେ ଚାରିଆଡ଼େ ଆରମ୍ଭ ହୋଇଛି । ଇରାକ୍ରୁ ଆସିଥିବା ଜଣେ ୬୬ବର୍ଷୀୟ ବୃଦ୍ଧାଙ୍କ ବେକ ଭିତରୁ କୌଣସି ଗ୍ରନ୍ଥିକୁ ନ କାଟି ୫୩ଟି ପଥର ବାହାର କରିବା କାମ ପାଇଁ ଏବେ ଲୋକେ ଡାକ୍ତରୀ ଟିମ୍କୁ ପ୍ରଶଂସା କରିବାରେ ଲାଗିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ବାଘ୍ଦାଦ୍ରେ ରହୁଥିବା ବୃଦ୍ଧା କିଛି ଖାଉଥିଲେ ବା କିଛି ପିଇବା ପରେ ତାଙ୍କ ଡ଼ାହାଣ ପଟ ପାରୋଟଏଡ୍ ଗ୍ରନ୍ଥି ଫୁଲିବା ସହ ଅସହନୀୟ ଯନ୍ତ୍ରଣା ହେଉଥିଲା । ଯାହା ପରେ ପରେ ତାଙ୍କୁ ଅନେକ ଜିନିଷ ଖାଇବାକୁ ବାରଣ କରାଯାଇଥିଲା । ଇରାକ୍ରେ ସେ ବିଭିନ୍ନ ଡାକ୍ତରଙ୍କୁ ଦେଖାଇବା ପରେ ସେମାନେ ବୃଦ୍ଧାଙ୍କୁ ରାଡିକାଲ ପ୍ରକ୍ରିୟା ଆପଣାଇ ପାରୋଟଏଡ୍ ଗ୍ରନ୍ଥିକୁ କାଢ଼ିଦେବା ପାଇଁ କହିଥିଲେ । ଏପରି କରିଥିଲେ ତାଙ୍କ ମୁହଁ ସଂପୂର୍ଣ୍ଣ ଭାବେ ଅଚଳ ହୋଇଯାଇଥାନ୍ତା । ପରେ ସେ ଭାରତ ଆସି ନିଜର ଚିକିତ୍ସା କରାଇବା ପାଇଁ ଚିନ୍ତା କରିଥିଲେ । ସର ଗଙ୍ଗାରାମ ଡାକ୍ତରଖାନା ଆସିବା ପରେ ବୃଦ୍ଧାଙ୍କ ପାରୋଟଏଡ୍ ଗ୍ରନ୍ଥିରେ ଏକାଧିକ ପଥର ଥିବା ଏକ୍ସ-ରେ ରିପୋର୍ଟରୁ ସାମ୍ନାକୁ ଆସିଥିଲା । ଭିତରର କୌଣସି ଗ୍ରନ୍ଥିଙ୍କୁ କ୍ଷତି ନ ପହଞ୍ଚାଇ ସମସ୍ତ ପଥରକୁ ବାହାର କରିବା ଡାକ୍ତରୀ ଟିମ୍ ପାଇଁ ବଡ଼ ଚ୍ୟାଲେଞ୍ଜ ଥିଲା । ଯାହାକୁ ସେମାନେ ଗ୍ରହଣ କରିବା ସହ ବୃଦ୍ଧାଙ୍କ ବେକରୁ ସମସ୍ତ ପଥର ବାହାର କରିବା ପାଇଁ ଡାକ୍ତରୀ ଟିମ୍ ବାସ୍କେଟ୍ ଓ ଫୋସ୍ସେପ୍ସର ବ୍ୟବହାର କରି ଗୋଟେ ପରେ ଗୋଟେ ପଥର ବାହାର କରିଥିଲେ । ସବୁଠାରୁ ବଡ଼ ପଥରର ଆକାର ୮ମିଲିମିଟର ଥିବା ସହ ଏବେ ବୃଦ୍ଧା ସୁସ୍ଥ ଥିବା ଜଣା ପଡ଼ିଛି ।