ଆସାମ: ଟ୍ରେନ ଧକ୍କାରେ ୫ ହାତୀ ମୃତ
ଗୌହାଟୀ- ଆସାମ ବାଲିପଡ଼ାଠାରେ ଏକ ଦ୍ରୁତଗାମୀ ଟ୍ରେନ ଧକ୍କାରେ ପ୍ରାୟ ୫ଟି ବଣୁଆ ହାତୀ ମୃତ୍ୟୁବରଣ କରିଛନ୍ତି । ମୃତ ହାତୀମାନଙ୍କମଧ୍ୟରେ ଏକ ଗର୍ଭବତୀ ହାତୀ ଥିଲା ଯାହାର ଗର୍ଭରୁ ଏକ ହାତୀଶାବକକୁ ଉଦ୍ଧାର କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ରବିବାର ରାତି ୧ଟା ୧୫ରେ ଆସାମ ରାଜଧାନୀ ଗୌହାଟୀଠାରୁ ପ୍ରାୟ ୨୧୦ କିମି ଦୂରରେ ଥିବା ବାମଗାଁଓ ଚା’ବଗିଚା ନିକଟରେ ଏହି ଦୂର୍ଘଟଣା ଘଟିଛି । ଖାଦ୍ୟ ସନ୍ଧାନରେ ଏକ ବଡ଼ ହାତୀପଲ ରେଳଲାଇନ ପାରି ହେଉଥିବାବେଳେ ଟ୍ରେନଟି ସେମାନଙ୍କୁ ଧକ୍କା ଦେଇଥିଲା । ଆସାମର ସୋନିତପୁର ପୂର୍ବ ଜିଲ୍ଲାର ଡିଭିଜିନାଲ ଫରେଷ୍ଟ ଅଫିସର ଦାବିନ୍ଦର ସୁମନ କହିଛନ୍ତି ଯେ ଉକ୍ତ ଜଙ୍ଗଲରେ ପ୍ରାୟ ୧୦୦ ହାତୀ ଥିବା ଏକ ଦଳ ଥିବାର ସୂଚନା ମିଳିିଥିଲା । ତେବେ ବନ ବିଭାଗ ଅଧିକାରୀମାନେ ଉକ୍ତ ଜଙ୍ଗଲର ଆଉ ଏକ ଅଂଚଳରେ ହାତୀପଲର ସନ୍ଧାନ କରୁଥିବାବେଳେ ଆଉ ଏକ ଛୋଟ ହାତୀପଲ ଖାଦ୍ୟ ଅନେ୍ଵଷଣରେ ରେଳଧାରଣା ପାରି ହେଉଥିଲେ । ସେହିସମୟରେ ଏହି ଦୁର୍ଘଟଣା ଘଟିଥିଲା ।
ତେବେ ଏହି ଦୁର୍ଘଟଣା ପାଇଁ ରେଳବାଇକୁ ଦାୟୀ କରାଯାଇପାରିବ ନାହିଁ ବୋଲି କହିଛନ୍ତି ଆସାମର ପରିବେଶ ଓ ଜଙ୍ଗଲ ମନ୍ତ୍ରୀ ପ୍ରମିଳାରାଣୀ ବ୍ରହ୍ମା । ବଣ୍ୟଜନ୍ତୁଙ୍କ ଆବାସସ୍ଥଳୀ ଓ ସଂରକ୍ଷିତ ଜଙ୍ଗଲରେ ମଣିଷର ଅନୁପ୍ରବେଶ ବଢିଯାଇଛି । ଏଥିଲାଗି ବଣ୍ୟଜନ୍ତୁ ଖାଦ୍ୟ ସନ୍ଧାନରେ ବିଭିନ୍ନ ଆଡକୁ ଯାଉଛନ୍ତି । ଏହା ଫଳରେ ହିଁ ସେମାନେ ଦୁର୍ଘଟଣା ହେଉଛି ବୋଲି ସେ କହିଛନ୍ତି ।
ଅନ୍ୟପକ୍ଷରେ ରେଳବାଇ ପକ୍ଷରୁ କୁହାଯାଇଛି ଯେ ଉକ୍ତ ଅଞ୍ଚଳଟି ଏକ ହାତୀ କରିଡର ଭାବେ ଚିହ୍ନିତ ହୋଇନାହିଁ । ଏଣୁ ଟ୍ରେନ ପାଇଁ କୌଣସି ସ୍ପୀଡ୍ ଲିମିଟ୍ ଧାର୍ଯ୍ୟ କରାଯାଇନାହିଁ ।