ଭାରୀ ସ୍କୁଲ ବ୍ୟାଗ୍ ପାଇଁ ସ୍କୁଲର ସିଢ଼ିରୁ ଖସି ତଳେ ପଡ଼ିଲେ ଛାତ୍ରୀ, କରାଗଲା ପଞ୍ଜରା ହାଡ଼ର ସର୍ଜରି
କୋଲକାତା : ପଞ୍ଚିମବଙ୍ଗର ଲିଲୁଆରେ ଜଣେ ଦଶମ ଶ୍ରେଣୀ ଛାତ୍ରୀ ସ୍କୁଲର ପାଞ୍ଚ ମହଲା ଉପରକୁ ଚଢ଼ୁଥିବା ସମୟରେ ତଳକୁ ଖସି ପଡ଼ିଥିବା ଜଣା ପଡ଼ିଛି । କାନ୍ଧରେ ପକାଇଥିବା ସ୍କୁଲ ବ୍ୟାଗ୍ ଅଧିକ ଭାରୀ ଥିବାରୁ ଏଭଳି ଦୁର୍ଘଟଣା ଘଟିଛି ବୋଲି ଜଣାପଡ଼ିବା ପରେ ଘଟଣାଟି ସବୁ ମାତାପିତାଙ୍କ ପାଇଁ ଚେତାବନୀ ପାଲଟିଛି । ଦୁର୍ଘଟଣାର ଶିକାର ହେବା ପରେ ଛାତ୍ରୀଙ୍କ ପଞ୍ଜରା ହାଡ଼ରେ ଗଭୀର ଆଘାତ ଲାଗିଥିବାରୁ ଡ଼ାକ୍ତର ସର୍ଜରି କରାଇଥିଲେ । ସର୍ଜରି ପରେ ଏବେ ତାଙ୍କ ଅବସ୍ଥା ଗମ୍ଭୀର ରହିଛିି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଲିଲୁଆର ଅଗ୍ରସେନ ବାଳିକା ଶିକ୍ଷାସଦନରେ ୧୦ମ ଶ୍ରେଣୀରେ ପଢ଼ୁଥିବା ଛାତ୍ରୀ ନିଜର ଓଜନିଆ ବ୍ୟାଗ୍ ଧରି ପଞ୍ଚମ ମହଲାକୁ ଉଠୁଥିବା ବେଳେ ତାଙ୍କ ଗୋଡ଼ ଖସି ଯାଇଥିଲା । ଫଳରେ ତାଙ୍କ ପଞ୍ଜରା ହାଡ଼ରେ ଆଘାତ ଲାଗିବା ସହ ତୁରନ୍ତ ତାଙ୍କୁ କୋଲକାତାର ଏକ ଘରୋଇ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା । ଛାତ୍ରୀଙ୍କ ଅବସ୍ଥା ଦେଖି ତୁରନ୍ତ ସର୍ଜରି କରାଇଥିଲେ ଡ଼ାକ୍ତର । ଯାହା ପରେ ମଧ୍ୟ ପୀଡ଼ିତାଙ୍କ ସ୍ବାସ୍ଥ୍ୟ ଗୁରୁତର ଥିବା ଜଣାପଡ଼ିଛି । ଏଭଳି ଘଟଣା ଘଟିବା ପରେ ପୀଡ଼ିତାଙ୍କ ସ୍କୁଲକୁ ଯାଇ ତାଙ୍କ ମାତା-ପିତା ସ୍କୁଲର କର୍ତ୍ତୃପକ୍ଷଙ୍କୁ ଏକ ଅନୁରୋଧ କରିଛନ୍ତି । ପିଲାମାନଙ୍କୁ ଭାରୀ ବ୍ୟାଗ୍ ଆଣିବା ପାଇଁ ଯେମିତି ବାଧ୍ୟ ନ କରାଯାଉ ସେ ନେଇ ପୀଡ଼ିତାଙ୍କ ପରିବାର ଅନୁରୋଧ କରିଥିବା ଜଣା ପଡ଼ିଛି ।