ପାକିସ୍ତାନର ଏଫ-୧୬ ଦ୍ୱାରା ନିକ୍ଷେପ କରାଯାଇଥିବା ଅଫୁଟା ବୋମା ନିଷ୍କ୍ରିୟ କରିବାକୁ ମିଳିତ ଟିମ ଗଠନ କଲେ ସେନା ଓ ବାୟୁସେନା
ନୂଆଦିଲ୍ଲୀ : ଗତ ଫେବ୍ରୁଆରୀ ୨୭ରେ ଜାମ୍ମୁ ଓ କାଶ୍ମୀର ନିୟନ୍ତ୍ରଣରେଖା ନିକଟରେ ପାକିସ୍ତାନ ଓ ଭାରତୀୟ ବାୟୁସେନା ମଧ୍ୟରେ ହୋଇଥିବା ମୁହାଁମୁହିଁ ପରିସ୍ଥିତି ଯୋଗୁଁ ସୃଷ୍ଟି ହୋଇଥିବା ଉତ୍ତେଜନା ଏବେ ଥମିଯାଇଥିବା ସତ୍ତ୍ୱେ ଆଉ ଏକ ବିପଦ ରହିଯାଇଛି । ତାହା ହେଉଛି ପାକିସ୍ତାନ ବାୟୁସେନାର ଏଫ-୧୬ ବିମାନ ଦ୍ୱାରା ନିକ୍ଷେପ କରାଯାଇଥିବା କେତେକ ବୋମା ଅଫୁଟା ରହିଯାଇଛି । ତାହା ମେଣ୍ଢକ ସେକ୍ଟର ନିକଟରେ ଥିବା ସେନା କାର୍ଯ୍ୟାଳୟର ନିକଟବର୍ତ୍ତି ଏକ ସ୍ଥାନରେ ପଡିରହିଛି । ଏଗୁଡ଼ିକୁ ନିଷ୍କ୍ରିୟ କରିବା ପାଇଁ ବାୟୁସେନା ଓ ସେନାର ଏକ ମିଳିତ ବୋମାନିରୋଧୀ ଟିମ ଗଠନ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ ଗତ ଫେବ୍ରୁଆରୀ ୧୪ରେ ପୁଲଓ୍ଵାମା ଆକ୍ରମଣ ପରେ ତାହାର ଜବାବ ଭାରତ ପାକିସ୍ତାନର ବାଲାକୋଟ ଉପରେ ବିମାନ ଆକ୍ରମଣ କରି କରିଥିଲା । ଏହା ପରେ ଦୁଇ ଦେଶ ମଧ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇଥିଲା । ଭାରତ ଉପରେ ଚାପ ସୃଷ୍ଟି କରିବାକୁ ପାକିସ୍ତାନ ନିଜର ଏକମାତ୍ର କାର୍ଯ୍ୟକ୍ଷମ ବୁଡ଼ାଜାହଜକୁ ଭାରତର ପଶ୍ଚିମ ଉପକୂଳକୁ ପଠାଇଥିଲା । କିନ୍ତୁ ଏହା ଭାରତୀୟ ନୌସେନାର ସତର୍କ ପ୍ରହରାରୁ ବର୍ତ୍ତି ପାରିନଥିଲା । ଅଗତ୍ୟା ଏହା ଫେରିଯାଇଥିଲା ।