ଚୀନ୍ ଆଡ଼କୁ ଢଳୁଥିବାରୁ ବିଶ୍ୱ ସ୍ୱାସ୍ଥ୍ୟ ସଂଗଠନ ପାଣ୍ଠି ବନ୍ଦ କରିବାକୁ ଧମକ ଦେଲେ ଟ୍ରମ୍ପ୍
ୱାସିଂଟନ୍: କରୋନାଭାଇରସ୍ ମହାମାରୀ ସମୟରେ ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷପାତ କରି ଚୀନକୁ ସମର୍ଥନ କରୁଛି । ସେହି କାରଣରୁ ଯୁକ୍ତରାଷ୍ଟ୍ର ଆମେରିକା ବିଶ୍ୱ ସ୍ୱାସ୍ଥ୍ୟ ସଂଗଠନକୁ ଯୋଗାଉଥିବା ପାଣ୍ଠି ବା ଆର୍ଥିକ ସହାୟତା ବନ୍ଦ କରିବ ବୋଲି ମଙ୍ଗଳବାର ଦିନ ରାଷ୍ଟ୍ରପତି ଡୋନାଲଡ୍ ଟ୍ରମ୍ପ୍ ଧମକ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସାମ୍ବାଦିକମାନଙ୍କୁ ଟ୍ରମ୍ପ୍ କହିଛନ୍ତି ଯେ ବିଶ୍ୱ ସ୍ୱାସ୍ଥ୍ୟ ସଂଗଠନ ପାଣ୍ଠି ଯୋଗାଣ ଉପରେ ସେ କଡ଼ା ରହିତାଦେଶ ଲାଗୁ କରିବେ । ଏହାଛଡ଼ା ବିଶ୍ୱ ସ୍ୱାସ୍ଥ୍ୟ ସଂଗଠନ ଠିକଣା ଭାବେ କରୋନାଭାଇରସ୍ କୋଭିଡ୍-୧୯ ସଂକଟକୁ ପରିଚାଳନା କରି ପାରିନାହିଁ ବୋଲି ଟ୍ରମ୍ପ୍ ସମାଲୋଚନା କରିଛନ୍ତି ।
ଜାତିସଂଘର ଏହି ଅନୁଷ୍ଠାନ ଯୁକ୍ତରାଷ୍ଟ୍ର ଆମେରିକା ଠାରୁ ହିଁ ସବୁଠୁ ଅଧିକ ଆର୍ଥିକ ସହାୟତା ପାଇଥାଏ । କେତେ ପରିମାଣର ଅର୍ଥ ଯୋଗାଣ ଉପରେ ରହିତାଦେଶ ଜାରି ହେବ, ତାହା ଟ୍ରମ୍ପ୍ କହିନାହାନ୍ତି । କିନ୍ତୁ ଏ କଥା କହିବାର ମୁହୂର୍ତ୍ତକ ପରେ ସେ ପୁଣି କହିଲେ ଯେ ମୁଁ ସଂଗେ ସଂଗେ ଏମିତି କରିବି ବୋଲି କହୁନାହିଁ । ଆମେ ଆର୍ଥିକ ସହାୟତା ଯୋଗାଣ ବନ୍ଦ କରିବା କଥା ବିଚାର କରିବୁ ।
ଟ୍ରମ୍ପଙ୍କ କହିବା ଅନୁସାରେ, ବିଶ୍ୱ ସ୍ୱାସ୍ଥ୍ୟ ସଂଗଠନ ଚୀନର ସମର୍ଥନ କରି ପକ୍ଷପାତିତା କରିବା ପରି ମନେହେଉଛି । ତାହା ଠିକ୍ କଥା ନୁହେଁ । ପୂର୍ବରୁ ସେ ଟୁଇଟ୍ କରି ଲେଖିଥିଲେ ଯେ ବିଶ୍ୱ ସ୍ୱାସ୍ଥ୍ୟ ସଂଗଠନ ଚୀନ୍-କେନ୍ଦ୍ରିକ ହୋଇଯାଉଛି ।