କଶ୍ମୀର ପ୍ରସଙ୍ଗରେ ମଧ୍ୟସ୍ଥତା କଥା କହିଲେ ଟ୍ରମ୍ପ, ପରେ ଏପରି କିଛି କହିନାହାନ୍ତି ବୋଲି ମନ୍ତବ୍ୟ ଦେଲେ
ନୂଆଦିଲ୍ଲୀ : କଶ୍ମୀର ପ୍ରସଙ୍ଗରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବୟାନକୁ ନେଇ ସବୁଆଡ଼େ ଚର୍ଚ୍ଚା ହେଉଛି । ପ୍ରଥମେ ସେ ମଧ୍ୟସ୍ଥତା କଥା କହିଥିଲେ ମଧ୍ୟ ପରେ ଏହାକୁ ଅସ୍ପୀକାର କରିଥିଲେ ।
ଆଜି ନିଜର ଭାରତ ଗସ୍ତର ୨ୟ ଦିନରେ ଏକ ସାମ୍ବାଦିକ ସମ୍ମିଳନୀରେ ଟ୍ରମ୍ପଙ୍କୁ କଶ୍ମୀର ସମସ୍ୟା ସଂପର୍କରେ ପ୍ରଶ୍ନ କରାଯିବା ପରେ ସେ କହିଥିଲେ ଯେ କଶ୍ମୀର ସମସ୍ୟା ଭାରତ ଓ ପାକିସ୍ତାନ ମଧ୍ୟରେ ଏକ କଣ୍ଟା ସଦୃଶ । ପ୍ରତି ଘଟଣା ପଛରେ ଦୁଇଟି ଅଲଗା ଅଲଗା କଥା ରହିଥାଏ । ତେବେ ଉଭୟ ଭାରତୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ସହିତ ତାଙ୍କର ଉତ୍ତମ ସଂପର୍କ ରହିଛି । ଏହି ସମସ୍ୟାର ସମାଧାନ ପାଇଁ ଯଦି କିଛି ମଧ୍ୟସ୍ଥତା କରିବାକୁ ପଡ଼େ ସେ କରିବେ ।
Sambad is now on WhatsApp
Join and get latest news updates delivered to you via WhatsApp
ପରେ ସମାନ ପ୍ରସଙ୍ଗ ଉପରେ ଆଉ ଏକ ପ୍ରଶ୍ନର ଉତ୍ତର ଦେଇ ଟ୍ରମ୍ପ କହିଥିଲେ ଯେ କୌଣସି ମଧ୍ୟସ୍ଥତା କଥା ସେ କହିନାହାନ୍ତି । କଶ୍ମୀର ନିଶ୍ଚିତଭାବରେ ଏକ ବଡ଼ ସମସ୍ୟା । କିନ୍ତୁ ଏହାର ସମାଧାନ ବାହାର କରିବା ଦିଗରେ ଉଭୟ ଦେଶ କାର୍ଯ୍ୟ କରୁଛନ୍ତି । ଆଗରୁ ସେମାନେ ଏ ଦିଗରେ କାମ କରିଆସିଛନ୍ତି । ପୂର୍ବରୁ ମଧ୍ୟ ଟ୍ରମ୍ପ ଏକାଧିକ ଥର କଶ୍ମୀର ପ୍ରସଙ୍ଗରେ ମଧ୍ୟସ୍ଥତା କଥା କହିଆସିଛନ୍ତି । ତେବେ ପ୍ରତ୍ୟେକ ଥର ଭାରତ ଏହାକୁ ଖାରଜ କରିଆସିଛି ।