କୋଲକାତା: ନାଗରିକତା (ସଂଶୋଧନ) ବିଲ୍ ୨୦୧୯ (ସିଏଏ)କୁ ବିରୋଧ କରି ପଶ୍ଚିମବଙ୍ଗ ବିଧାନସଭାରେ ଆଜି ମମତା ବାନାର୍ଜୀଙ୍କ ନେତୃତ୍ୱାଧୀନ ତୃଣମୂଳ କଂଗ୍ରେସ (ଟିଏମ୍ସି) ପକ୍ଷରୁ ଏକ ପ୍ରସ୍ତାବ ପାରିତ ହୋଇ ଯାଇଛି। ପଶ୍ଚିମବଙ୍ଗ ବିଧାନସଭାରେ ଆଜି ପାରିତ ହୋଇ ଯାଇଥିବା ପ୍ରସ୍ତାବରେ ନାଗରିକତା (ସଂଶୋଧନ) ବିଲ୍ ୨୦୧୯ (ସିଏଏ)କୁ ପ୍ରତ୍ୟାହାର ସହ ଜାତୀୟ ନାଗରିକ ପଞ୍ଜିକା (ଏନ୍ଆରସି) ଓ ଜାତୀୟ ଜନସଂଖ୍ୟା ପଞ୍ଜିକା (ଏନ୍ପିଆର)କୁ କାର୍ଯ୍ୟକାରୀ କରିବା ପାଇଁ କେନ୍ଦ୍ର ସରକାର ଯେଉଁ ଯୋଜନା ରଖିଛନ୍ତି ତାହାକୁ ମଧ୍ୟ ବନ୍ଦ କରିବା ପାଇଁ ପାରିତ ହୋଇ ଯାଇଥିବା ପ୍ରସ୍ତାବରେ କୁହାଯାଇଛି। ପଶ୍ଚିମବଙ୍ଗର ସଂସଦୀୟ ବ୍ୟାପାର ମନ୍ତ୍ରୀ ପାର୍ଥ ଚାଟାର୍ଜୀ ତୃଣମୂଳ ସରକାରଙ୍କ ପକ୍ଷରୁ ଏହି ପ୍ରସ୍ତାବକୁ ବିଧାନସଭାରେ ଆଗତ କରିଥିଲେ।
ଉଲ୍ଲେଖଯୋଗ୍ୟ, ନାଗରିକତା (ସଂଶୋଧନ) ବିଲ୍ ୨୦୧୯ (ସିଏଏ)କୁ ବିରୋଧ କରି ବିଧାନସଭାରେ ପ୍ରସ୍ତାବ ପାରିତ କରାଇବାରେ ପଶ୍ଚିମବଙ୍ଗ ହେଉଛି ଦେଶର ଚତୁର୍ଥ ରାଜ୍ୟ। ଏହା ପୂର୍ବରୁ କେରଳ, ରାଜସ୍ଥାନ ଓ ପଞ୍ଜାବ ରାଜ୍ୟ ବିଧାନସଭାରେ ନାଗରିକତା (ସଂଶୋଧନ) ବିଲ୍ ୨୦୧୯ (ସିଏଏ)କୁ ବିରୋଧ କରି ସଂପୃକ୍ତ ରାଜ୍ୟମାନଙ୍କର ବିଧାନସଭାମାନଙ୍କରେ ପ୍ରସ୍ତାବ ପାରିତ ହୋଇଯାଇଥିଲା।
The time has come to put aside narrow differences and fight together to save the country: @MamataOfficial during her address in Assembly on anti-CAA resolution
— All India Trinamool Congress (@AITCofficial) January 27, 2020
ଏହି ପରିପ୍ରେକ୍ଷୀରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସର ସୁପ୍ରିମୋ ମମତା ବାନାର୍ଜୀ ଦେଶର ସମସ୍ତ ବିରୋଧୀ ଦଳର ନେତାମାନଙ୍କୁ ଆହ୍ଵାନ ଦେଇ ନିଜ ନିଜ ଭିତରେ ରହିଥିବା ସଂକୀର୍ଣ୍ଣ ମତଭେଦକୁ ଦୂରକରି ଏକଜୁଟ ହୋଇ ନାଗରିକତା (ସଂଶୋଧନ) ବିଲ୍ ୨୦୧୯ (ସିଏଏ)କୁ ବିରୋଧ କରିବା ସହ କେନ୍ଦ୍ରର ଅହଂକାରୀ ଓ ଏକଛତ୍ରବାଦୀ ବିଜେପି ସରକାର ବିରୋଧରେ ଲଢ଼ିବାକୁ ଆହ୍ଵାନ ଦେଇଛନ୍ତି।