ଏହି କାରଣରୁ ସ୍କୁଟର ଚଲାଇବା ଛାଡ଼ି ଦେଇଥିଲେ ମନୋହର ପାରିକର
ପାଣାଜୀ : ପଶ୍ଚିମ ଭାରତର ଅନ୍ୟତମ ଦକ୍ଷ ରାଜନୈତିଜ୍ଞ ତଥା ଭାରତୀୟ ଜନତା ପାର୍ଟିର ବରିଷ୍ଠ ନେତା ମନୋହର ପାରିକର ରବିବାର ନିଜର ଶେଷ ନିଶ୍ୱାସ ତ୍ୟାଗ କରିଛନ୍ତି । କର୍କଟ ରୋଗରେ ପୀଡ଼ିତ ହୋଇ ସେ ଗୋଆ ମେଡିକାଲ କଲେଜ ଏବଂ ହସ୍ପିଟାଲରେ ଚିକିତ୍ସିତ ହେଉଥିବା ବେଳେ ଗତକାଲି ସଂନ୍ଧ୍ୟା ସମୟରେ ଶେଷ ନିଶ୍ୱାସ ତ୍ୟାଗ କରିଥିଲେ । ମନୋହର ପାରିକରଙ୍କର ଜନ୍ମ ୧୯୫୫ରେ ହୋଇଥିବା ବେଳେ ତାଙ୍କର ମୃତ୍ୟୁ ସମସ୍ତଙ୍କୁ ସ୍ତବ୍ଧ କରିଛି ।
Sambad is now on WhatsApp
Join and get latest news updates delivered to you via WhatsApp
ତେବେ ୬୩ବର୍ଷ ମଧ୍ୟରେ ସେ ଏମିତି ଅନେକ କାମ କରିଛନ୍ତି, ଯାହା ସବୁଦିନ ପାଇଁ ଗୋଆବାସୀଙ୍କ ମନରେ ସ୍ମରଣୀୟ ହୋଇ ରହିବ । ତେବେ ଆରମ୍ଭରୁ ପାରିକର ନିଜର ସ୍କୁଟର ଚଲାଇବା ପାଇଁ ବେଶ୍ ପସନ୍ଦ କରୁଥିବା ବେଳେ ଧୀରେ ଧୀରେ ସ୍କୁଟର ଚଳାଇବା ଛାଡ଼ି ଦେଇଥିଲେ । ଏପରି କରିବା ପଛରେ ସେଭଳି ବଡ଼ କାରଣ ମଧ୍ୟ ରହିଥିଲା । ଯାହାର ଖୁଲାସା ସେ ଏକ ବୈଠକରେ କରିଥିଲେ । ଗତ ବର୍ଷ ଜାନୁଆରିରେ ଆୟୋଜିତ ହୋଇଥିବା ଏକ କାର୍ଯ୍ୟକ୍ରମରେ ଯୋଗ ଦେଇ ସ୍କୁଟର ଚଳାଇବା ଛାଡ଼ିବା ପଛର କାରଣ ଜଣାଇଥିଲେ ।
“ଲୋକମାନେ ମୋତେ ସବୁବେଳେ ପଚାରନ୍ତି କି, ମୁଁ ଏବେ ବି ସ୍କୁଟର ଚଲାଉଛି କି ନାହିଁ । ସେମାନଙ୍କୁ ମୁଁ କହିବାକୁ ଚାହେଁ, ମୁଁ ଏବେ ସ୍କୁଟର ଚଳାଉ ନାହିଁ । ମୋ ମୁଣ୍ଡରେ ସବୁ ବେଳେ ମୋ କାମକୁ ନେଇ ଅନେକ କଥା ଚାଲି ଚାଲିଥାଏ । ଯାହା ପାଇଁ ଅନେକ ସମୟରେ ମୁଁ ଅନ୍ୟ ମନସ୍କ ହୋଇଯାଏ । ଏଭଳି ହେଲେ ଦୁର୍ଘଟଣା ହେବାର ଆଶଙ୍କା ରହିଥିବାରୁ ମୁଁ ସ୍କୁଟର ଚଳାଇବା ଛାଡ଼ିବା ସହ କାହା ସ୍କୁଟର ପଛରେ ବସିବା ମଧ୍ୟ ଛାଡ଼ି ଦେଇଛି” ବୋଲି କହିଥିଲେ ମନୋହର ପାରିକର ।