ଶେଷ ନିଶ୍ୱାସ ପର୍ଯ୍ୟନ୍ତ ‘ଦାଉଦ ଭାଇ’ ସହିତ ରହିବି : ଛୋଟା ସକିଲ୍
ମୁମ୍ବାଇ: କୁଖ୍ୟାତ ଅଣ୍ଡରଓ୍ଵାର୍ଲଡ୍ ଡନ୍ ଦାଉଦ୍ ଇବ୍ରାହିମ୍ ସହ ମତଭେଦ ଖବରକୁ ଅସ୍ୱୀକାର କରିଛି ତାହାର ଘନିଷ୍ଠ ସହଯୋଗୀ ଛୋଟା ସକିଲ୍ । ଶେଷ ନିଶ୍ୱାସ ପର୍ଯ୍ୟନ୍ତ ‘ଭାଇ’ ସହିତ ରହିବ ବୋଲି ସେ କହିଛି ।
Sambad is now on WhatsApp
Join and get latest news updates delivered to you via WhatsApp
ଏକ ଜାତୀୟ ସ୍ତରର ଗଣମାଧ୍ୟମରେ ପ୍ରକାଶିତ ଖବର ଅନୁସାରେ ଦାଉଦ ସହ ମତଭେଦ କାରଣରୁ ଅଲଗା ହୋଇ ରହୁଥିବା ଖବରକୁ ଗୁଜବ ବୋଲି କହିଛି ସକିଲ । ଭାଇ ଠାରୁ ଅଲଗା ହେବାର ପ୍ରଶ୍ନ ଉଠୁନାହିଁ ବୋଲି ସେ କହିବା ସହ ଶେଷ ନିଶ୍ୱାସ ପର୍ଯ୍ୟନ୍ତ ଦାଉଦ ସହ ରହିବା କଥା କହିଛି ।
କିଛିଦିନ ତଳେ ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁସାରେ ପ୍ରାୟ ତିନି ଦଶନ୍ଧିରୁ ଅଧିକ ସମୟ ଧରି ଏକାଠି ରହିବା ପରେ ଉଭୟ ଅଲଗା ହୋଇଯାଇଛନ୍ତି । ଏପରିକି ସକିଲ କରାଚୀର ସମ୍ଭ୍ରାନ୍ତ କ୍ଲିଫଟନ ଏରିଆରୁ ବାହାରି ଅଲଗା ରହୁଛି । ୮୦ ଦଶନ୍ଧିରେ ଭାରତରୁ ପଳାୟନ ପରଠାରୁ ଦାଉଦ ଇବ୍ରାହିମ ଉକ୍ତ କ୍ଲିଫଟନ ଏରିଆରେ ରହୁଥିବା କୁହାଯାଉଛି । ଦାଉଦର ଛୋଟ ଭାଇ ଅନିସ ଇବ୍ରାହିମ ଡି-କମ୍ପାନିର କାରବାର କ୍ଷେତ୍ରରେ ହସ୍ତକ୍ଷେପ କରୁଥିବା ନେଇ ସକିଲ ଅସନ୍ତୁଷ୍ଟ ଥିଲା ଉକ୍ତ ରିପୋର୍ଟରେ ପ୍ରକାଶ ପାଇଥିଲା । ଏହାକୁ ନେଇ ଦାଉଦ ଓ ସକିଲ ମଧ୍ୟରେ ଯୁକ୍ତିତର୍କ ହେବା ପରେ ସକିଲ ଅଲଗା ରହୁଛି ।
ତେବେ କେତେକ ରିପୋର୍ଟ ଅନୁସାରେ ଦାଉଦ ଓ ସକିଲ ମଧ୍ୟରେ ମତଭେଦ ହୋଇଥିଲେ ମଧ୍ୟ ପାକିସ୍ତାନର କୁଖ୍ୟାତ ଗୁଇନ୍ଦା ସଂଗଠନ ଆଇଏସଆଇର ହସ୍ତକ୍ଷେପ ଫଳରେ ଉଭୟ ପକ୍ଷ ମଧ୍ୟରେ ମିଳାମିଶା ହୋଇଯାଇଛି । କାରଣ ଉଭୟ ଏକାଠି ନ ରହିଲେ ଭାରତ ବିରୋଧୀ ଅଭିଯାନ ବାଧାପ୍ରାପ୍ତ ହେବାର ଆଶଙ୍କା କରୁଛି ଆଇଏସଆଇ ।