ଆଫଗାନ ହୋଟେଲରେ ତାଲିବାନ ଆକ୍ରମଣ : ୬ ମୃତ, ୧୫୦ ଅତିଥି ଉଦ୍ଧାର
କାବୁଲ: ୨୦୧୧ରେ ମୁମ୍ବାଇ ତାଜ୍ ହୋଟେଲରେ ହୋଇଥିବା ଆକ୍ରମଣ ଢାଞ୍ଚାରେ ତାଲିବାନ ଆତଙ୍କବାଦୀମାନେ ଆଫଗାନିସ୍ତାନ ରାଜଧାନୀ କାବୁଲ ସ୍ଥିତ ଇଣ୍ଟରକଣ୍ଟିନେଣ୍ଟାଲ ହୋଟେଲରେ ଆକ୍ରମଣ କରି ୬ ଜଣଙ୍କୁ ହତ୍ୟା କରିଛନ୍ତି। ୪ ଜଣ ସଶସ୍ତ୍ର ତାଲିବାନ ଆତଙ୍କବାଦୀ ଗତ ରାତିରେ ହୋଟେଲରେ ଧସେଇ ପଶି ଆଖିବୁଜା ଗୁଳିମାଡ଼ ଆରମ୍ଭ କରିବାରୁ ୫ ଜଣ ଆଫଗାନୀ ଏବଂ ଜଣେ ବିଦେଶୀ ନାଗରିକଙ୍କ ମୃତ୍ୟୁ ଘଟିଛି। ସୁରକ୍ଷା ବାହିନୀ ଗୁଳିରେ ଆକ୍ରମଣକାରୀ ୪ ଆତଙ୍କବାଦୀ ନିପାତ ହୋଇଛନ୍ତି। ଦୀର୍ଘ ୧୨ ଘଣ୍ଟାର ଅପରେସନ ପରେ ଆତଙ୍କବାଦୀଙ୍କ କବ୍୍ଜାରୁ ହୋଟେଲକୁ ମୁକ୍ତ କରାଯାଇଛି । ଗୁଳିକାଣ୍ଡରେ ହୋଟେଲର ଦୁଇ ପଟେ ନିଆଁ ଲାଗିଯାଇଥିଲା। ତେବେ ସୁରକ୍ଷା ବାହିନୀର ରଣନୀତି ସଫଳ ହୋଇଥିବାରୁ ହୋଟେଲରେ ଥିବା ୧୫୦ ଜଣ ଅତିଥିଙ୍କୁ ସୁରକ୍ଷିତ ଉଦ୍ଧାର କରାଯାଇଛି ଏବଂ ଆତଙ୍କବାଦୀଙ୍କ ଏକ ବଡ଼ ନରସଂହାର ଉଦ୍ୟମ ପଣ୍ଡ ହୋଇଛି । ଏହି ହୋଟେଲରେ ଆଜି ଆଇଟି ସେକ୍ଟରକୁ ନେଇ ଏକ ଅନ୍ତର୍ଜାତୀୟ ସେମିନାର ଅନୁଷ୍ଠିତ ହେବାର ଥିଲା। ଏଥିରେ ଭାଗ ନେବାପାଇଁ ବିଭିନ୍ନ ଦେଶର ଆଇଟି ଅଧିକାରୀମାନେ ଆସିଥିଲେ। ଅତିଥିମାନଙ୍କୁ ପଣବନ୍ଦୀ କରି ସଂହାରଲୀଳା ଘଟାଇବାକୁ ତାଲିବାନ ଆତଙ୍କବାଦୀମାନେ ଯୋଜନା କରିଥିଲେ।