କ’ଣ ଅରୁଣାଚଳପ୍ରଦେଶକୁ ଅଧିକାର କରିବାକୁ ଗୋପନ ଯୋଜନା କରୁଛି ଚୀନ ?
ବେଜିଂ : ଗତ ବର୍ଷ ଡୋକଲାମରେ ଚୀନ ଓ ଭାରତୀୟ ସେନା ମୁହାଁମୁହିଁ ହେବା ପରେ ଦୁଇ ଦେଶ ମଧ୍ୟରେ ସମ୍ପର୍କର ଅବନତି ହୋଇଥିଲା । ଏହା ପରେ ଗତ ମାସରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଚୀନ ରାଷ୍ଟ୍ରପତି ସି ଜିଙ୍ଗ ପିଂ ଙ୍କ ମଧ୍ୟରେ ହୋଇଥିବା ଅନୌପଚାରିକ ସାକ୍ଷାତ ଅବସରରେ ଦୁଇ ଦେଶ ଉତ୍ତେଜନା ହ୍ରାସ କରି ସଂପର୍କକୁ ବଢାବା ଉପରେ ଗୁରୁତ୍ୱ ଦେଇଥିଲେ । କିନ୍ତୁ ଚୀନ କଣ ସତରେ ନିଜର ସାମ୍ରାଜ୍ୟବାଦୀ ଚିନ୍ତାଧାରା ଛାଡିପାରିବ, ତାହାକୁ ନେଇ ସଂଦେହ ରହିଛି ।
Sambad is now on WhatsApp
Join and get latest news updates delivered to you via WhatsApp
ହଂକଂ ସମ୍ବାଦପତ୍ର ସାଉଥ ଚାଇନା ମଣ୍ଣିଂ ପୋଷ୍ଟରେ ପ୍ରକାଶିତ ଏକ ଖବର ଅନୁସାରେ ଚୀନ ଅରୁଣାଚଳ ପ୍ରଦେଶକୁ ଲାଗିଥିବା ସୀମାରେ ଥିବା ଲୁଜ୍ ଗ୍ରାମରେ ସୁନା, ରୁପା ଓ ଅନ୍ୟକେତେକ ମୂଲ୍ୟବାନ ଧାତୁ ଗଚ୍ଛିତ ଥିବା ସନ୍ଧାନ ପାଇଛି । ଏହା ଫଳରେ ଚୀନ ଉକ୍ତ ଅଞ୍ଚଳରେ ଖଣି ଖନନ ପାଇଁ ନିଷ୍ପତ୍ତି ନେଇଛି । ଏପରି ହେଲେ ଭାରତର ଅରୁଣାଚଳ ପ୍ରଦେଶ ପ୍ରତି ବିପଦ ସୃଷ୍ଟି ହେବାର ଆଶଙ୍କା ରହିଛି । ଚୀନ ଅରୁଣାଚଳକୁ ନିଜର ବୋଲି ଦାବି କରୁଛି । ଏହା ଦକ୍ଷିଣ ତିବ୍ଦତର ଅଂଶ ବୋଲି ଚୀନ କହୁଛି । ସୀମାରେ ଚୀନ ପକ୍ଷରୁ ଖଣି ଖନନ ହେଲେ ଉକ୍ତ ଅଂଚଳରେ ଜନସଂଖ୍ୟା ଓ ବିଭିନ୍ନ କାର୍ଯ୍ୟକଳାପ ବଢିବ । ଏହି ମୌକାରେ ଚୀନ ଅରୁଣାଚଳ ଉପରେ ମଧ୍ୟ ନିଜର ଦାବିକୁ ଆହୁରି ତୀବ୍ର କରିବ । ଏପରି ହେଲେ ଦକ୍ଷିଣ ଚୀନ ସାଗର ପରି ଦକ୍ଷିଣ ତିବ୍ଦତ ଉପରେ ମଧ୍ୟ ଚୀନ ନିଜର ଆଧିପତ୍ୟ ଜାହିର କରିବ ବୋଲି ଏହି ରିପୋର୍ଟରେ କୁହାଯାଇଛି ।