ଧରାପଡ଼ିଲା ଆଉ ଏକ କର୍ପୋରେଟ୍ ହସପିଟାଲର କାରନାମା
ଡେଙ୍ଗୁରେ ମୃତ ବାଳିକା ପାଇଁ ୧୬ ଲକ୍ଷ ଟଙ୍କାର ବିଲ୍ ପଠାଇଲା ଫୋର୍ଟିସ୍
ଗୁରୁଗ୍ରାମ : ନୂଆଦିଲ୍ଲୀର ମାକ୍ସ ହସପିଟାଲ୍ରେ ନବଜାତ ଶିଶୁପ୍ରତି ଅବହେଳା ଘଟଣା ପରି ଆଉ ଏକ ଘଟଣା ସାମନାକୁ ଆସିଛି । ଏଥର ଅଭିଯୋଗଟି ରହିଛି ଦେଶର ପ୍ରମୁଖ କର୍ପୋରେଟ୍ ହସପିଟାଲ ଫୋର୍ଟିସ୍ ବିରୁଦ୍ଧରେ । ଗୁରୁଗ୍ରାମରେ ଅବସ୍ଥିତ ଏହି ହସପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଥିବା ୭ ବର୍ଷୀୟ ବାଳିକା ଆଦ୍ୟା ସିଂ ମାମଲାର ତଦନ୍ତ ରିପୋର୍ଟରେ ଅନେକ ଚମକପ୍ରଦ ତଥ୍ୟ ସାମନାକୁ ଆସିଛି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସରକାରଙ୍କ ପକ୍ଷରୁ କରାଯାଇଥିବା ଏହି ତଦନ୍ତରୁ ଜଣାପଡିଛି ଯେ ଡେଙ୍ଗୁ ଜ୍ୱରରେ ପୀଡ଼ିତ ହୋଇ ଆଦ୍ୟା ଫୋର୍ଟିସ ହସପିଟାଲରେ ମୃତ୍ୟୁବରଣ କରିଥିଲା । କିନ୍ତୁ ସେ ମରିବା ପରେ ହସପିଟାଲ ତରଫରୁ ତାର ପିତାମାତାଙ୍କୁ ପ୍ରାୟ ୧୬ ଲକ୍ଷ ଟଙ୍କାର ବିଲ୍ ପୈଠ ପାଇଁ କୁହାଯାଇଥିଲା, ଯାହାକି ଏହି ଧରଣର ଚିକିତ୍ସା ଲାଗି ଆବଶ୍ୟକ ସ୍ୱାଭାବିକ ଦେୟଠାରୁ ପ୍ରାୟ ୭୦୦ ଗୁଣ ଅଧିକ । ତଦନ୍ତରୁ ଆହୁରି ମଧ୍ୟ ଜଣାପଡିଛି ଯେ ହସପିଟାଲ ପକ୍ଷରୁ ଔଷଧ ବାବଦ ବ୍ୟୟକୁ ୧୦୮ ପ୍ରତିଶତ ଓ ଅନ୍ୟାନ୍ୟ ଆନୁଷଙ୍ଗିକ ବ୍ୟୟକୁ ୭୦୦ ଗୁଣ ବଢାଇ ଦର କଷାଯାଇଥିଲା । ଶିଶୁଟିର ମୃତ୍ୟୁ ପରେ ଏତେ ବଡ଼ ପରିମାଣର ବିଲ୍ ଦେଖି ତାହାର ଅଭିଭାବକଙ୍କ ହୋସ ଉଡିଯାଇଥିଲା ।
ସୋସିଆଲ ମିଡିଆ ଓ ଗଣମାଧ୍ୟମରେ ଏ ନେଇ ଚର୍ଚ୍ଚା ହେବା ପରେ ହରିୟାଣା ସରକାର ଏକ ତଦନ୍ତ ନିର୍ଦ୍ଦେଶ ଦେଇଥିଲେ । ସେପଟେ ମାମଲା କ୍ରମେ ଗୁରୁତର ଆକାର ଗ୍ରହଣ କରୁଥିବା ଦେଖି ହସପିଟାଲ କର୍ତ୍ତୃପକ୍ଷ ପୀଡିତାର ପିତା ଜୟନ୍ତ ସିଂଙ୍କୁ ଉକ୍ତ ଅର୍ଥ ଫେରାଇବାକୁ ପ୍ରସ୍ତାବ ଦେବା ସହ ଆଉ ୨୫ ଲକ୍ଷ ଟଙ୍କା ଯାଚିଥିବା ସେ ଅଭିଯୋଗ କରିଛନ୍ତି । କିନ୍ତୁ ହସପିଟାଲ ପରିଚାଳନା ପକ୍ଷରୁ ଏହି ଅଭିଯୋଗକୁ ଅସ୍ୱୀକାର କରାଯାଇଛି ।