ଅଯୋଧ୍ୟାରେ ରାମ ମନ୍ଦିରର ନିର୍ମାଣ କାର୍ଯ୍ୟ ଆରମ୍ଭ
ଅଯୋଧ୍ୟା : ଅଯୋଧ୍ୟାଠାରେ ବହୁପ୍ରତୀକ୍ଷିତ ରାମ ମନ୍ଦିରର ନିର୍ମାଣ କାର୍ଯ୍ୟ ଆରମ୍ଭ ହୋଇଛି । ମଙ୍ଗଳବାରଦିନ ରାମ ଜନ୍ମଭୂମି ତୀର୍ଥକ୍ଷେତ୍ର ଟ୍ରଷ୍ଟର ଅଧ୍ୟକ୍ଷ ମହନ୍ତ ଗୋପାଳ ଦାସ ଅସ୍ଥାୟୀ ମନ୍ଦିରରେ ଥିବା ରାମଲାଲା ବିରାଜମାନଙ୍କୁ ଦର୍ଶନ କରିବା ସହ ରାମ ମନ୍ଦିର ନିର୍ମାଣ ସଂପର୍କରେ ଆନୁଷ୍ଠାନିକ ଘୋଷଣା କରିଥିଲେ । ସେ ମଧ୍ୟ ଆଜି ସକାଳେ ମନ୍ଦିର ନିର୍ମାଣ ପାଇଁ ଭୂମିପୂଜା କରିଥିଲେ । ଗତ ୨୭ ବର୍ଷ ଧରି ଏକ ତମ୍ବୁରେ ଥିବା ରାମଲାଲାଙ୍କୁ ମାର୍ଚ୍ଚ ୨୫ ତାରିଖରେ ମାନସ ଭବନସ୍ଥିତ ଏକ ଅସ୍ଥାୟୀ ମନ୍ଦିରକୁ ସ୍ଥାନାନ୍ତରିତ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ମନ୍ଦିର ଜମିର ସମତଳିକରଣ ଚାଲିଥିବାବେଳେ ଖନନରୁ ଏକ ପୁରାତନ ମନ୍ଦିରର ଅବଶେଷ ଆବିଷ୍କୃତ ହୋଇଥିଲା, ଯାହାକି ଆପାତତଃ ଦର୍ଶାଉଛି ଯେ ଅଯୋଧ୍ୟାରେ ବିବାଦୀୟ ସ୍ଥାନରେ ପୂର୍ବରୁ ଏକ ବୃହତ ମନ୍ଦିର ଥିଲା । ଆବିଷ୍କୃତ ସାମଗ୍ରୀ ମଧ୍ୟରେ ଥିଲା ପ୍ରସ୍ତର ଖୋଦିତ କାରୁକାର୍ଯ୍ୟ, ଏକ ୫ ଫୁଟ ଲମ୍ବ ଶିବଲିଙ୍ଗ, ୧୩ଟି ପ୍ରସ୍ତର ସ୍ତମ୍ଭ, ବିଭିନ୍ନ ଦେବଦେବୀଙ୍କ ଭଗ୍ନ ମୂର୍ତ୍ତି , କଳସ ଆଦି ।
ଉଲ୍ଲେଖଯୋଗ୍ୟ ଯେ, ଗତ ନଭେମ୍ବର ୯ ତାରିଖରେ ସୁପ୍ରିମକୋର୍ଟର ଏକ ୫ ଜଣିଆ ବେଞ୍ଚ ଅଯୋଧ୍ୟା ଜମିବିବାଦ ମାମଲାର ରାୟ ଶୁଣାଇଥିଲେ। ଏହି ରାୟରେ ବିବାଦୀୟ ସ୍ଥାନରେ ରାମ ମନ୍ଦିର ନିର୍ମାଣ ପାଇଁ ନିର୍ଦ୍ଦେଶ ଦିଆଯାଇଥିବାବେଳେ ମୁସଲିମ ପକ୍ଷଙ୍କୁ ଅନ୍ୟ ଏକ ସ୍ଥାନରେ ମସଜିଦ ନିର୍ମାଣ ପାଇଁ ୫ ଏକର ଜମି ପ୍ରଦାନ କରିବାକୁ ସରକାରଙ୍କୁ ନିର୍ଦ୍ଦେଶ ଦିଆଯାଇଥିଲା ।