ହାତରେ ବନ୍ଧୁକ ଧରି ଖୋଲାଖୋଲି ଧମକ ଦେଲେ ଆରଜେଡି ନେତା, କହିଲେ-ଆମେ ଗୁଳି ଚଳାଇବାକୁ ପ୍ରସ୍ତୁତ ଅଛୁ
ନୂଆଦିଲ୍ଲୀ: ଆସନ୍ତାକାଲି ଇଭିଏମରୁ ସିଲ ଖୋଲିବା ସହ ଫିଟିବ ନେତାଙ୍କ ଭାଗ୍ୟ । ୨୦୧୯ ନିର୍ବାଚନ ଫଳାଫଳ ଘୋଷଣା ହେବା ପୂର୍ବରୁ ବିହାରରେ ରାଜନୀତି ପାଣିପାଗ ଉଷ୍ମ ହୋଇଛି । ଆରଏଲଏସପି ପ୍ରମୁଖ ଉପେନ୍ଦ୍ର କୁଶୱାହାଙ୍କ ବିବାଦୀୟ ବୟାନକୁ ସମର୍ଥନ କରିବା ସହ ଭଭୁଆର ପୂର୍ବତନ ବିଧାୟକ ତଥା ବକ୍ସର ଲୋକସଭା ଆସନରୁ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢୁଥିବା ରାମଚନ୍ଦ୍ର ଯାଦବ ମଧ୍ୟ ବଡ ବୟାନ ଦେଇଛନ୍ତି । ଯାହା ଫଳାଫଳ ଆସିବା ପୂର୍ବରୁ ବିହାର ସମେତ ଜାତୀୟ ରାଜନୀତିରେ ଭ୍ରୃକୁଞ୍ଚନ ସୃଷ୍ଟି କରିଛି । ହାତରେ ବନ୍ଧୁକ ଧରି ଖୋଲାଖୋଲି ଧମକ ଦେଇଛନ୍ତି ରାମଚନ୍ଦ୍ର ।
Sambad is now on WhatsApp
Join and get latest news updates delivered to you via WhatsApp
ଗଣତନ୍ତ୍ରକୁ ବଞ୍ଚାଇବା ପାଇଁ ଗୁଳି ଚଳାଇବାକୁ ପ୍ରସ୍ତୁତ ବୋଲି ପ୍ରେସ କନଫରେନ୍ସରେ ରାମଚନ୍ଦ୍ର କହିଛନ୍ତି। କେବଳ ମହାଗଠବନ୍ଧନ ନେତା ଆଦେଶ ଦିଅନ୍ତୁ ମୁଁ ଗୁଳି ଚଳାଇବାକୁ ମଧ୍ୟ ପ୍ରସ୍ତୁତ । ଏହାପୂର୍ବରୁ ଉପେନ୍ଦ୍ର କୁଶୱାହା ହିଂସା ସୃଷ୍ଟି କରିବା ଭଳି ବୟାନ ଦେଇଥିଲେ । ପ୍ରଥମେ ବୁଥ୍ ଲୁଟ୍ ଏବେ ଫଳାଫଳକୁ ଲୁଟ୍ କରିବାକୁ ଚେଷ୍ଟା କରାଯାଉଛି । କିନ୍ତୁ ଯଦି ଏଭଳି ହୁଏ ତେବେ ରାସ୍ତାରେ ରକ୍ତର ନଦୀ ବହିବ ବୋଲି କୁଶୱାହା କହିଥିଲେ।
ଏଭଳି ବିବାଦୀୟ ବୟାନ ପାଇଁ କୁଶୱାହାଙ୍କୁ ଟାର୍ଗେଟ କରିଛି ଜେଡିୟୁ । ଆମ କାର୍ଯ୍ୟକର୍ତ୍ତା ଚୁଡି ପିନ୍ଧି ନାହାନ୍ତି ବୋଲି ଜେଡିୟୁ କହିଛି । ସେହିଭଳି ଏଲଜେପି ପ୍ରମୁଖ ରାମବିଳାସ ପାଶୱାନ କହିଛନ୍ତି, ଲୋକତନ୍ତ୍ରକୁ କମଜୋର କରିବାକୁ ଚେଷ୍ଟା କରାଗଲେ ତାହା ବିରୋଧରେ ଲଢେଇ କରିବା ଆବଶ୍ୟକ । ଏଥିପାଇଁ କାର୍ଯ୍ୟକର୍ତ୍ତା ଡିଫେନ୍ସିଭ ହେବାର ଆବଶ୍ୟକତା ନାହିଁ ।