ନୂଆଦିଲ୍ଲୀ: ଆପଣଙ୍କୁ କେଉଁ ଫାଷ୍ଟଫୁଡ ବେଶୀ ପସନ୍ଦ? କେଉଁ ଖାଦ୍ୟ ଲଞ୍ଚ୍ ବା ଡିନରରେ ଖାଇବାକୁ ପସନ୍ଦ କରନ୍ତି ? ଅନଲାଇନରେ କ’ଣ ମଗେଇ ଖାଇବାକୁ ଆପଙ୍କ ଇଚ୍ଛା? ଇଣ୍ଡିଆନ, ଚାଇନିଜ୍ ଅଥବା ମୋଗଲାଇ ?
Sambad is now on WhatsApp
Join and get latest news updates delivered to you via WhatsApp
ଏସବୁ ପ୍ରଶ୍ନର ଉତ୍ତର ଦେଇଛି ଅନଲାଇନ ଫୁଡ୍ ଅର୍ଡରିଂ ଏଣ୍ଡ ଡେଲିଭରି ପ୍ଲାଟଫର୍ମ ସ୍ୱିଗି ଡଟ୍ କମ ଦ୍ୱାରା କରାଯାଇଥିବା ଏକ ସର୍ଭେ । ଏହି ସର୍ଭରେ କେତେକ ଅଜବ ଫଳାଫଳ ମିଳିଛି । ଏହା ଅନୁସାରେ ଭାରତୀୟମାନେ ଅନଲାଇନରେ ଅଧିକ ସର୍ଚ୍ଚ କରୁଥିବା ଖାଦ୍ୟ ଓ ଅଧିକ ଅର୍ଡର କରୁଥିବା ଖାଦ୍ୟ ଅଲଗା ।
୨୦୧୭ରେ ଭାରତୀୟମାନେ ଅନଲାଇନରେ ସର୍ବାଧିକ ସର୍ଚ୍ଚ କରିଥିବା ଖାଦ୍ୟ ହେଉଛି ଇଟାଲିଆନ ଖାଦ୍ୟ ପିଜା । ପିଜା ସଂପର୍କରେ ଅଧିକରୁ ଅଧିକ ଖାଦ୍ୟପ୍ରେମୀ ଜାଣିବାକୁ ଚେଷ୍ଟା କରିଛନ୍ତି । କାରଣ ଏହା ପ୍ରାୟ ୫ ଲକ୍ଷ ଥର ସର୍ଚ୍ଚ ହୋଇଛି । ଏହା ପଛକୁ ରହିଛି ବର୍ଗର, ଚିକେନ, କେକ୍ ଓ ମୋମୋ । କିନ୍ତୁ ବୋଧହୁଏ ଲୋକମାନେ ଏଗୁଡ଼ିକୁ ଖାଇବାକୁ ସେତେଟା ପସନ୍ଦ କରିନାହାନ୍ତି । କାରଣ ଭାରତୀୟମାନେ ଲଞ୍ଚ୍ ଓ ଡିନର ପାଇଁ ଯେଉଁଖାଦ୍ୟକୁ ସବୁଠାରୁ ଅଧିକ ଅର୍ଡର କରି ଖାଇଛନ୍ତି ( ଅନଲାଇନରେ ବା ଫୋନ ମାଧ୍ୟମରେ) ତାହା ହେଉଛି ବିରିୟାନି ( ଚିକେନ, ମଟନ ଓ ଭେଜ୍ ବିରିୟାନିକୁ ମିଶାଇ) । ଏହା ପଛକୁ ରହିଛି ପନିର ବଟର ମସାଲା, ମସାଲା ଦୋସା ଓ ଡାଲ ମଖନି ।
ସେହିପରି ଜଳଖିଆ ପାଇଁ ଅର୍ଡର କରାଯାଇଥିବା ସବୁଠାରୁ ଲୋକପ୍ରିୟ ଖାଦ୍ୟସବୁ କ’ଣ, ବୋଲି ଯଦି ପ୍ରଶ୍ନ କରାଯାଏ ତେବେ ଆପଣ କହିବେ ବୋଧହୁଏ ଆଧୁନିକ ଫାଷ୍ଟଫୁଡ୍ । କିନ୍ତୁ ସର୍ଭେରେ ଠିକ ଏହାର ବିପରୀତ ଫଳାଫଳ ବାହାରିଛି । ଲୋକମାନେ ପାରମ୍ପରିକ ଜଳଖିଆ ଯଥା ପାଓଭାଜି, ସାମୋସା, ଆଳୁ ଚିପ୍ସ, ଚିକେନ ରୋଲ ଇତ୍ୟାଦି ମଗାଇ ଅଧିକ ଖାଇଛନ୍ତି । ଏହି ସର୍ଭେଟି ଭାରତର କେତେକ ପ୍ରମୁଖ ସହର ଯଥା ମୁମ୍ବାଇ, ଦିଲ୍ଲୀ, କୋଲକତା, ଚେନ୍ନାଇ, ବାଙ୍ଗାଲୋର, ହାଇଦ୍ରାବାଦ, ପୁନେରେ କରାଯାଇଥିଲା ।