ଭୁବନେଶ୍ୱର: ଗତକାଲି ଭଳି ଆଜି ମଧ୍ୟ ଛୁଟି ଦିନରେ ଭୁବନେଶ୍ୱରର ଦୁଇଟିଯାକ ଆର୍ଟିଓ ଅଫିସ୍ ଖୋଲା ରହିଥିଲା। ସକାଳ ସାଢ଼େ ୯ଟାରୁ ରାତି ୯ଟା ପର୍ଯ୍ୟନ୍ତ ଗହଳଚହଳ ଲାଗି ରହିଥିଲା। ଲାଇସେନ୍ସ ପାଇଁ ଆଜି ଆରଟିଓ-୧ରେ ୧ହଜାର ୫ଶହ ଓ ଆରଟିଓ-୨ରେ ୭ଶହ ଆବଦେନ ଆସିଥିଲା। ସମସ୍ତ ଆବେଦନକୁ ଗ୍ରହଣ କରାଯିବା ସହ ସ୍ଲଟ୍ ତାରିଖ ଧାର୍ଯ୍ୟ କରାଯାଇଥିଲା। ଆଜିର ତାରିଖକୁ ହିସାବକୁ ନେଲେ ଗତ ୧ତାରିଖରୁ ଅଦ୍ୟାବଧି ଲାଇସେନ୍ସ ପାଇଁ ୨୦ହଜାର ଆବେଦନ ଆରଟିଓ-୧କୁ ଆସିଥିବା ବେଳେ ୧୮ ହଜାର ଆବେଦନ ଆରଟିଓ-୨ ଗ୍ରହଣ କରିଥିବା ଜଣାପଡ଼ିଛି। ଅର୍ଥାତ୍ ୧୫ଦିନ ମଧ୍ୟରେ ୩୮ହଜାର ଆବେଦନ ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୋସିଆଲ ମିଡିଆ ବାଉଳା କରୁଛି। ବିଭିନ୍ନ ଗୁଜବକୁ ନେଇ ଚିନ୍ତାରେ ପଡ଼ିଛନ୍ତି ଚାଳକ। ଜଣେ ୬ବର୍ଷରୁ କମ୍ ବୟସର ଶିଶୁ ଗାଡ଼ିର ଆଗରେ ବସିଲେ ସିଟ୍ ବେଲ୍ଟ ବାନ୍ଧିବ କି ନାହିଁ, କମିସନରେଟ୍ ପୁଲିସ ଫେସ୍ବୁକ୍ ପେଜ୍ରେ ଲୋକେ ପ୍ରଶ୍ନ କରିଛନ୍ତି। ଏହି ପ୍ରଶ୍ନର ଉତ୍ତର ପୁଲିସ କମିସନର ଆରଟିଓଙ୍କଠାରୁ ତଲବ କରିଛନ୍ତି। କେବଳ ଏହି ପ୍ରଶ୍ନ ନୁହେଁ, ସୋସିଆଲ ମିଡିଆରେ ଏଭଳି ଅନେକ ପ୍ରଶ୍ନର ଉତ୍ତର ଖୋଜିଛନ୍ତି ଲୋକେ। ପରିବହନ ବିଭାଗ ଟ୍ବିଟର୍ ପେଜ୍, କମିସନରେଟ୍ ପୁଲିସ ଟୁଇଟର ପେଜ୍ରେ ଲୋକେ ଅନେକ ପ୍ରଶ୍ନର ଉତ୍ତର ଜାଣିବାକୁ ଚାହିଛନ୍ତି। ବାପାଙ୍କ ଗାଡ଼ି ଯଦି ପୁଅ କିମ୍ବା ଝିଅ ଚଳାଉଛନ୍ତି, ତେବେ ଜରିମାନା ଦେବାକୁ ପଡ଼ିବ କି ନାହିଁ ବୋଲି ପ୍ରଶ୍ନର ଉତ୍ତରରେ ଏଭଳି ଗୁଜବକୁ ବିଶ୍ବାସ କରିବା ଉଚିତ ନୁହେଁ ବୋଲି ଆରଟିଓ ପକ୍ଷରୁ ସ୍ପଷ୍ଟ କରାଯାଇଛି। କିନ୍ତୁ ଚାଳକ ପାଖରେ ବୈଧ ଲାଇସେନ୍ସ ଥିବା ଜରୁରି ବୋଲି କୁହାଯାଇଛି। ସେହିଭଳି ବାଇକ୍ ଚଳାଇବାକୁ ହେଲେ ଜୋତା ପିନ୍ଧିବା ବାଧ୍ୟତାମୂଳକ, ଚପଲ ପିନ୍ଧି ଗାଡ଼ି ଚଳାଇଲେ ଜରିମାନା ଦେବାକୁ ପଡ଼ିବ। ଏଭଳି ଏକ ଚର୍ଚ୍ଚା ସୋସିଆଲ ମିଡିଆରେ ଘୂରି ବୁଲିବା ପରେ ଏଭଳି ଗୁଜବଠାରୁ ଦୂରେଇ ରହିବାକୁ ପୁଲିସ କମିସନର ସୁଧାଂଶୁ ଷଡ଼ଙ୍ଗୀ ପରାମର୍ଶ ଦେଇଥିଲେ।
ମୋଟର ଯାନ ଆଇନ ଅନୁଯାୟୀ, କେତେକ ନିର୍ଦ୍ଦିଷ୍ଟ ଦଫାରେ ପୁଲିସ ଜରିମାନା ଆଦାୟ କରିବା ପାଇଁ କ୍ଷମତା ପାଇଛି। ସେଥିରେ ପ୍ରଦୂଷଣ ନିୟନ୍ତ୍ରଣାଧୀନ ପ୍ରମାଣପତ୍ର(ପିୟୁସି) ପୁଲିସ ଯାଞ୍ଚ କରିବା କ୍ଷମତା ପୁଲିସକୁ ଦିଆଯାଇ ନାହିଁ। ଏହାକୁ କେବଳ ଏମ୍ଭିଆଇ ଯାଞ୍ଚ କରିପାରିବେ। ସୋସିଆଲ ମିଡିଆରେ ଚର୍ଚ୍ଚା ହେବା ପରେ ପରିବହନ ବିଭାଗ ସ୍ପଷ୍ଟ କରିଛି ଯେ ପୁଲିସ ଏହାକୁ ଯାଞ୍ଚ କରିପାରିବ ନାହିଁ। ସେହିଭଳି ଗାଡ଼ିରେ କାଗଜପତ୍ର ନଥିଲେ ପୁଲିସ ନଗଦ ଜରିମାନା ମାଗି ପାରିବ ନାହିଁ। କେବଳ ଚାଲାଣ କାଟି କାଗଜପତ୍ର ପରେ ଦେଖାଇବା ପାଇଁ ଚାଳକକୁ ସୁଯୋଗ ଦେବ। ଏଭଲି ଏକ ଚର୍ଚ୍ଚା ହେବା ପରେ ପୁଲିସ କମିସନର ସ୍ପଷ୍ଟ କରିଛନ୍ତି ଯେ କାଗଜପତ୍ର ବିନା ଧରାପଡ଼ିଲେ ଲୋକଙ୍କ ପାଖରେ ଦୁଇଟି ବିକଳ୍ପ ଥାଏ। ଗୋଟିଏ ନଗଦ ଜରିମାନା ଦେବେ, ନଚେତ୍ ଚାଲାଣ କଟାଯାଇ କୋର୍ଟରେ ଦାଖଲ ହେବ। କୋର୍ଟ ଗଲେ ଓକିଲ ନିୟୋଜିତ ହେବେ। ସମୟ ନଷ୍ଟ ହେବ। ଏହାକୁ ଏଡାଇବା ପାଇଁ ଡିଜିଟାଲ ଉପାୟରେ ନଥି ରଖିବା କିମ୍ବା ନଗଦ ଟଙ୍କା ଦେବା ଶ୍ରେୟସ୍କର।