ଓଡ଼ିଆ ଉଇକି ପାଠାଗାରର ଜନ୍ମ ଦିବସ
ଭୁବନେଶ୍ୱର : ଓଡ଼ିଶା ଉଇକି ପାଠାଗାରର ୩ୟ ଜନ୍ମ ଦିବସ ଆଜି ହୋଟେଲ୍ ତାଜ୍ ଓଡ଼ିଶା ପରିସରରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ‘ଓଡ଼ିଆ ଭାଷାରେ ଡିଜିଟାଲ୍ ପାଠାଗାରର ଆବଶ୍ୟକତା ଓ ଓଡ଼ିଆ ସାହିତ୍ୟ ସଂରକ୍ଷଣ’ ଉପରେ ଆଲୋଚନା କରାଯାଇଥିଲା।
Sambad is now on WhatsApp
Join and get latest news updates delivered to you via WhatsApp
ବିଶିଷ୍ଟ ଲେଖିକା ଶକୁନ୍ତଳା ବଳିୟାରସିଂହ ଏବଂ ଗୀତିକାର ତଥା କବି ବିଜୟ ମଲ୍ଲ ଅତିଥି ଭାବେ ଯୋଗଦେଇ କହିଲେ, ସଂପ୍ରତି ଡିଜିଟାଲ୍ ସେବା ସହ ଅଧିକାଂଶ ବ୍ୟକ୍ତି ସଂଶ୍ଳିଷ୍ଟ। ଏହି ଦୃଷ୍ଟିରୁ ଓଡ଼ିଆରେ ଡିଜିଟାଲ୍ ମାଧ୍ୟମରେ ତଥ୍ୟ ଓ ବହି ଉପଲବ୍ଧ ହେବା ଏକ ସ୍ୱାଗତଯୋଗ୍ୟ ପଦକ୍ଷେପ। ଏହି ଉଇକି ପାଠାଗାରରେ ୭୦୦ରୁ ଅଧିକ ନୂଆ ପୁରୁଣା ବହି ସମେତ ଓଡ଼ିଆ ଭାଗବତ ଏବଂ ଅନେକ ବିରଳ ବହି ଓ ପୋଥି ଉପଲବ୍ଧ ଥିବାରୁ ଏଭଳି ମହତ୍ ଉଦ୍ଦେଶ୍ୟ ପାଇଁ ପ୍ରଶଂସା କରିଥିଲେ। ଏଥିସହ ଶ୍ରୀମତୀ ବଳିୟାରସିଂହ ଲେଖିକା ସାହିତ୍ୟ ସଂସଦ ସହ ଜଡ଼ିତ ଥିବା ୬୦ଜଣ ସାହିତ୍ୟିକାଙ୍କ ପୁସ୍ତକ ଏହି ଇ-ପାଠାଗାର ସହ ସଂପୃକ୍ତ କରିବା ପାଇଁ ସମ୍ମତି ପ୍ରକାଶ କରିଥିଲେ। ଉଇକି ପାଠାଗାର or.wikisource.orgର କମ୍ୟୁନିଟି ମୁଖ୍ୟ ମୃତ୍ୟୁଞ୍ଜୟ କର, ଡ. ସୁବାସ ଚନ୍ଦ୍ର ରାଉତଙ୍କ ସମେତ ଆଇନଜୀବୀ ଶୈଳେଶ ପଟ୍ଟନାୟକ ଏବଂ ଜ୍ଞାନରଂଜନ ସାହୁ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମ ପରିଚାଳନା କରିଥିଲେ।