ଡୁମାଳ ପରିଷଦର ଆଲୋଚନାଚକ୍ର ଓ ଭେଟ୍ଘାଟ୍ ସମାରୋହ
ଭୁବନେଶ୍ୱର: ଡୁମାଳ ପରିଷଦ ଓଡ଼ିଶାର ଖୋର୍ଧା ଜିଲ୍ଲା ଶାଖା ଆନୁକୂଲ୍ୟରେ ଓଡ଼ିଶା କୃଷି ବିଶ୍ୱବିଦ୍ୟାଳୟ ପରିସର କୃଷକ ନିବାସ ବୈଠକ ଗୃହରେ ଗତ ରବିବାର ଏକ ଆଲୋଚନାଚକ୍ର ଅନୁଷ୍ଠିତ ହୋଇଯାଇଛି। ୧୦ ଜିଲ୍ଲାର ସଭାପତି ଓ ସମ୍ପାଦକ, ଯୁବ ସଭାପତି, ବିଚାରକମଣ୍ଡଳୀ, ରାଜ୍ୟ କର୍ମକର୍ତ୍ତା, ରାଜ୍ୟ ମହିଳା କର୍ମକର୍ତ୍ତା ତଥା ବୁଦ୍ଧିଜୀବୀମାନେ ଏଥିରେ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ଏଥିରେ ମୁଖ୍ୟ ଅତିଥି ଭାବେ ରାଜ୍ୟ ସଭାପତି ସୁଧିର କର୍ଣ୍ଣ, ସମ୍ମାନିତ ଅତିଥି ଭାବେ ରାଜ୍ୟ ସମ୍ପାଦକ ଗୌତମ ଖେତି ଓ ରାଜ୍ୟ ଉପଦେଷ୍ଟାମଣ୍ଡଳୀ ସଦସ୍ୟ ପ୍ରଶାନ୍ତ ଭୋଇ ଯୋଗ ଦେଇଥିଲେ। ସାଧାରଣ ସଦସ୍ୟ ଭାବେ ପ୍ରଫେସର ଦିଲ୍ଲୀପ କର୍ଣ୍ଣ ପଶୁପାଳନ ଉପରେ, ଜନଗଣନା ବିଭାଗର ଉପନିର୍ଦେଶକ ହାରାଧନ କର୍ମୀ ଜନସଂଖ୍ୟା ମାନବ ସମ୍ବଳ ପରିଚାଳନା ଉପରେ, ଅଧ୍ୟାପିକା ପ୍ରଭାତି ପାତ୍ର ଓ ଅଧ୍ୟାପିକା ଦେବଯାନୀ ମେଶୁଆ ଶିକ୍ଷା ଓ ନାରୀ ଶିକ୍ଷା ଉପରେ, ରାଜ୍ୟ ସଭାନେତ୍ରୀ ହେମାବତୀ କରନ ନାରୀ ସଂଗଠନ ଉପରେ, ପ୍ରଫେସର ନନ୍ଦକିଶୋର ମହାକୁଡ଼ ଜାତିର ସଂଗଠନ ଉପରେ, ରାଜ୍ୟ ଯୁବ ସଭାପତି ସୁରେଶ କର୍ଣ୍ଣ ଯୁବ ସଂଗଠନ ଉପରେ, ଏଲ ଏମ୍ ଗଡ଼ନାୟକ କୃଷିର ସମସ୍ୟା ଓ ସମାଧାନ ଉପରେ ନିଜର ବକ୍ତବ୍ୟ ରଖିଥିଲେ। ଅଧିବକ୍ତା ଉଦିତ୍ ପ୍ରତାପ ଦେହୁରୀ କାର୍ଯ୍ୟକ୍ରମକୁ ପରିଚାଳନା କରିଥିଲେ। ଦ୍ୱିତୀୟ ଅଧିବେଶନରେ ରାଜନୈତିକ ଦୃଶ୍ୟପଟ ଉପରେ ଆଲୋଚନା ହୋଇଥିଲା। ଚିତ୍ତରଂଜନ କର୍ଣ୍ଣ, ମଣ୍ଟୁ ଖମାରୀ, ଚକାନନ୍ଦ କମ୍ପ, କୃତ୍ତିବାସ ପଲିଆ, ହୀରା ମହାକୁଡ଼ ଓ ଠାକୁର କର୍ଣ୍ଣଙ୍କ ସମେତ ଅନ୍ୟମାନେ ନିଜ ନିଜ ମତ ରଖିଥିଲେ। ଏଥିରେ ବୌଦ୍ଧ, କଣ୍ଟାମାଳ, ସୋନପୁର, ଆଠମଲ୍ଲିକ ନିର୍ବାଚନମଣ୍ଡଳୀର ସଦସ୍ୟ ଉପସ୍ଥିତ ଥିଲେ। ତୃତୀୟ ଅଧିବେଶନରେ ରାଜ୍ୟ ଓ ଭୁବନେଶ୍ୱରର ଥିବା ମହିଳାଙ୍କୁ ନେଇ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଏଥିରେ ମହିଳା ସଭାନେତ୍ରୀ ହେମାବତୀ କରଣ ସଭାପତିତ୍ୱ କରିଥିବା ବେଳେ ଦେବଯାନୀ ମେଶୁଆ, ପ୍ରଭାତି ପାତ୍ର, ସମାଜସେବୀ ନୀଳିମା ଡାଙ୍ଗ ପ୍ରମୁଖ ଉପସ୍ଥିତ ଥିଲେ। ଶେଷରେ ଭେଟ୍ଘାଟ୍ ସମାରୋହ ପାଳିତ ହୋଇଥିଲା।