ବିପନ୍ନଙ୍କ ସହ ଧାରଣାରେ ସାମିଲ ହେଲେ ସାଂସଦ
ବାଲିଅନ୍ତା: ଫନି କ୍ଷୟକ୍ଷତି ଜନିତ ସହାୟତା ଦାବିରେ ଆଜି ଏକ ହଜାରରୁ ଅଧିକ ପରିବାର ବାଲିଅନ୍ତା ପଞ୍ଚାୟତ ସମିତି ଓ ତହସିଲ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ତେବେ ସାଂସଦ ଅପରାଜିତା ଷଡ଼ଙ୍ଗୀ ଧାରଣାସ୍ଥଳରେ ପହଞ୍ଚି ସେମାନଙ୍କ ସହ ସାମିଲ ହୋଇଥିଲେ। ଆର୍ଥିକ ସହାୟତା ଓ ଯୋଗ୍ୟ ହିତାଧିକାରୀଙ୍କୁ ପକ୍କାଘର ଯୋଗାଇ ଦେବା ଦିଗରେ ତହସିଲ ପ୍ରଶାସନ, ଜିଲ୍ଲା ଓ ବ୍ଲକ ପ୍ରଶାସନ ସହ ଆଲୋଚନା କରି ତ୍ବରିତ ପଦକ୍ଷେପ ଗ୍ରହଣ କରିବେ ବୋଲି ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ସାଂସଦ ଶ୍ରୀମତୀ ଷଡ଼ଙ୍ଗୀଙ୍କ ନିକଟରେ ୨୬୩ଟି ଅଭିଯୋଗ ହୋଇଥିବା ସାଂସଦଙ୍କ ପ୍ରତିନିଧି ସିଦ୍ଧେଶ୍ବର ନାଥ ସୂଚନା ଦେଇଛନ୍ତି।